Ico Ifibumbwa fya “Mano Ayacilamo” Fingatusambilisha

IFYA kutalalika umwela, ifya kukafya, ifya kusangulula amenshi yasampa, ne fya kupiminako ifili pa nshi ya menshi fintu ifyo fishibikwe nga nshi ku mutundu wa muntu mu mwanda wa myaka uwalenga 20. Lelo, ubwina nama bwena bwalifikwete amakana ya myaka ayengi ilyo abantu bashilafikwata. Ee, abantu balanonkelamo pa kubebeta ifyo fibumbwa fya “mano ayacilamo.” (Amapinda 30:24-28; Yobo 12:7-9) Cilemoneka kwati, inama shimo shisangwike kafundisha ushilanda uwa mutundu wa muntu, e co kuti twaipakisha nga nshi ukushibebeta.

Bushe kuti twanonkelamo pa kulanguluka imibele ya nama shimo? Cisuma, Yesu Kristu apashenye abakonshi bakwe ku mpaanga, insoka, inkunda, ukusanshako fye na makanta. Cinshi aletontonkanya pa kupashanya abakonshi bakwe kuli ifi fibumbwa? Natumone.

“Impaanga Shandi Shumfwe Shiwi Lyandi”

Impaanga shalumbulwa mu Baibolo ukucila pa miku 200. Nga fintu Smith’s Bible Dictionary ilondolola, “impaanga shaba cipasho ca bufuuke, ukutekanya, no kunakila.” Muli Esaya icipandwa 53, Yesu muli bulya busesemo apashanishiwe ku mpaanga. Fintu cali icalingisha ukuti alingenye abakonshi bakwe ku nama imo ine! Lelo mibele nshi iya mpaanga ukucilisha iyo Yesu aletontonkanyapo?

“Impaanga shandi shumfwe shiwi lyandi, na ine nalishiishiba, na sho shilankonka,” e fyasosele Yesu. (Yohane 10:27) Muli fyo aebekeshe ubufuuke bwa basambi bakwe no kufwaisha kwabo ukwa kumukonka. Impaanga sha cine cine shilakutika kuli kacema wa shiko no kumukonka mu kuitemenwa. Kacema na o alapalamisha sana ku mukuni.

Umukuni kuti wasalanganina mu nika ilyo ulemema, lelo impaanga imo na imo ileshiba ukuli ibumba lyonse. Muli fyo, lintu inama shayumfwe shasansalikwa nelyo ukumfwo mwenso, “kuti shabungana capamo mu kwangufyanya,” e filondolola icitabo ca Alles für das Schaf (Ukwishiba Impaanga mu Kufikapo). Nga ca kuti impaanga shilebutuka ubusanso, shibutukila capamo ngo mukuni, uku ninshi shileimininako ukupimununa icilecitika. “Ukufulumuka mu fiputulwa kulenga utwana twa mpaanga ne mpaanga shanakuka ukukumamo. Umukuni ulashilenga fye no kuyumfwa ishacingililwa nga nshi.” Cinshi cintu twingasambilila kuli iyi mibele?

Abena Kristu ba cine ilelo tabasalanganina mu tubungwe twa fya mapepo ne fyakaniko fya Kristendomu. Mu cifulo ca ico, balilonganikwa mu mukuni umo. Umwina Kristu umo umo alapalamina kuli uyu mukuni wa kwa Lesa, kabili ici cilenga ukuteyanya kwa Nte sha kwa Yehova ukwikatana. Lintu kwabako akayofi—nampo nga bulwele bwabipisha, inkondo, nelyo ubusanso ubulengwa ne fyabumbwa pe sonde—ni kwi kuntu kapepa umo na umo aya mu kufwaya ubutungulushi no bucingo? Mu kuteyanya kwa kwa Yehova, ukupayanya umutelelwe wa ku mupashi.

