Ifipusho Ukufuma ku Babelenga

Yesu asosele ukuti: “Nga mwalekelela imembu sha bamo, ninshi shalekelelwa kuli bene; nga mwaikasha isha bamo, ninshi shaikashiwa.” Bushe aya mashiwi yalepilibula ukuti Abena Kristu kuti balekelela imembu?

Takwabako icishinte ca mu Malembo ica kusondwelela ukuti Abena Kristu mu cinkumbawile, nangu fye ni baeluda basontwa mu filonganino, balikwata ubulashi bwa bulesa ku kulekelela imembu. Lelo, cintu Yesu asosele ku basambi bakwe pali Yohane 20:23, uwambwilwe pa muulu, cilangilila ukuti Lesa alipeele abatumwa amaka yaibela muli kuno kuloshako. Kabili ukulanda kwa kwa Yesu palya kuti pambi kwalosha ku cintu asosele pali Mateo 18:18 pa lwa fipingulwa mu muulu.

Abena Kristu kuti balekelela imilandu imo, mu kumfwana no kufunda kwa mutumwa Paulo ukwalembwa pa Abena Efese 4:32 ukutila: “Mubelane icongwe, mube aba mitima ya nkumbu, ababelelano luse, ifyo na Lesa amubelele uluse muli Kristu.” Paulo pano alelanda pa lwa mafya ya pa lwabo aya Bena Kristu, pamo nga ukukanailama mu kulanda. Balingile ukubombesha ukupwisha aya mafya, ukubelelano luse. Ibukisha amashiwi ya kwa Yesu aya kuti: “E ico nga watwale ca bupe cobe pa ciipailo, no kwibukisha palya ukuti munonko ali na ’kantu kuli iwe, leke ca bupe cobe ku cinso ca ciipailo, kabili uye, ubale uwikishanye no mubiyo, e lyo wise no kutuule ca bupe cobe.”—Mateo 5:23, 24; 1 Petro 4:8.

Nangu cibe fyo, ifyashingulukako pali Yohane 20:23 fitubulula ukuti Yesu alelosha ku membu shacilapo kubipa, nga fintu calangililwa ku fintu fimbi ifyo alandile kuli ili ibumba lyaibela. Natumone umulandu.

Pa bushiku abuushiwe, Yesu amoneke ku basambi bakwe mu muputule wakomwa mu Yerusalemu. Ubulondoloshi butila: “E lyo Yesu atile kuli bene kabili, Umutende ube na imwe! Ifyo Tata atumine ine, e fyo na ine ndetuma imwe. Kabili ilyo asosele ici, abapuutile umupu, no kutila kuli bene, Pokeleleni Umupashi wa mushilo. Nga mwalekelela imembu sha bamo, ninshi shalekelelwa kuli bene; nga mwaikasha isha bamo, ninshi shaikashiwa.”—Yohane 20:21-23.

Mu kupalishako, abasambi balumbwilwe baali ukucilisha batumwa ba busumino. (Linganyako John 20 icikomo 24.) Pa kupuuta umupu pali bene no kusoso kuti, “Pokeleleni Umupashi wa mushilo,” Yesu mu cilangililo abeshibishe ukuti mu kwangufyanya umupashi wa mushilo wali no kupongololwa pali bene. Yesu atwalilile ukusoso kuti baali no kukwata amaka ukukuma ku kulekelela imembu. Mu kubamo kupelulula, inumbwilo shakwe shibili shalisuntinkanishiwa, imo ukutungulula ku ibiye.

Inshiku 50 ukutula pa kubuushiwa kwakwe, pa bushiku bwa Pentekoste, Yesu apongolwele umupashi wa mushilo. Cinshi cintu ico capwishishishe? Icapwishishiwe cimo cali, abo bapokelele umupashi balifyelwe libili nga bana ba ku mupashi aba kwa Lesa mu kuba ne subilo lya kuba bakateka banankwe na Kristu mu muulu. (Yohane 3:3-5; Abena Roma 8:15-17; 2 Abena Korinti 1:22) Lelo uko kupongolola kwa mupashi kwalicitile ifyafulilako. Abaupokelele bamo baishilekwata amaka ya fisunguko. Ukupitila muli ayo maka bamo balelandila mu ndimi sha cilendo isho bashaishibe. Bambi balesesema. E lyo bambi na bo baleundapa abalwala nelyo ukwimya abafwa no kubabwesesha ku bumi.—1 Abena Korinti 12:4-11.

Apantu amashiwi ya kwa Yesu pali Yohane 20:22 yasontele kuli uku kupongololwa kwa mupashi wa mushilo pa basambi, amashiwi yakwe ayalundwapo pa lwa kulekelela imembu yamoneka nga yapilibula ukuti abatumwa balipeelwe amaka yaibela ku kulekelela nelyo ukwikasha imembu ukupitila mu kubomba kwa mupashi uwapeelwe kuli bene ukupitila muli bulesa.—Mona The Watchtower, March 1, 1949, ibula 78.

Baibolo taitupeela ubulondoloshi bwakumanina ubwa nshita imo na imo ilyo abatumwa babomfeshe ayo maka, lelo na kabili tailondolola inshita imo na imo lintu babomfeshe ica bupe ca cipesha amano ica kulandila mu ndimi, ukusesema, nelyo ukundapa.—2 Abena Korinti 12:12; Abena Galatia 3:5; AbaHebere 2:4.

Ica kucitika cimo icabimbilemo amaka ya batumwa aya kulekelela no kwikasha imembu casanshishemo Anania na Safira, ababepele umupashi. Petro, uwaumfwile Yesu kuntu alesosa cintu tubelenga pali Yohane 20:22, 23, asansalike Anania na Safira. Intanshi Petro alandile kuli Anania, uwafwilile apo pene. Lintu Safira mu kukonkapo aingile mu kati no kufishilisha ubufi, Petro alimupingwile. Petro talekelele ulubembu lwakwe lelo amwebele ukuti: “Mona, amakasa ya bashiikile balo yali pa mwinshi, balasenda na iwe.” Na o wine alifwile palya pene.—Imilimo 5:1-11.

