Bushe Muleibukisha?
Bushe mwaliipakisha ukubelenga bamagazini ba nomba line aba Ulupungu lwa kwa Kalinda? Nga ni fyo, mwalaba aba buseko ukwibukisha ifyakonkapo:
◻Bupilibulo nshi ubwe shiwi lya ciGriki pa·rou·si’a ilyabomfiwa pali Mateo 24:3, 27, 37, 39?
Expository Dictionary of New Testament Words iya kwa Vine isoso kuti: “PAROUSIA . . . ilangilila ukufika no kubapo kwatwalilila.” Muli fyo, te kashita fye ka kufika lelo ukubapo ukufuma pa kufika no kuya ku ntanshi.—8/15, ibula 11.
◻ Ni shani fintu ‘inshiku shilya shaipifiwe’ pa kuti ‘abantu’ bengapusushiwa mu mwanda wa myaka uwa kubalilapo, kabili ni shani fintu shili no kwipifiwa ku nshita ya ku ntanshi? (Mateo 24:22)
Mu 66 C.E., abena Roma ukwabula ukwenekelwa balitalile baleka ukucandila Yerusalemu, ukupeela ‘abantu’ ba Bwina Kristu ishuko lya kufyuka. Mu kupalako, tuleenekela ukuti ukusansa kuleisa pali Babele Mukalamba kukepifiwa mu nshila imo. Muli fyo Abena Kristu basubwa na banabo bakapusushiwa ku bonaushi.—8/15, amabula 18-20.
◻ Tulingile ukwankulako shani nga ca kuti umuntu atendeka ukulyako ku fimpashanya fya Cibukisho nelyo aleko kucite fyo?
Takuli umulandu wa kusakamikilwa ku Bena Kristu bambi. Yesu atile: “Ni ne mucemi musuma, naishibe shandi shiine.” Mu nshila iyo ine iya kwebekesha, e fyo na Yehova aishiba abo bantu aasala nga abana ba ku mupashi. (Yohane 10:14; Abena Roma 8:16, 17)—8/15, ibula 31.
◻ Cinshi cali imifwaile ikalamba iye Funde lya kwa Mose?
Maka maka, lyasambilishe abena Israele ulwa fintu balekabila Mesia, uwali no kubalubula ku mibele yabo iya lubembu. (Abena Galatia 3:24) Ifunde na kabili lyasambilishe akatiina ka bukapepa ne cumfwila, kabili lyaafwile Israele ukutwalilila ukuba uwapaatukako ku fibelesho fyabotelela ifya nko shashingulwikeko. (Ubwina Lebi 18:24, 25)—9/1, ibula 9.
◻ Cinshi caba imifwaile ya cipingo cipya? (Yeremia 31:31-34)
Mifwaile ya kuletako uluko lwa shamfumu na bashimapepo ku kupaala umutundu wa muntu onse. (Ukufuma 19:6; 1 Petro 2:9; Ukusokolola 5:10)—9/1, amabula 14, 15.
◻ Mulandu nshi tulingile ukubelesesha ukulamuka kwa kulombo kwelelwa?
Ukulombo kwelelwa kuti kwayafwa ukunashako ukukalipwa ukulengwa no kukanapwililika, kabili kuti kwaundapa ukwampana kwakanshika. Inshita yonse iyo twalombo kwelelwa liba lisambililo lya kuicefya kabili litusambilisha ukuba abacilapo kwibukila ulwa kuyumfwa kwa bambi.—9/15, ibula 24.
◻ Bushe Mulamba wa mu cibulungwa uwa mu kasuba ka kwa Noa e ko aali mu cine cine?
Ee. Ubulondoloshi bwa ku kale pa lwa lyeshi lya mu cibulungwa conse kuti bwasangwa mu calo conse, ukufuma kuli baAmerika ukufika fye na ku Australia. Ukwanana kwa ili lyashi kulundako ku kutungilila icishinka ca kuti mulamba wabunshishe isonde lyonse cine cine e ko aali, nga fintu cashimikwa muli Baibolo. (Ukutendeka 7:11-20)—9/15, ibula 25.
