Bushe Waliba Uulekelela?

BILL no mwana wakwe umwanakashi uwa myaka ya bukulu 16, Lisa, balikwete ubwafya mu kumfwana. Ukupusana kunono pa kati kabo libili libili kwalelundulukila mu kusasukilana. Mu kupelako, ukukanshika kwalikulile ukufika ku cipimo ca kuti Lisa aebelwe ukufuma pa ŋanda.a

Pa numa ya nshita inono, Lisa aishileishiba ukuti alilubile kabili alombele wishi ukuti amulekelele. Lelo mu cifulo ca kusuulako ifilubo fyapita ifya kwa Lisa, wishi wafulwishiwa alikeene ukubombesha kwakwe konse ukwa kupanga umutende. Elenganya! Taali uwaitemenwa ukutambulula inkumbu ku mwana wakwe uwa kuifyalila!

Imyanda ya myaka iyapitapo umwaume wabulo mulandu asenukilwe ku kufwa pa musoka untu ashacitile. Inte shapeele ubunte bwa bufi, kabili abalashi ba bupolitiki balifutete, ukukanalolesha pa bulungi. Uyo muntu wa kaele aali ni Yesu Kristu. Mu kwipipa pa ntanshi talafwa, alombele Lesa mu kubamo ipepo ukuti: “Tata, mubalekelele; pantu tabeshibe ico balecita.”—Luka 23:34.

Yesu alekelele mu kuitemenwa, ukufuma ku mutima, kabili abakonshi bakwe balicincishiwe ukupashanya wene muli kuno kuloshako. (Abena Efese 4:32) Ukupala Bill, nangu cibe fyo, abengi baba mu kufininina abashaitemenwa ukulekelela. Ni pi wapela muli kuno kuloshako? Bushe waliba uwaitemenwa ukulekelela bambi lintu bakubembukila? Kabili ni shani pa lwa membu shabipisha? Bushe ishi na sho shifwile ukulekelelwa?

Ukulekelela Kwaba Kusonsomba

Ukulekelela takwaba lyonse ukwaanguka. Muli ishi nshita shayafya, ukwampana kwa buntunse kwaba ukwacililako ukubamo impika. Ubumi bwa lupwa ukucilisha ilingi line bulakwatamo ukukanshika no kutitikisha. Umutumwa wa Bwina Kristu Paulo akale alondolwele ukuti imibele ya musango yo ili no kwanana mu “nshiku sha kulekelesha.” Atile: “Abantu bakaba abaitemwa, abatemwe ndalama, aba mataki, aba miiya, . . . bakaba abashatemwa busuma, bashikamfutu, bacintalika, abatuumikwa.”—2 Timote 3:1-4.

Mu kukanacisengauka, lyene, ifwe bonse twalilolenkana no kutitikisha kwa ku nse uko kwesha amaka yesu aya kulekelela bambi. Ukusansha pali ico, tushomboka na kabili no kutitikisha kwa lwa nkati. Paulo alilishike ukuti: “Icisuma ico mfwaya, nshicicita; lelo icibi ico nshifwaya, e co ncita. Awe nga ncite co nshifwaya, kanshi te ine ncita, lelo lubembu ulwaikala muli ine.” (Abena Roma 7:19, 20) Pamo nge ca kufumamo, ubwingi ubwa ifwe tatwaba aba kulekelela nga fintu twingafwaya ukuba. Na kuba, ukukanapwililika kwapyanwa no lubembu fituninkisha ukusonga kwa maka pali ifwe bonse, inshita shimo shimo ukutupusula inkumbu ukulola ku bantunse banensu.

Lintu akoseleshiwe ukulekelela umuntu umbi pa mulandu unono, umwanakashi umo ayankwileko ukuti: “Takuli nangu umo uwawamina ukubombesha kuntu cisenda ku kulekelela.” Mu lupita ukulandapo kwa musango yo kuti kwamoneka ukwatalalila, ukushingatontoloka, nangu fye ukushingacetekela umuntu. Ukulolesha mu kushikilako, nangu cibe fyo, twamone fyo kwasokolola ukufulunganishiwa uko abantu abengi bomfwa lintu balolenkana ne calo ico bamona ukuba ica kaso, icishisakamana, kabili icinkalwe. Umwaume umo asosele ati: “Abantu balakushukila nga wabalekelela. Ciba kwati kunyantaulwapo.”

Te ca kupapa, lyene, ukuti ukulundulula imibele ya mutima iya kulekelela kwaba ukwayafya muli shino nshiku sha kulekelesha. Nalyo line, Baibolo itukoselesha ukulekelela mu kubamo icikuuku. (Linganyako 2 Abena Korinti 2:7.) Mulandu nshi tulingile ukubela aba kulekelela?

[Futunoti]