Muli ici ca kucitika umutumwa Petro abomfeshe amaka yaibela ku kulumbulula ukwikashiwa kwa kulungatika ukwa lubembu, ukwishiba kwa mu cipesha amano ukwa kuti Lesa tengalekelela ulubembu lwa kwa Anania na Safira. Abatumwa na kabili bamoneka nga bakwete ukushilimuka kwacilo buntunse mu milandu imo umo baali abashininkisha ukuti imembu shalilekelelwe pa cishinte ce lambo lya kwa Kristu. E co abo batumwa abapeelwe amaka ku mupashi baali no kulekelela nelyo ukwikasha imembu.a

Ici tacilepilibula ukuti baeluda basubwa no mupashi bonse ku numa kulya balikwete amaka ya musango yo aya fipesha amano. Kuti twamona ico ukufuma ku cintu umutumwa Paulo asosele pa lwa muntu watamfiwe ukufuma mu cilonganino ca ku Korinti. Paulo tasosele ukuti, ‘Nindekelela uyo muntu’ nelyo ukuti, ‘Ninjishiba ifyo uyo muntu alilekelelwa mu muulu, e co mupokeleleni.’ Ukucila, Paulo acincishe icilonganino conse ukulekelela uyu Mwina Kristu wabweshiwa no kumulanga ukutemwa. Paulo alundileko kuti: “Uo mwabelelo luse pa cintu, na ine namubelelo luse.”—2 Abena Korinti 2:5-11.

Ilyo umuntu abweshiwe mu cilonganino, bamunyina ne nkashi aba Bwina Kristu bonse balebelelo luse mu mano ya kukanaba ne cikonko pa lwa cintu aacitile. Intanshi, nangu ni fyo, aali no kulapila no kubweshiwa. Ni shani fintu ico cali no kucitikako?

Kwalibako imembu shabipisha isho baeluda ba mu cilonganino bali no kubombelapo, pamo nga ukwiba, ukubepa, nelyo bucisenene bwabipisha. Balesha ukulungika no kwebaula bakacita wa fibi aba musango yo, ukubalenga ukulapila. Lelo nga ca kuti umo mu kukanalapila atwalilila ukubelesha ulubembu lwabipisha, aba baeluda balakonka ukutungulula kwa bulesa ukwa kutamfya kacita wa fibi. (1 Abena Korinti 5:1-5, 11-13) Cintu Yesu asosele pali Yohane 20:23 tacibomba mu milandu ya musango yo. Aba baeluda tabakwata ifya bupe fya mupashi ifya kucite fipesha amano, pamo nga amaka ya kundapa abalwala lwa ku mubili nelyo ukwimya abafwa; ifyo fya bupe fyalibombele imifwaile ya fiko mu mwanda wa myaka uwa kubalilapo kabili lyene fyalipwile. (1 Abena Korinti 13:8-10) Mu kulundapo, baeluda ilelo tabakwata amaka ya bulesa ku kulekelela ukulufyanya kwabipisha mu mano ya kweba uucitile ulubembu lwabipisha ukuti ali uwasanguluka mu menso ya kwa Yehova. Uyu musango wa kulekelela ufwile ukuba pa cishinte ce lambo lya cilubula, kabili ni Yehova eka fye e wingalekelela pali ico cishinte.—Ilumbo 32:5; Mateo 6:9, 12; 1 Yohane 1:9.

Pamo nga mu mulandu wa muntu mu Korinti wa pa kale, lintu kacita wa lubembu lwabipisha akaana ukulapila, afwile ukutamfiwa. Nga ca kuti pa numa alapila no kulangisha imilimo iiyene no kulapila, ukulekelela kwa bulesa kuti kwacitikako. (Imilimo 26:20) Mu mibele ya musango yo, Amalembo yapeela baeluda umulandu wa kucetekelo kuti Yehova mu cine cine alilekelela kacita wa fibi. Lyene, ilyo umuntu abweshiwa, baeluda kuti bamwaafwa lwa ku mupashi ukuba uwakosa mu citetekelo. Bambi na bo mu cilonganino kuti balekelela mu nshila imo ine Abena Kristu ba ku Korinti balekelele umuntu uwatamfiwe uyo pa numa abweshiwe.

Pa kubomba pa milandu muli iyi nshila, baeluda tabaipangila ifipimo fyabo abene ifya kupingwilako. Babomfya ifishinte fya Baibolo no kukonka inshila sha mu Malembo mu kupalamisha isho Yehova aimike. E ico, ukulekelela ukuli konse nelyo ukukanalekelela pa lubali lwa baeluda kuli no kuba mu mano ya mashiwi ya kwa Yesu aya pali Mateo 18:18 ayatila: “Ndemwebe cine cine, nati, fyonse ifyo mukaka pano isonde fikabe fyakakwa na mu muulu, na fyonse ifyo mukakula pano isonde fikabe fyakakulwa na mu muulu.” Imibombele yabo ili no kubelebesha fye imimwene ya kwa Yehova iya milandu nga fintu yalondololwa muli Baibolo.

Cintu Yesu asosele kanshi, nga fintu calembwa pali Yohane 20:23, tacipinkana na Malembo yonse yambi, lelo cilangilila ukuti abatumwa balikwete amaka yaibela ukukuma ku kulekelela, mu kumfwana ne cifulo cabo icaibela lintu icilonganino ca Bwina Kristu cali iciteku.

[Futunoti]