Bushe Lesa E Wisa Intanshi mu Lupwa Lobe?
“Uletemwa Sokulu [Yehova] Lesa obe ku mutima obe onse.”—MARKO 12:29, 30.
1. Kwacindama shani ukutemwa Yehova?
“LIFUNDE nshi ilya ntanshi kuli yonse?” e fintu kalemba aali naipusha Yesu. Ukucila ukumwasuka ukulingana ne mimwene yakwe, Yesu ayaswike icipusho ca kwa kalemba ukupitila mu kwambula ukufuma mu Cebo ca kwa Lesa pa Amalango 6:4, 5. Ayaswike ati: “Ilya ntanshi ni ili: Umfwa, we Israele, [Yehova, NW] Lesa wesu [Yehova] umo; kabili uletemwa Sokulu [Yehova] Lesa obe ku mutima obe onse, na ku mweo obe onse, na ku mano yobe yonse, na ku maka yobe yonse.”—Marko 12:28-30.
2. (a) Kulwisha nshi kuntu Yesu aali no kulolenkana na ko? (b) Cinshi inshita shimo shimo icingalenga ukutemuna Yehova ukuba ukwayafya?
2 Pa kumfwila cintu Yesu aitile ifunde lya ntanshi—ilyakatamisha ukucila yonse—cifwaya ukuti lyonse tulecita icitemuna Yehova. Yesu e fintu acitile, nangula ca kuti pa kashita kamo umutumwa Petro alikalifiwe pa lwa nshila ya kwa Yesu, na pa kashita kambi balupwa lwakwe abapalamisha na bo bene balikalifiwe. (Mateo 16:21-23; Marko 3:21; Yohane 8:29) Ni shani nga ca kuti waisanga mu mibele yapalako? Tutile balupwa balefwaya ukuti uleke ukusambilila Baibolo no kubishanya ne Nte sha kwa Yehova. Bushe ukaleka Lesa ukwisa intanshi ukupitila mu kucita icimutemuna? Bushe Lesa e wisa intanshi, nelyo cingati ifilundwa fya lupwa kuti pambi balwisha ukubombesha kobe ukwa kumubombela?
Iciteyo ca Kulwisha kwa mu Lupwa
3. (a) Fya kufumamo nshi ifisambilisho fya kwa Yesu pambi fingakwata ku lupwa? (b) Ni shani fintu ifilundwa fya lupwa bengalangisha uo batemwisha?
3 Yesu tatile amafya ayengafumamo lintu bambi mu lupwa balwisha icilundwa uwapokelela ifisambilisho fyakwe yalicepa. “Aba mu ŋanda yakwe e bakaba abalwani ba muntu,” e fyo Yesu asosele. Lelo, te mulandu ne co ca kufumamo ca kulengo bulanda, Yesu alangishe uulingile ukwisa intanshi pa kusoso kuti: “Uwatemwa wishi nangu ni nyina ukucilo kuntemwa, tawamina ine; no watemwo mwana mwaume nangu mwana mwanakashi ukucilo kuntemwa, tawamina ine.” (Mateo 10:34-37) Tubika Lesa intanshi ukupitila mu kukonka ifisambilisho fya Mwana wakwe, Yesu Kristu, uwaba “cipasho ca musango [wa kwa Lesa].”—AbaHebere 1:3; Yohane 14:9.
4. (a) Cinshi Yesu atile e cabimbwamo mu kuba umukonshi wakwe? (b) Ni mu mano nshi Abena Kristu bali no kupatila balupwa lwabo?
4 Pa kashita na kambi lintu Yesu alelanda pa lwa cabimbilwemo mu cituntulu mu kuba umukonshi wakwe uwa cine cine, atile: “Umuntu nga aisa kuli ine, kabili tapata wishi, na nyina, no mukashi, na ’bana, na bamunyina, ne nkashi, no mweo wakwe wine, kuti afilwo kubo musambi wandi.” (Luka 14:26) Ukwabulo kutwishika Yesu talelosha mu kuti abakonshi bakwe balingile ukupata balupwa babo mu cine cine, apantu akambishe abantu ukutemwa nelyo fye balwani babo. (Mateo 5:44) Mu cifulo ca ico, Yesu pano aloseshe mu kuti ukutemwa abakonshi bakwe batemwa balupwa babo kulingile ukuba ukwacepako pa kutemwa batemwa Lesa. (Linganyako Mateo 6:24.) Mu kumfwana no ko kumfwikisha, Baibolo isoso kuti Yakobo ‘apatile’ Lea kabili atemenwe Rakele, icapilibwile fyo ukutemwa atemenweko Lea takwalingene na kuntu atemenweko nkashi inankwe, Rakele. (Ukutendeka 29:30-32) Nelyo fye “mweo” wesu wine, Yesu atile ulingile ukupatwa, nelyo ukuutemwa panono lintu twalinganya na fintu twatemwa Yehova!
