IFYO FWE BENA KRISTU TULINGILE UKULAIKALA

Icipande Icipya mu Kulongana kwa mu Kati ka Mulungu

Ukutendekela mu January 2018, mu kulongana kwa mu kati ka mulungu mukalaba ifyebo fya kumwafwa ukusambilila e lyo na ifya kutamba ifikalafuma muli Baibolo Amalembo ya Calo Cipya (nwtsty) iya kusambililamo iya ciNgeleshi iyaba pa Intaneti. Nangu ca kuti tamwakwata iyi Baibolo mu lulimi lwenu, tatuletwishika ukuti ifi fyebo fikalamwafwa sana ilyo mulepekanya ukulongana. Ne cacindamisha ca kuti, fikamwafwa sana ukupalama kuli Shifwe uwaba no kutemwa, Yehova!

IFYEBO FYA KUMWAFWA UKUSAMBILILA

Mu fyebo fya kumwafwa ukusambilila muba ifyebo pa ntambi, ififulo, e lyo ne ndimi shimo ishalandwapo mu Baibolo.

Mateo 12:20

Iciku: Inyali iyo balebomfya sana mu mayanda baleibumba ne loba umo balebika amafuta ya muolife. Icisalu ico balebika muli iyi inyali caleonka amafuta ayalelenga cilefumya ulubingu. Ishiwi lya ciGriki ilyo bapilibula ukuti “iciku” kuti lyalola na ku cisalu icilefumya icushi lelo icishikwete ulubingu pantu umulilo wile uleshima panono panono. Ubusesemo bwaba pali Esaya 42:3, bwasobele pa cikuuku ca kwa Yesu ukuti tali na kushimya iciku icileshibantukila ku bantu abaicefya kabili abo balecusha.

Mateo 26:13

Icine cine: Ishiwi lya ciGriki a men ilyo bapilibula ukufuma kwi shiwi lya ciHebere ʼa men, lyalola mu kuti “nacibe ifyo fine” nelyo ukuti “twasuminisha.” Yesu alebomfya ili ishiwi pa kutendeka ukulanda amashiwi yamo, ubulayo nelyo ubusesemo. Ukucita ifi kwalolele mu kuti ifyo Yesu alalanda fya cine cine kabili fili no kucitika. Bamo batila ukubomfya ishiwi lya kuti “icine cine” nelyo ameni muli iyi nshila kwaliibela sana mu mabuuku yashila. Nga babwekeshapo amashiwi ya kuti (a·menʹ a·menʹ), mu kukonkana nga fintu caba mwi buuku lya kwa Yohane, ninshi amashiwi Yesu alandile yalolele mu kuti “ndemweba icine cine.”—Yoh. 1:51.

IFYA KUTAMBA

Muba ifikope, amavidio umwabula ifiunda e lyo na mavidio ayalanga ifintu ifyalekanalekana ifyo balandapo mu Baibolo.

Betifage, Ulupili lwa Miolife na Yerusalemu

Iyi vidio iipi ilanga umusebo uwabela ku kabanga ka Yerusalemu, uwafumine ku mushi uo beta muno nshiku ukuti et-Tur uo bamo baishiba ukuti e mushi wa Betifage uo balandapo mu Baibolo, kabili uyu musebo walipitile na pa muulu wa Lupili lwa Miolife. Umushi wa Betani wabelele ku kabanga ka Betifage iyabelele ku kabanga ka Lupili lwa Miolife. Yesu nga ali na basambi bakwe mu Yerusalemu, batemenwe ukusendama mu Betani, itauni beta muno nshiku ukuti el-ʽAzariyeh (El ʽEizariya), ishina lya ciArabic ilyalola mu kuti “Icifulo ca kwa Lasaro.” Te kuti tutwishike ukuti Yesu aleikala pa ng’anda ya kwa Marita, Maria na Lasaro. (Mat. 21:17; Marko 11:11; Luka 21:37; Yoh. 11:1) Nalimo pa kuya ku Yerusalemu, Yesu alebomfya iyi nshila balangile muli vidio pa kufuma ku ng’anda ukwaleikala Marita, Maria na Lasaro. Pa Nisani 9, mu 33 C.E., ilyo Yesu aninine pa mwana wa mpunda pa kuya ku Yerusalemu ukufuma ku Betifage, nalimo abomfeshe iyi nshila iyapitile pa Lupili lwa Miolife.

Umusebo uwafuma ku Betani ukuya ku Betifage
Betifage
Ulupili lwa Miolife
Umupokapoka wa Kidrone
Ulupili Apali Itempele

Umusomali mwi Fupa lya ku Citende

Ici, cikope ico bakopele icilanga ifupa lya ku citende ca muntu ico bapopamo umusomali uwalepele amasentimita 11.5. Ili ifupa balisangile mu 1968, ilyo baleshula ifintu ku kapinda ka ku kuso aka musumba wa Yerusalemu, kabili umwine wa ili ifupa basangile aliko ilyo abena Roma baleteka. Ifi bashulile mu mushili fitupeela ubushininkisho bwa kuti imisomali nalimo baleibomfya ku kupopelako umuntu pa cimuti. Uyu umusomali nalimo kuti wapalana no musomali abashilika abena Roma babomfeshe pa kupopela Yesu Kristu pa cimuti. Ili ifupa balisangile mu cibokoshi ca mabwe ico balesungilamo amafupa ya muntu ayo balesunga umubili nga wabola. Ici cilelangilila ukuti umuntu uo bapoopela pa cimuti balemushika.—Mat. 27:35.