Ukusoopolola Ilyashi Ukulingana No Mutwe Wa Liko

BAKALANDA babelesha balishiba ifyo cacindama ukukwata umutwe wa lyashi. Ilyo balepekanya ilyashi, umutwe wa liko ulabaafwa ukwishiba umwa kulosha ifyebo no kutontonkanyapo sana. Ici cilenga balande pa fyebo mu nshila inganonsha ibumba ukucila ukulanda pa fishinka ifingi mu lupita. Nga ca kuti icishinka cikalamba cimo na cimo nacikuma ku mutwe wa lyashi lyenu mu kulungatika kabili cilemwafwa ukuulondolola, ibumba nalyo kuti lyayafwiwa ukwibukisha ifyo fishinka no kwiluka umo filolele.

Nangula kuti twatila umutwe wa lyashi e mulandu muli no kulandapo, mukasanga ukuti amalyashi yenu yakawaminako nga mwalamona umutwe wa lyashi nge nshila ya kuloshamo uyo mulandu mukwete. Ubufumu, Baibolo, no kwima ku bafwa yonse yaba milandu ya munsaunte. Muli yi milandu kuti mwafuma imitwe ya malyashi iyalekanalekana. Moneni imitwe ingapangwa: “Ubufumu Bwaba Buteko bwa Cine Cine,” Ubufumu bwa kwa Lesa Bukalenga Isonde Ukuba Paradise,” “Baibolo Yalipuutwamo Kuli Lesa,” “Baibolo Yaba ca Kutungulula Icibomba mu Nshiku Shesu,” “Ukwima ku Bafwa Kulenga Abaleloosha Ukuba ne Subilo,” na “Isubilo lya Kwima ku Bafwa Lilatwafwa Ukutwalilila Abashangila Ilyo Tulepakaswa.” Iyi mitwe yonse ikabila ukulandilwa mu nshila shapusaninina.

Ukulingana no mutwe waba mu Baibolo yonse, ukushimikila Yesu Kristu aleshimikila mu butumikishi bwakwe ubwa pe sonde kwakomaile pa mutwe wa kuti: “Ubufumu bwa mu muulu nabupalama.” (Mat. 4:17) Asoopolwele shani uyo mutwe wa lyashi? Mu Malandwe yane balilanda pa Bufumu ukucila pa miku 110. Lelo Yesu talelanda fye libili libili ishiwi lya kuti “ubufumu.” Yesu alangilile bwino bwino ku fyo alesambilisha na ku fipesha amano alecita ukuti wene, uwali pa kati kabo, ali Mwana wa kwa Lesa, Mesia, untu Yehova ali no kupeela Ubufumu. Yesu alondolwele no kuti ukupitila muli wene, na bambi bali no kuyateka muli bulya Bufumu. Alangile imibele ifwile ukuba na baali no kupeelwa ilyo ishuko. Ku fyo alesambilisha na ku milimo yakwe iya maka, alangile bwino bwino fintu Ubufumu bwa kwa Lesa bwali no kucita ku mikalile ya bantu no kulondolola ukuti filya alefumya ifiwa ku mupashi wa kwa Lesa bwali bushininkisho bwa kuti ‘ubufumu bwa kwa Lesa bwali nabufika’ pali bakomfwa wakwe. (Luka 11:20) Ni ubu Bufumu e buntu Yesu atumine abakonshi bakwe ukushimiko bunte.—Mat. 10:7; 24:14.

Ukubomfya Umutwe wa Lyashi Uwalinga. Te kutila mufwile ukusoopolola umutwe wa lyashi filya fine fye Baibolo yacita, lelo ukukwata umutwe wa lyashi uwalinga filya Baibolo yakwata kwalicindama sana.

Nga ni mwe muli no kuisalila umutwe wa lyashi, intanshi tontonkanyeni pa buyo bwa lyashi lyenu. Lyene ilyo mulesala ifishinka fikalamba ifili no kuba pali autulaini yenu, shininkisheni ukuti filetungilila umutwe wa lyashi musalile.

Nga ca kuti namupeelwa umutwe wa lyashi, lingululeni bwino bwino ukumona ifyo ulelangilila pa kwishiba umo ilyashi lili no kulola. Mufwile ukubombesha pa kumfwikisha ubucindami bwa uyo mutwe wa lyashi ne fyo winganonsha abantu. Nga muli no kuisalila ifyebo fya kulanda pa kusoopolola ilyashi ukulingana no mutwe wa liko, pooseniko amano pa kusala pa kuti uyo mutwe wa lyashi wifimbilikishiwa. Lelo, nga ca kuti nabamupa ifyebo, nalyo line kufilingulula ukumona ifyo mwingafilanda ukulingana no yo mutwe wa lyashi. Muli no kutontonkanya na pa mulandu ifyo fyebo ficindamine kwi bumba mulelandako no buyo bwenu pa kufilanda. Ici cikamwafwa ukwishiba ica kukomailapo ilyo mulelande lyashi.

Ifya Kukomaila pa Mutwe wa Lyashi. Pa kukomaila bwino pa mutwe wa lyashi, mufwile mwabika icitendekelo ilyo mulesala ifyebo no kufiteyanya. Nga mwabomfya fye ifyebo filetungilila umutwe wa lyashi lyenu kabili nga mwakonka ifishinte fya kubomfya pa kupekanya autulaini musuma, ilingi line nga nshi mukakomaila pa mutwe wa lyashi ukwabula no kwibukila.

Ukubwekeshapo kuti kwamwafwa ukwebekesha umutwe wa lyashi. Pa kulisha amalimba, umutwe wa lwimbo e cishinte cibwekeshiwapo ilingi ku kwishibisha ulwimbo lonse. Te lyonse imililile yumfwika cimo cine. Inshita shimo kuti baputawisha imililile ya uyo mutwe nelyo ukulisha fye onse, mu nshita mu nshita umutwe wimbilwa mu nshila shimbi, lelo umwine uwashikile ulwimbo alabomfya inshila shalekanalekana ku kusaakanyamo umutwe wa luko mpaka wayandatila ulwimbo lonse. E fyo cifwile no kuba na ku mutwe wa lyashi. Ukubwekeshapo amashiwi yapulilemo ciba kwati mililile ya lwimbo iibwelelabwelelapo. Pa kuti kube ukulekanalekana kuti mwabomfya amashiwi yambi ayapilibula fimo fine na yali mu mutwe wa lyashi. Ico cikalenga umutwe wa lyashi ukuba e cishinka cikalamba ico ibumba lyenu lyakulaibukisha.

Ifi fishinte tafibomba fye ku malyashi ya pa cisebele lelo na ku kulanshanya kwa mu butumikishi bwa mwi bala. Ukulanshanya ukwipi kuti kuleibukishiwa pa nshita yalepa nga ca kuti umutwe wa kuko wapulamo. Ifishinka musambilisha pe sambililo lya Baibolo kuti fyayanguka ukwibukisha nga ca kuti umutwe wa lyashi wakomailwapo. Ukupoosako amano ku kusala imitwe ya malyashi yalinga no kuisoopolola bwino kukalenga mukabe kalanda kabili kasambilisha musuma uwa Cebo ca kwa Lesa.