5. Ni shani fintu Satana mu bucenjeshi ashukila ukutantika kwa lupwa?
5 Pamo nga Kabumba kabili Kapeela wa bumi, Yehova awaminwa ukuipeelesha kwakumanina ukufuma ku babomfi bakwe bonse. (Ukusokolola 4:11) “[Mfukama] kuli Shifwe,” e fyalembele umutumwa Paulo, “kuli uyo indupwa shonse mu muulu na pano nse shiinikwako amashina.” (Abena Efese 3:14, 15) Yehova abumbile ukutantika kwa lupwa mu nshila yawamisha ica kuti ifilundwa fya lupwa bengaba ne citemwishi ca cifyalilwa kuli umo no munankwe. (1 Ishamfumu 3:25, 26; 1 Abena Tesalonika 2:7) Satana Kaseebanya, nangu cibe fyo, mu bucenjeshi ashukila ici citemwishi ca cifyalilwa ica mu lupwa, ico cisanshako ukufwaisha kwa kutemuna abatemwikwa. Alaluminisha ukulwisha kwa ba lupwa, kabili abengi balacisanga icakosa ukwiminina abashangila ku lubali lwa cine ca mu Baibolo lintu balolenkana no ku kulwisha.—Ukusokolola 12:9, 12.
Ukulolenkana no Bwafya
6, 7. (a) Ni shani fintu balupwa bengafwiwa ukutesekesha ukukatama kwe sambililo lya Baibolo no kubishanya na Bena Kristu? (b) Ni shani fintu twingalangisha ukuti twalitemwa balupwa besu mu cine cine?
6 Ukacita shani nga ca kuti wapatikishiwa ukusalapo pa kati ka kutemuna Lesa nelyo ukutemuna balupwa? Bushe ukaiwaminisha auti Lesa te kuti atwenekele ukusambilila Icebo cakwe no kubomfya ifishinte fya ciko nga ca kuti ukucite fyo kuleleta ukukangana mu lupwa? Lelo tala tontonkanya. Nga ca kuti wanenuka no kuleka isambililo lyobe ilya Baibolo nelyo ukubishanya ne Nte sha kwa Yehova, ni shani fintu abatemwikwa bobe bakafwiwa ukumfwikisha ukuti ukwishiba kwalungikwa ukwa Baibolo mulandu wa bumi nelyo imfwa?—Yohane 17:3; 2 Abena Tesalonika 1:6-8.
7 Napamo kuti twalangilila uyu mulandu muli iyi nshila: Napamo umo mu lupwa lobe alafwaisha ifya kunwa fikola. Bushe ukusuulako nelyo ukutekelesha impika yakwe iya kunwensha kuti kwaba bunonshi bwa cine cine kuli wene? Bushe kuti cawama ukusungilila umutende ukupitila mu kunenuka no kukanacitapo icili conse pa lwa mpika yakwe? Iyo, napamo ulesuminishe fyo kuti cawamisha ukwesha ukumwaafwa ukucimfya impika yakwe iya kunwensha, nelyo fye nga cilepilibula ukulolenkana ne cifukushi cakwe ne fintiinya. (Amapinda 29:25) Mu kupalako, nga ca kuti mu cine cine walitemwa balupwa lobe, tawakafwaye ukubombesha kwabo ukwa kukulesha ukusambilila Baibolo kukakunenune. (Imilimo 5:29) Ni pa kwiminina fye uwashangila e lintu wingabaafwa ukutesekesha ukuti ukwikalilila ku fisambilisho fya kwa Yesu e bumi bobe.