Ni shani fintu ukufunda kwa mu Baibolo kusangwa? Ukupitila mu mpapulo pamo nga Ulupungu lwa kwa Kalinda na magazini munankwe, Loleni! Aba bamagazini no kulongana kwa Bwina Kristu filapayanya fye no kwaafwa kwaibela ku balekabila ukusakamana kwaibela, ukupala utwana twa mpaanga ne mpaanga shanakuka mu mukuni. Ku ca kumwenako, abafyashi abashimbe na bapopomenwa balasakamanwa. Fintu caba ica mano, kanshi, ukubelenga magazini umo umo, ukusangwa ku kulongana kwa cilonganino konse, no kubomfya cintu tusambilila! Muli fyo tulalangisha ubufuuke no kupalamina sana ku mukuni wa kwa Lesa.—1 Petro 5:2.

“Abacenjela nge Nsoka, Kabili Abafuuke nge Nkunda”

Smith’s Bible Dictionary yalondololo kuti: “Ku Kabanga konse insoka yalebomfiwa nge cipasho ca mibele ya bubifi, iya mupashi wa bucintomfwa.” Lubali lumbi, “we nkunda yandi” yali ni numbwilo ya cintemwa. (Ulwimbo lwa Nyimbo 5:2) Cinshi cintu Yesu aletontonkanyapo, lyene, lintu akoseleshe abakonshi bakwe ukuba “abacenjela nge nsoka, kabili abafuuke nge nkunda”?—Mateo 10:16.

Yesu alepeela amakambisho ukukuma ku kushimikila no kusambilisha. Abasambi bakwe balekabila ukwenekela ukubapokelela mu nshila shalekanalekana. Bamo baali no kuba abasekelela, ilintu bambi baali no kukaana imbila nsuma. Bamo baali no kupakasa fye aba babomfi ba cine aba kwa Lesa. (Mateo 10:17-23) Cinshi cintu abasambi baali no kucita lintu bapakaswa?

Muli Das Evangelium des Matthäus (Ilandwe lya kwa Mateo), Fritz Rienecker ukukuma kuli Mateo 10:16 asoso kuti: “Ukucenjela . . . kufwile ukwendela pamo na bumpomfu, ukufumaluka, no kukanapita mu mbali, e pali abalwani bakwata umulandu wa kuilishanishishapo. Inkombe sha kwa Yesu shashingulukwa na bakakaanya bakaluka, abashilangulukilako kabili abasansa abatumwa ukwabula inkumbu kabili pa kashita akali konse. E ico, cili icakabilwa—ukupala fye insoka—ukuba abapempwila kuli bakakaanya, no kupimununa imibele mu nshila yabamo kuswatuka; ukubombela pa mibele ukwabula ukubomfya imingalato nelyo ubucenjeshi, ukuba abasanguluka kabili aba cine ku co balesosa ne co balecita na muli fyo ukuba nge nkunda.”

Cinshi cintu ababomfi ba kwa Lesa aba muno nshiku bengasambililako ku mashiwi ya kwa Yesu ayasangwa pali Mateo 10:16? Ilelo, abantu bankula ku mbila nsuma mu nshila imo ine fye nga ilya bayankwililemo mu mwanda wa myaka uwa kubalilapo. Lintu balolenkana no kupakasa, Abena Kristu ba cine balakabila ukubomfya fyonse fibili ukucenjela kwa nsoka no kusanguluka kwa nkunda. Abena Kristu tababomfya ubucenjeshi nelyo ukubulwa ubufumacumi lelo balisanguluka, ba bucishinka, kabili bafumacumi pa kubilisha ubukombe bwa Bufumu kuli bambi.

Ku kulangilila: Abo mubomba na bo incito, imisepela ya ku sukulu, nelyo fye aba mu lupwa kuti balanda amashiwi ya kupumya ifisumino fyenu nga Inte ya kwa Yehova. Ukwankulako kwayanguka ni kulya ukwa kufwaya ukucita cimo cine ukukuma ku fisumino fyabo. Lelo bushe ico cili bufuuke? Nakalya. Nga ca kuti mwalangisha abalemusuusha ukuti imilandile yabo te kuti yambukile imibele yenu iya buseko, kuti napamo bailekela fye abene. Lyene muli no kuba abacenjela kabili ababula umulandu—“abacenjela nge nsoka, kabili abafuuke nge nkunda.”

