Bushe Lyonse Ufwaya Ukuba Uwa Ntanshi?

BUSHE walishibako uufwaya ukuba uwa ntanshi lyonse?— Napamo kuti asunka na bantu pa kuti abe uwa ntanshi pa mulongo. Bushe walimonapo ica musango yu ukucitika?— Kasambilisha Mukalamba amwene na bakalamba baleesha ukukwata ififulo fya ntanshi, nelyo ifyacindamisha. Kabili tatemenwe ico. Natumone icacitike.

Baibolo itweba ati Yesu alitilwe ku mutebeto ukalamba ku ng’anda ya muFarise, uwali ni shimapepo wacindama. Ilyo Yesu afikile, atendeke ukutamba abeni bambi baleisa no kuisalila ififulo fyawamisha. E co alandile umulumbe ku bantu baitilwe. Bushe kuti watemwa ukuumfwa?—

Yesu atile: ‘Lintu waitwa ukwisa ku mutebeto wa bwinga, wisala apa kwikala apawamisha, nelyo apacindamisha.’ Bushe nawishiba umulandu Yesu alandile ifyo?— Alondolwele ati napamo nakwitwa umuntu uwacindama ukucila iwe. E co, nga fintu ulemona pa cikope, uukwitile ku mutebeto kuti akweba ati: ‘Peela uyu apa kwikala, na iwe kekale palya.’ Bushe uyu muntu etilwe kuti aumfwa shani?— Kuti aumfwa insoni pantu abeni bambi bonse balamumona ayaikala pa cifulo icasaaluka.

Yesu alelanda ati te cisuma ukufwaya ukukwata icifulo cacindamisha. E co alandile ati: ‘Ilyo waitwa ku mutebeto wa bwinga, kabiye kekale pa cifulo ca pa nshi. Lyene uukwitile kuti aisa kuli iwe no kutila, Mune, ikala pa cifulo ca pa muulu. E lyo ukacindikwa ku menso ya beni bambi bonse ilyo waselela ku cifulo ca pa muulu.’—Luka 14:1, 7-11.

Bushe naumfwa icishinka ca mu mulumbe wa kwa Yesu?— Natupeele ica kumwenako tumone nga naumfwa. Elenganya ukuti ulenina muli basi iiswilemo abantu. Bushe ufwile ukubutukila ukuyaikala no kuleka umukalamba aiminina?— Bushe Yesu kuti atemwa nga wacite co?—

Umo kuti alanda ati Yesu tapoosako amano ku fyo tucita. Lelo bushe ulesumine co?— Ilyo Yesu ali pa mutebeto ukalamba pa ng’anda ya ulya muFarise, aletamba abantu ilyo balesala apa kwikala. Bushe tauletontonkanya ukuti na lelo alapoosako amano ku fyo tucita?— Nomba apo Yesu aba mu muulu, cine cine kuti atumona bwino bwino.

Lintu umuntu aesha ukuba uwa ntanshi, kuti kwaba amafya. Ilingi kulaba ukukansana, na bantu balakalipa. Inshita shimo ici cicitika lintu abana baleya pamo muli basi. Lintu fye baisula ifiibi fya basi, abana balabutuka, uuli onse ukufwaya ukuba uwa ntanshi. Bafwaya ifipuna fyawamisha, ifyaba mupepi na mawindo. Lyene cinshi cingacitika?— Kuti bakalipishanya.

Ukufwaya ukuba uwa ntanshi kuti kwaleta amafya ayengi. Kwaletele na mafya pa kati ka batumwa ba kwa Yesu. Nga fintu twasambilile mu Cipandwa 6 ica cino citabo, balekansana pa wali umukalamba. Cinshi Yesu acitile lyene?— Ca cine, alibalungike. Lelo kwaishileba ukukansana na kabili. Natumone ifyo uku kukansana kwatendeke.

Abatumwa, pamo na bambi baleya na Yesu pa lwendo lwa kulekelesha ku musumba wa Yerusalemu. Yesu alelanda na bo pa lwa Bufumu bwakwe, e co Yakobo na Yohane baletontonkanya pa lwa kuteka nge mfumu na wene. Nabeba na nyinabo, Salome pa lwa ici. (Mateo 27:56; Marko 15:40) E ico lintu baleya ku Yerusalemu, Salome aisa kuli Yesu no kumukontamina, no kulomba icintu cimo.

Yesu aipusha ati “ulefwaya cinshi?” Ayasuka ati kuti atemwa Yesu ukuteeka abana bakwe mupepi na wene mu Bufumu bwakwe, umo ku kuboko kwakwe ukwa kulyo na umo ku kwa kuso. Lintu balya bambi 10 baishiba ico nyina kwa Yakobo na Yohane abalombeele, uletontonkanya ukuti bayumfwa shani?—

Ee, bakalipa pa co Yakobo na Yohane bacitile. E co Yesu afunda bwino abatumwa bakwe bonse. Yesu abeba ukuti bakateka ba fyalo batemwa ukuba aba maka kabili abacindama. Bafwaya ukukwata icifulo ca pa muulu pa kuti bonse balebomfwila. Lelo Yesu aeba abakonshi bakwe ukuti te fyo bafwile ukuba. Ukucila, Yesu alanda ati: “Uwa muli imwe uufwayo kubo wa ntanshi abe umusha wenu.” Tontonkanya pali co!—Mateo 20:20-28.

Bushe walishiba ifyo umusha acita?— Abombela abantu bambi, ukwabula ukwenekela bambi ukumubombela. Aba pa cifulo ca pa nshi, te cifulo ca ntanshi. Tailanga ngo wacindama. Kabili ibukisha, Yesu alandile ati uulefwaya ukuba uwa ntanshi afwile ukuba ngo musha kuli bambi.

Nomba, uletontonkanya ukuti ici cilepilibula cinshi kuli ifwe?— Bushe umusha kuti akansana na shikulu wakwe pa walaikala pa cipuna cawamisha? Nelyo bushe kuti akansana na shikulu wakwe pa walabalilapo ukulya? Uletipo shani?— Yesu alondolwele ukuti umusha atangisha shikulu wakwe lyonse.—Luka 17:7-10.

E co ukucila ukwesha ukuba aba ntanshi, cinshi tufwile ukucita?— Ca cine, tufwile ukuba nga basha kuli bambi. Kabili ico cipilibula ukutangisha bambi. Cipilibula ukumona bambi nga bacindama ukutucila. Bushe kuti watontonkanyapo inshila wingatangishishamo bambi?— Kupukula pa mabula 40 na 41 no kumona na kabili inshila shimo isho wingatangishishamo bambi pa kubabombela.

Uli no kwibukisha ukuti Kasambilisha Mukalamba aletangisha bambi pa kubabombela. Icungulo bushiku ca kulekelesha ilyo ali na batumwa bakwe, alifukeme no kubasamba amakasa. Na ifwe nga tuletangisha bambi pa kubabombela, tukalasekesha Kasambilisha Mukalamba na Wishi, Yehova Lesa.