8. Tunonkelamo shani mu cishinka ca kuti Yesu alicitile ukufwaya kwa kwa Lesa mu busumino?
8 Ukuleka Lesa ukwisa intanshi kuti caba icakosa inshita shimo shimo. Lelo ibukisha, Satana na o alengele Yesu ukucisanga icakosa ukucita ukufwaya kwa kwa Lesa. Nalyo line, Yesu tanenwike; alishipikishe fye no kulungulusha kwa cimuti ca kucushiwilwapo pa mulandu wesu. “Yesu Kristu [e Mupusushi] wesu,” e fisosa Baibolo. ‘Alitufwilile.’ (Tito 3:6; 1 Abena Tesalonika 5:10) Bushe tatuli aba kutasha pa kuti Yesu tanenwike ilyo balemulwisha? Pa mulandu wa kuti alishipikishe imfwa ya bulilambo, twalikwata icilolelo ca mweo wa muyayaya mu calo cipya ica mutende icabamo bulungami ukupitila mu kubelesha icitetekelo mu mulopa wakwe uwasuumiwa.—Yohane 3:16, 36; Ukusokolola 21:3, 4.
Icilambu Cafumba Icingabako
9. (a) Ni shani fintu Abena Kristu bengakanamo mu kupususha bambi? (b) Imibele mu lupwa lwa kwa Timote yali shani?
9 Bushe walishiba ukuti na iwe wine kuti wayakanamo mu kupususha bambi, ukusanshako balupwa abo watemwisha? Umutumwa Paulo acincishe Timote ukuti: “Ikalilila muli ifi fintu [ifyo wasambilishiwa]; pantu pa kucite fyo, ukaipususha we mwine na ’balekuumfwa.” (1 Timote 4:16) Timote aleikala mu ŋanda yayakanikana, wishi umuHela aali uushasumina. (Imilimo 16:1; 2 Timote 1:5; 3:14) Nangu ca kuti tatwaishiba nampo nga wishi kwa Timote alishileba uwasumina pa numa, icishinka ca kuti napamo alishileba uwasumina cakoshiwa ku myendele isuma iya mukashi wakwe Yunike, ne ya kwa Timote.
10. Cinshi Abena Kristu bengacitilako abena myabo abashasumina?
10 Amalembo yasokolola ukuti abalume na bakashi abo mu kushangila abasumbula icine ca Baibolo kuti basangwilako ku kupususha abena myabo abashili Bena Kristu ukupitila mu kubaafwa ukusanguka abasumina. Umutumwa Paulo alembele ati: “Ngo wa bwananyina ali no mukashi uushatetekela, kabili umukashi asumino kwikala nankwe, emuleka. Kabili umwanakashi uuli no mulume uushatetekela, no mulume asumina ukwikala nankwe, te ’ti alekane no mulume wakwe. Pantu waishiba shani, we mwanakashi, nalimo ukapususho mulume obe? napamo, we mwaume, waishiba shani nalimo ukapususho mukashi obe?” (1 Abena Korinti 7:12, 13, 16) Umutumwa Petro alondolwele ifyo abakashi, mu cishinka, bengapususha abalume babo, ukucincisho kuti: “Petameni ku balume benu, ukuti na ’bakaano kuumfwa ku cebo bakolopekwe ukwabule cebo pa mulandu wa mibele ya bakashi babo.”—1 Petro 3:1.
11, 12. (a) Cilambu nshi ico amakana ya Bena Kristu bapokelela, kabili cinshi bacitile pa kucipokelela? (b) Shimika ica kukumanya ica cilundwa ca lupwa icalambwilwe pa mulandu wa kushipikisha kwa busumino.
11 Mu myaka ya nomba line amakana ayengi balisanguke Nte sha kwa Yehova pa numa ya myeshi nelyo fye imyaka iingi iya kulwisha imibombele ya balupwa babo Inte. We cilambu cintu ici ciba ku Bena Kristu abatwalilila abashangila, kabili mwandi lipaalo kuli abo abaali pa kashita kamo abalwisha! Mu kuba ne milandile yabamo inkuntu, eluda wa Bwina Kristu uwa myaka ya bukulu 74 ashimike ukuti: “Lyonse ndatasha umukashi wandi na bana pa kukakatila ku cine mu myaka iyo nalebalwisha.” Asoso kuti pa myaka itatu mu bumankonso alikeene nelyo fye ukusuminisha umukashi wakwe ukulanda na wene pa lwa Baibolo. “Lelo alincenjelele no kusala akashita naali no kukutika,” e fintu asosa, “kabili atendeke ukucitilo bunte kuli ine ilyo alefikina amakasa yandi. Fintu ndi uwa kutasha pa kuti tanenwike pa mulandu wa kulwisha kwandi!”
