Ubumi bwa kwa Yesu no Butumikishi

Ukupaasha Kwabalamuka

MU KUBANGILILA icungulo bushiku, Yesu asambilishe sambililo lyawamisha mu mulimo wa pa nshi pa kusamba inkasa sha batumwa bakwe. Pa numa, atendeke Icibukisho ica mfwa yakwe iyalepalamina. Nomba, ukucilisha mu cilolwa ca cakucitika fye, ica kuponako ca kupapa cacitika. Abatumwa bakwe baibimba mu kupaasha kwabipisha pa ulemoneka umukalamba pali bene! Mu kumonekesha, ulu lubali lwa kukansana lwatwalilila.

Ibukisha ukuti pa numa Yesu ayalwike pa lupili, abatumwa bapaashenye pa wali umukalamba pa kati kabo. Mu kulundapo, Yakobo na Yohane baipwishe pa lwa fifulo fyasumbuka mu Bufumu, ukufumamo ukukansana kwalundwako pa kati ka batumwa. Nomba, mu bushiku bwa kulekeleshako na bene, fintu Yesu ayumfwa ubulanda pa kubamona baleumana na kabili! Cinshi acita?

Mu cifulo ca kushimaula abatumwa pa mibele yabo, Yesu na kabili mu kutekanya apelulushanya na bene ukuti: “Ishamfumu sha bena fyalo shaumya bukateka pali bene, na ʼbali no lupaka pali bene betwa Bakaafwa: lelo kuli imwe te ifyo. . . . Pantu uwacilapo ni ani, uukuweme ku kulya, atemwa uulepyungila?” Lyene, ukubebukishako ulwa ca kumwenako cakwe, asoso kuti: “Lelo ine ndi mu kati ka imwe ngo ulepyungila.”

Te mulandu no kukanapwililika kwabo, abatumwa batwalilila na Yesu mu kati ka fya kwesha fyakwe. E co asoso kuti: “Nacite cipingo na imwe, ifyo Tata acite cipingo na ine, ica bufumu.” (NW) Ici cipingo caba pa kati ka kwa Yesu na bakonshi bakwe aba cishinka cibalunda kuli wene ku kwakana ukuteka kwakwe ukwa cifumu. Ni mpendwa fye iyapelela iya ba 144,000 e basendwa mu kupelako muli ici cipingo ca Bufumu.

Nangu cingati abatumwa baseekeshiwa ne ci cilolelo ca kusungusha ica kwakana na Kristu mu kuteka kwa Bufumu, pali ino nshita bali abanaka lwa ku mupashi. “Imwe bonse mulelengwo kuipununa pali ine buno bushiku,” e fyasosa Yesu. Ukweba Petro ukuti Alimupepeeleko, Yesu acincisha ukuti: “Kabili iwe ilyo ukapilibuka, ukoseleshe bamunonko.”

“Mwe twana,” e fyo Yesu alondolola, “ncili na imwe inshita inono. Mukamfwaya; kabili ifyo nasosele ku baYuda, e fyo ndesosa na kuli imwe nomba, nati, uko ine ndeya imwe tamwingesako. Ifunde lipya ndemupeela, lya kuti muletemwana: ifyo namutemenwe, na imwe mutemwane. Muli ici e mo bonse bakeshibilo kuti muli basambi bandi, nga mwaba no kutemwana.”

“Mwe Shikulu, muleya kwi?” e fyo Petro aipusha.

“Uko ndeya, tawingankonka nomba,” e fyo Yesu ayasuka, “lelo ukankonka pa numa.”

“Mwe Shikulu, cinshi ico nshingamukonkela nomba?” Petro alefwaya ukwishiba. “Nkamupooselo mweo wandi.”

“Bushe ukampooselo mweo obe?” e fyo Yesu aipusha. “Ndekwebe cine cine, nati, iwe lelo, buno bushiku, ilyo mukolwe talati alile libili, ulenkaana litatu.”

“Nelyo ndi no kufwila pamo na imwe,” e fyo Petro apaasha, “nshamukaane iyo.” Kabili ilyo abatumwa bambi bailunda mu kusosa cimo cine, Petro aitakisha ukuti: “Nga bonse balengwo kuipununa pali imwe, ine nshakalengwe ukuipununa nakalya”

Ukulosha ku nshita ilyo atumine abatumwa pa lwendo lwa kushimikila ulwa ku Galili ukwabula imbukuli na tumba, Yesu aipusho kuti: “Bushe mwabulilwe cintu?”

“Nakalya” e fyo bayasuka.

“Lelo nomba, uuli ne mbukuli asende, na tumba ifyo fine,” e fyo asosa, “no ushaba na lupanga, apoose ilaya lyakwe no kushita lumo. Pantu ndetila kuli imwe, cili no kufishiwa muli ine icilembo ici, Kabili alingilwe pamo na ’bapulumushi. Pantu icalembelwa ine cili no kufishiwa kwa ciko.”

Yesu alesonta ku nshita ilyo ali no kupopelwa pamo ne ncitatubi, nelyo abapulumushi. Na kabili alelangilila ukuti abakonshi bakwe pa numa bali no kulolenkana no kupakaswa kwabipisha. “Mwe Shikulu, moneni, pano pali impanga shibili,” e fyo basosa.

“Shingi,” e fyo ayasuka. Nga fintu tukamona, pa kukwata impanga bene mu kwangufyanya kukasuminisha Yesu ukusambilisha isambililo na limbi ilyacindama. Mateo 26:31-35; Marko 14:27-31; Luka 22:24-38; Yohane 13:31-38; Ukusokolola 14:1-3.

◆ Mulandu nshi ukupaasha kwa batumwa kubelele fyo ukwa kupapusha?

◆ Ni shani fintu Yesu abomba no kupaasha?

◆ Cinshi capwishishiwa ne cipingo Yesu apanga na basambi bakwe?

◆ Lifunde nshi lipya lintu Yesu apeela, kabili lyacindama shani?

◆ Kuicetekela nshi ukwacishamo uko Petro alangisha, kabili cinshi Yesu asosa?

◆ Mulandu nshi amakambisho ya kwa Yesu pa lwa mbukuli na tumba yapusanina ukufuma kuli ayo apeele mu kubangilila?