“Icimpashanya ca Makanta Cali nga Bakabalwe Abapekaniwa ku Kuyalwa”

Magazini wa GEO ashimiko kuti mu 1784, South Africa alipuminwe na “cipipya wakulisha [uwa makanta] uwabala abako.” Makanta atebelele incende ya basikweya kilomita 5,200, incende iyo Hong Kong engengilamo imiku isano. Smith’s Bible Dictionary asoso kuti makanta “alonaula ifilimwa icabipisha nga nshi mu fyalo umo apita.”

Ilyo alesokolola ifintu fyali no kucitika mu “bushiku bwa kwa Shikulu,” Yesu abomfeshe icimonwa ca cipipya wa makanta. Ukukuma kuli bene casoselwe ukuti: “Icimpashanya ca makanta cali nga bakabalwe abapekaniwa ku kuyalwa.” (Ukusokolola 1:1, 10; 9:3-7) Cinshi cali ubupilibulo bwa ici cimpashanya?

Inte sha kwa Yehova ukutula kale balyumfwikisha ukuti makanta wa mu Ukusokolola icipandwa 9 emininako ababomfi ba kwa Lesa abasubwa abali pe sonde muli uno mwanda wa myaka.a Aba Bena Kristu balipeelwa umulimo waibela—ukushimikila ubukombe bwa Bufumu isonde lyonse no kupanga abasambi. (Mateo 24:14; 28:19, 20) Ici cilefwayo kuti bene bacimfye ifipindami no kukakatila ku mulimo wabo. Cinshi cingemininako bwino iyi mibele pa mbali ya kwa makanta wakakata?

Nangu cingati alepa fye basentimita ukucilako fye panono pali basano, makanta enda pa kati ka bakilomita 100 na 200 pa bushiku bumo. Umusango umbi uwa makanta kuti wacishanapo ukufika kuli bakilomita 1,000. Magazini wa GEO alondololo kuti “amapindo yakwe yapampaila imiku 18 pali sekondi umo kabili ukufika ku maawala 17 mu bushiku bumo—icintu ico takuli icishishi cimbi icingacita.” Mwandi mulimo ushaikulila kuli cilya cibumbwa cacepesha!

Pamo nge bumba, Inte sha kwa Yehova baba abashangila mu kwananya imbila nsuma iya Bufumu. Pali nomba bashimikila mu fyalo ukucila 230. Aba babomfi ba kwa Lesa balacimfya amafya ayengi pa kuti bengabombako uyu mulimo. Mafya nshi balolenkana na yo? Impatila, ifibindo, amalwele, ukufuupulwa, no kukaanya ukufuma kuli balupwa e yamo aya mafya bakumanya. Lelo takwaba icabala acilesha ukulunduluka kwabo. Bakakatila ku mulimo wabo uwapeelwa na Lesa.

Twalilileni Ukulangisha Imibele ya Bwina Kristu

Ee, Yesu apashenye abakonshi bakwe ku mpaanga, insoka, inkunda, na makanta. Ici mu cine cine cili icalinga mu bushiku bwesu. Mulandu nshi? Pantu impela ya ino micitile ya fintu naisungamina, kabili amafya yalecililako kubipa.

Ukwibukisha amashiwi ya filangililo fya kwa Yesu, Abena Kristu ba cine balapalamisha ku mukuni wa kwa Lesa no kupokelela ukufunda mu bufuuke ukufuma ku kuteyanya kwa kwa Yehova. Balaba abapempwila no kuibaka ku mibele iingacilikila imibombele yabo iya Bwina Kristu, ilintu baletwalilila ukuba ababulwa umulandu mu fintu fyonse. Mu kulundapo, balaba no mukoosha pa kucito kufwaya kwa kwa Lesa lintu balolenkana ne fipindami. Kabili balatwalilila ukusambilila ku fibumbwa fimo ifya “mano ayacilamo.”

[Futunoti]