12 Umulume na umbi uwalelwisha ulupwa lwakwe alembele ukuti: ‘Nali umulwani wabipisha uwa mukashi wandi pantu pa numa apokelele icine, nalemutiinya, kabili cila bushiku twaleumana; e kuti, lyonse nine nalesonkomona. Lelo naleicusha fye; umukashi wandi akakatile kuli Baibolo. Imyaka 12 yalipitile ifyo fine na ine ndi fye mu bulwi bwalaluka ukulwisha icine no mukashi wandi no mwana. Kuli bonse babili, nali nga Kaseebanya mu buntu.’ Mu kupelako uyu mwaume atendeke ukupimununa ubumi bwakwe. ‘Naishilemona ifyo nali uwakalipisha,’ e fintu alondolola. ‘Nabelengele Baibolo, kabili pa mulandu wa kufunda kwa iko, nomba ndi Nte yabatishiwa.’ Tontonkanya pa lwa cilambu cikalamba ica mukashi, ee, ica kwafwaako ‘kupususha umulume wakwe’ ukupitila mu kushipikisha mu busumino ukulwisha kwa mulume pa myaka 12!
Ukusambilila Kuli Yesu
13. (a) Lisambililo nshi ilikalamba ilyo abalume na bakashi balingile ukusambililako ku nshila ya bumi iya kwa Yesu? (b) Ni shani fintu abantu abacisanga icayafya ukunakila ku kufwaya kwa kwa Lesa benganonkelamo mu ca kumwenako ca kwa Yesu?
13 Isambililo likalamba ilyo abalume na bakashi balingile ukusambilila ku nshila ya bumi iya kwa Yesu lyaba cumfwila kuli Lesa. “[Ncita] ukufwaya kwa wantumine,” e fintu Yesu asosele. “Nshifwaya kufwaya kwandi, lelo ukufwaya kwa wantumine.” (Yohane 5:30; 8:29) Nelyo fye ni lintu Yesu asangile ulubali lumo ulwa kufwaya kwa kwa Lesa ukuba ulwa makankamike, ali uwanakila. “Nga mwafwaya, fumyeni pali ine ulukombo ulu,” e fintu apepele. Lelo alundileko mu kwangufyanya ukuti: “Lelo te kufwaya kwandi, kano kwenu, e ko kucitwe.” (Luka 22:42) Yesu talombele Lesa ukwalula ukufwaya Kwakwe; alangishe ukuti mu cine cine alitemenwe Lesa ukupitila mu kuinashisha mu cumfwila ku cili conse icali e kufwaya kwa kwa Lesa kuli wene. (1 Yohane 5:3) Ukutangisha Lesa pa ntanshi lyonse, nga fintu Yesu acitile, caliba icakatama nga nshi nga tuli no kutunguluka te mu bumi fye bwa bushimbe lelo na mu bumi bwa mu cupo no bwa mu lupwa. Languluka umulandu cabele fyo.
14. Ni shani fintu Abena Kristu bamo bashipelulula bwino?
14 Nga fintu tumwene kale, lintu abasumina batangisha Lesa intanshi, bafwaya ukutwalilila ukwikala na banabo ba mu cupo abashasumina kabili ilingi line balabaafwa ukuti bengafikapo ukuba bakapusunsuka. Nelyo fye ni lintu abaupana bonse babili baba abasumina, icupo cabo napamo te kuti cibe icisuma nangu panono. Pa mulandu wa kukongama kwa lubembu, abalume na bakashi te lyonse bakwata amatontonkanyo ya kutemwa ukulola kuli umo no munankwe. (Abena Roma 7:19, 20; 1 Abena Korinti 7:28) Bamo bafika fye no kwalepa ukufwaya ukupana na umbi, nangula ca kuti tapali ifishinte fya mu Malembo ifya kulekaninapo. (Mateo 19:9; AbaHebere 13:4) Bapelulula ukuti ici e cingabawamina, ukuti ukufwaya kwa kwa Lesa ukwa kuti abalume na bakashi bekalilile capamo kwena kwalikosesha. (Malaki 2:16; Mateo 19:5, 6) Ukwabulo kutwishika pano na po e paba ukutontonkanya amatontonkanyo ya buntunse mu cifulo ca kutontonkanya aya kwa Lesa.