◻ Cinshi cabimbwamo mu kusekelela abeni? (Abena Roma 12:13)
Inumbwilo “ukusekelela abeni” yapilibulwa ukufuma kwi shiwi lya ciGriki ilyapangwa na mashiwi yabili ayafuma ku mashiwi ayapilibula “ukutemwa” na “umweni.” Muli fyo, ukusekelela abeni cipilibula fye “ukutemwa abeni.” Lelo kusanshamo icacila pa kutemwa kwa cishinte, uko kwaba pa mulandu wa kukakililwako. Ukusekelela abeni kwaba kulumbulula kwa kupekwa kwine kwine, icitemwishi, na bucibusa.—10/1, ibula 9.
◻ Ni pi paiminina ukupaasha kwa kwa Paulo ukukuma ku cupo no bushimbe muli kalata wakwe uwa ntanshi uwa ku bena Korinti, icipandwa 7?
Icupo calilinga kabili, pe samba lya mibele imo, e cicilapo kuwama kuli bamo. Lelo ubushimbe ukwabulo kutwishika bulawama ku mwaume nelyo umwanakashi wa Bwina Kristu uulefwaya ukubombela Yehova mu kuba no kupusaulwa kunono.—10/15, ibula 13.
◻ Ni mu nshila nshi eluda alingile ‘ukupayanishisha abantu bakwe’? (1 Timote 5:8, NW)
Eluda alingile ‘ukupayanishisha abantu bakwe’—umukashi wakwe na bana—lwa ku mubili, lwa ku mupashi, na mu nkuntu.—10/15, ibula 22.
◻ Ni nshila nshi Yehova asansamushishamo ababomfi bakwe?
Umupashi wa mushilo uwa kwa Lesa ubomba nga “kasansamusha.” (Yohane 14:16, NW, utulembo twa mwi samba) Inshila na imbi iyo Lesa asansamushishamo kupitila muli Baibolo. (Abena Roma 15:4) Lesa alishiba ukukabila kwesu umo umo kabili kuti atubomfya ku kusansamusha bambi, pamo fye nga fintu Paulo asansamushiwe ukupitila muli lipoti wa kwa Tito pa lwa bena Korinti. (2 Abena Korinti 7:11-13)—11/1, amabula 10, 12.
◻ Cinshi cintu Paulo alangilila pa kulondolola Yehova ukuti “Shifwe wa nkumbu,” pali 2 Abena Korinti 1:3?
Nauni wa ciGriki uwapilibulwa “inkumbu” afuma kwi shiwi ilibomfiwa ku kulangilila ubulanda pa kucula kwa umo. Muli fyo Paulo alelondolola ukuyumfwa kwabondoka ukwa kwa Lesa ku babomfi Bakwe abali bonse aba busumino abalecula.—11/1, ibula 13.
◻ Cinshi calepwishishiwa ukupitila mu kuleko kulya ukwa bena Israele pa Bushiku bwa Kukonsolwela ubwalebako cila mwaka? (Ubwina Lebi 16:29-31; 23:27)
Ukuleko kulya kwalekunta abantu ba mu Israele ukucilapo ukwibukila ulwa kubembuka kwabo no kukabila kwa kulubulwa. Ukupitila muli kwene balelumbulula ubulanda pa membu shabo no kulapila pa ntanshi ya kwa Lesa.—11/15, ibula 5.
◻ Ni mwi mwalola amashiwi ya kukonkomesha abacaice ukuti: “Lelo ibukisha Kalenga obe”? (Lukala Milandu 12:1)
Incenshi imo isoso kuti ishiwi lya ciHebere ilyapilibulwa “ibukisha” ilingi line litubulula “icitemwishi ca ku muntontonkanya ne ncitilo iyendela pamo no kwibukisha.” E co ukumfwila ili kambisho kupilibula ifingi ukucila fye ukutontonkanya pali Yehova. Cisanshamo ukucitako fimo, ukucita icimutemuna.—12/1, ibula 16.