15. Mulandu nshi ukubika Lesa intanshi kwabela bucingo?
15 Mwandi ukubika Lesa intanshi bwaba bucingo! Abaupana abacite fyo balesha ukwikalilila capamo no kupikulula impika shabo ukupitila mu kubomfya ukufunda kwa Cebo ca kwa Lesa. Muli ifyo balasengauka ifya kukalifya umutima ifyalekanalekana ififumamo nga ca kuti ukufwaya kwakwe kwasuulwa. (Ilumbo 19:7-11) Ici calangililwa ku baupana abacaice abo, lintu baali pa nembenembe fye ya kulekana, bapingwilepo ukukonka ukufunda kwa mu Baibolo. Imyaka imo pa numa lintu umukashi atontonkenye pa lwa buseko aba na bo mu cupo cakwe, atile: “Ndekala pa nshi no kulila lintu nalanguluka ukuti nga nalilekene no mulume iyi myaka yonse iyapitapo. Lyena ndapepa kuli Yehova Lesa no kumutasha pa kufunda kwakwe no butungulushi ubo bwatubweseshe pamo mu kwampana kwa nsansa ngo ku.”
Mwe Balume, Mwe Bakashi—Pashanyeni Kristu!
16. Ca kumwenapo nshi Yesu aimikile abalume na bakashi?
16 Yesu, uyo lyonse uwabikile Lesa intanshi, aimikile abalume na bakashi ica kumwenapo cawamisha, kabili kuti bacita bwino ukwangwako kuli cene. Abalume bacincishiwa ukupashanya inshila Yesu abombelamo bumutwe bwabondoka pa filundwa fya cilonganino ca Bwina Kristu. (Abena Efese 5:23) Kabili abakashi ba Bwina Kristu kuti basambililako ku ca kumwenapo ca kwa Yesu icabulamo akalema ica kunakila kuli Lesa.—1 Abena Korinti 11:3.
17, 18. Ni mu nshila nshi umo Yesu aimikile abalume ica kumwenapo cishaiwamina?
17 Baibolo ikambisha ukuti: “Mwe balume, temweni abakashi benu, ifyo na Kristu atemenwe ulukuta no kuipeela pa mulandu wa luko.” (Abena Efese 5:25) Inshila yakatama iyo Yesu alangishishemo ifyo atemenwe icilonganino ca bakonshi bakwe yali kupitila mu kuba cibusa wabo uwapalamisha. “Namwita abanandi,” e fintu Yesu asosele, “ico namulenga mwishibe fyonse ifyo naumfwile kuli Tata.” (Yohane 15:15) Tontonkanya pa lwa nshita yonse iyo Yesu apoosele na basambi bakwe—ukulanshanya kwafulisha nga nshi uko alelanshanya na bene—kabili na fintu abacetekele! Bushe ico tacili ca kumwenapo cawamisha ku balume?
18 Yesu alikwete ubuseko bwa cine cine mu basambi bakwe kabili alibakwatile icitemwishi cine cine. (Yohane 13:1) Lintu bashaumfwikishe ifisambilisho fyakwe, mu kutekanya alelubulako inshita pa mbali no kubalondolwela fyumfwike. (Mateo 13:36-43) Mwe balume, bushe ubutuntulu bwa ku mupashi ubwa bakashi benu bwaliba ubwakatama kuli imwe? Bushe mulapoosako inshita na bene, ukushininkisha ukuti bonse babili namukwata icine ca mu Baibolo icaumfwika bwino bwino mu muntontonkanya na mu mutima? Yesu aleya na batumwa bakwe mu butumikishi, napamo ukukansha umo na umo uwa bene. Bushe mulaya na bakashi benu mu butumikishi, ukuya na bo mu bunte bwa ku ŋanda ne ŋanda na mu kutungulula amasambililo ya Baibolo?
19. Ni shani fintu inshila Yesu abombelemo na mabunake ya batumwa bakwe ayalebweluluka libili libili kwaimikile abalume ica kumwenapo?
19 Yesu apayenye ica kumwenako casumbukisha ku balume maka maka mu nshila alebombelamo no kukanapwililika kwa batumwa bakwe. Pa ca kulya ca kulekeleshako na batumwa, alimwene umupashi wa kucimfyanya ulebweluluka. Bushe alibalengulwile mu bukalushi? Iyo, lelo mu kuicefya asambile amakasa ya umo na umo uwa bene. (Marko 9:33-37; 10:35-45; Yohane 13:2-17) Bushe mulalangisha ukutekanya kwa musango yo ku bakashi benu? Ukucila ukuilishanya pa lwa bunake bubweluluka libili libili, bushe mu kutekanya mulesha ukwaafwa umukashi no kumufika pa mutima ukupitila mu ca kumwenako cenu? Abakashi mu kupalishako kuti bayankulako ku cililishi cabamo ukutemwa ica musango yo, nga fintu abatumwa mu kupita kwa nshita bacitile.
20. Cinshi ico abakashi ba Bwina Kristu bashilingile kulaba, kabili ni ani uwapayanishiwa nge ca kumwenapo cabo?
20 Abakashi na bo bene bakabila ukulanguluka Yesu, uushatalile alaba ukuti “umutwe wa kwa Kristu ni Lesa.” Lyonse ainashishe kuli Wishi wa ku muulu. Mu kupalako, abakashi tabalingile ukulaba ukuti “umulume e mutwe wa mukashi,” ee, ukuti umulume wabo e mutwe wabo. (1 Abena Korinti 11:3; Abena Efese 5:23) Umutumwa Petro acincishe abakashi ba Bwina Kristu ukulanguluka ica kumwenapo ca “banakashi ba mushilo” aba mu nshita sha mu kubangilila, ukucilisha ica kwa Sara, “[uwanakiile] Abrahamu, no kumwita Shikulu.”—1 Petro 3:5, 6.
21. Mulandu nshi icupo ca kwa Abrahamu na Sara catungulukile lelo ica kwa Lote no mukashi wakwe calibongolweke?
21 Sara mu kushininkisha ashiile iŋanda ya bwanalale mu musumba wasambala ku kuyaikala mu matenti mu calo ca cilendo. Mulandu nshi? Bushe ni pa mulandu wa kuti alitemenwe ulya musango wa bumi? Tacipalile. Bushe ni pa mulandu wa kuti umulume wakwe amwebele ukuti baye? Ukwabulo kutwishika ici e casangwilileko, apantu Sara alitemenwe Abrahamu kabili alimucindike pa mulandu wa mibele yakwe iya bukapepa. (Ukutendeka 18:12) Lelo umulandu ukalamba ailile no mulume wakwe wali wa kuti alitemenwe Yehova kabili ukufuma pa nshi ya mutima wakwe alefwaya ukukonka ukutungulula kwa kwa Lesa. (Ukutendeka 12:1) Asangile ukubekwa mu kumfwila Lesa. Pa lubali lumbi, muka Lote, alishimbile ukucita ukufwaya kwa kwa Lesa na muli fyo alicebukile ku numa mu kufuluka ifintu fyashele ku numa mu mushi wa ku mwabo uwa Sodomu. (Ukutendeka 19:15, 25, 26; Luka 17:32) We nshila yabamo akayofi iya kupwilamo icupo—pa mulandu fye wa kubulwe cumfwila kuli Lesa!
22. (a) Kuiceeceeta kwa musango nshi ukwingaba ukwa mano ku filundwa fya lupwa? (b) Cinshi tuli no kulangulukapo mwi sambililo lyesu ilikonkelepo?
22 E co pamo ngo mulume nelyo umukashi, cili icacindama ukuipusha we mwine ati, ‘Bushe Lesa e wisa intanshi mu lupwa lwesu? Bushe mu cine cine ndatukuta ukufikilisha ulubali lwa mu lupwa ulo Lesa ampeela? Bushe mu cine cine ndabombesha ku kutemwa umwina myandi no kumwaafwa ukunonka nelyo ukusungilila ukwampana kusuma na Yehova?’ Mu ndupwa ishingi mwaliba na bana. Mu kukonkapo tuli no kulanguluka ulubali lwa bafyashi no kukabila kwabako kuli bonse babili capamo na bana babo ukwa kuleka Lesa ukwisa intanshi.
Bushe Uleibukisha?
◻ Finshi fingaba ifya kufumamo fya fisambilisho fya kwa Yesu mu ndupwa ishingi?
◻ Cilambu nshi ico amakana ya Bena Kristu bashangila bapokelele?
◻ Cinshi cikaafwa abaupana ukusengauka bucisenene no kulekana?
◻ Cinshi ico abalume bengasambililako ku ca kumwenako ca kwa Yesu?
◻ Ni shani fintu abakashi bengasangwilako ku cupo ca nsansa?
[Icikope pe bula 10]
Ni shani fintu Sara asangwilileko ku kutunguluka kwa cupo cakwe?