Ubumi bwa kwa Yesu no Butumikishi

Ukushikwa Pali Cisano, Inshishi Yabulwamo Akantu pa Mulungu

UKUFIKA ino nshita cili cungulo pali Cisano, kabili Isabata lya pa Nisani 15 lyalatendeka pa kuwa kwa kasuba. Icitumbi ca kwa Yesu nacikobama icabulwa amaka pa cimuti, lelo ifipondo fibili mupepi na wene ficili ifya mweo. Icungulo kasuba pali Cisano caitwa Ubwa kupekanya pantu iyi e nshita lintu abantu bapekanya ifya kulya no kupwishishisha umulimo uuli onse umbi uwe pamfya uyo uushingalolela ukufikila pa numa ye Sabata.

Isabata ilyalatendeka mu kwangufyanya talili fye Isabata lya lyonse (ubushiku bwalenga cinelubali ubwa mulungu) lelo na kabili ilya mbali shibili, nelyo Isabata ‘likalamba.’ Lyaitwa ifi pa mulandu wa kuti Nisani 15, ubuli bushiku bwa kubalilapo ubwa Mutebeto wa nshiku cinelubali uwa Fishatutumuka (kabili lyonse ilyaba Isabata, te mulandu bushiku nshi ubwa mulungu lyaishilapo), liba pa bushiku bumo bwine ukupala Isabata lya lyonse.

Ukulingana ne funde lya kwa Lesa, imibili tailingile ukushiwa iyakobama pa cimuti ubushiku bonse. E co abaYuda baipusha Pilato ukuti imfwa ya abo abaleputunkanishiwa ikwankwanye pa kubafunaula amolu. E ico, ifita, fyafunaula amolu ya fipondo fibili. Lelo apantu Yesu amoneka uwafwa, amolu yakwe tayafunawilwe. Ici cafikilisha ilembo ilitila: “Takafunwepo ifupa.”

Nangu cibe fyo, pa kufumyapo ukutwishika ukuli konse ukwa kuti Yesu mu cituntulu nafwa, umo uwa fita amulasa ifumo mu lubafu. Ifumo lyatula apabela umutima, kabili apo pene umulopa na menshi fyafuma. Umutumwa Yohane, uuli ni nsangwapo, acita lipoti ukuti ici cafikilisha ilembo na limbi ilitila: “Bakalolesha pali uyo balashile.”

Na kabili uulipo pa kuputunkanya ni Yosefe ukufuma ku musumba wa Arimatea, icilundwa ca kushimikwa kusuma ica Cilye Cikalamba. Alikeene ukusuminisha ukwafwilisha incitilo ya lufyengo iya cilye ca pa mulu ukulwisha Yesu. Yosefe mu cituntulu musambi wa kwa Yesu, nangu cingati ali uwa mwenso ukuishibisha umwine nge fyo. Nomba, nangu cibe fyo, ashipa no kuya kuli Pilato ukwipusha umubili wa kwa Yesu. Pilato aita mushika mukalamba, kabili pa numa mushika ashininkisha ukuti Yesu nafwa, Pilato apeele citumbi.

Yosefe abuula umubili no kuupomba mu nsalu ya kolokondwe iyabuuta mu kupekanishisha ukushika. Aafwiwa na Nikodemo, icilundwa na cimbi ica Cilye Cikalamba. Nikodemo na o wine afilwa ukutumbula icitetekelo cakwe muli Yesu pa mulandu wa kutiina ukulufya icifulo cakwe. Lelo nomba aleta umusashi uulimo mupepi na muri wafina amakilogramu 33 na aloe wa mutengo wa pa mulu. Umubili wa kwa Yesu wapombwa mu nsalu ishakwete ifi ifya cena cisuma, ifyo wabo musango wa baYuda uwa kupekanishisha imibili ku kushika.

Umubili lyene wabikwa mu nshishi ipya iya cibukisho iya kwa Yosefe iyo yabela mu kati ka cilibwe mupepi ne bala. Mu kupelako, ilibwe likalamba lyakunkulushiwa ukubikwa pa nshishi. Pa kupwishishisha ukushika pa ntanshi ye Sabata, ukupekanishiwa kwa mubili kwacitwa mu kukwankwanya. E ico, Maria umwina Magadala na Maria nyina wa kwa Yakobo Munono, abo nakalimo baleyafwilisha ukupekanya, baya mu kwangufyanya ku ŋanda ku kupekanya ifya cena cisuma na mafuta yanunkila ifyalundwako. Pa numa ye Sabata, bapekanya ukuwamya kwalundwapo ukwa umubili wa kwa Yesu pa kuubakilila pa ciputulwa ca nshita icalepelako.

Ubushiku bwakonkapo, pa Cibelushi (Isabata), bashimapepo bakalamba na baFarise baya kuli Pilato no kusoso kuti: “Mukwai, twaibukisho kuti ulya kabepa ilyo acili no mweo, atile, Apo papite nshiku shitatu nkabuuka. E ico, ebeni ukwikashe nshishi ukufika pa bushiku bwalenga shitatu, epali abasambi bakwe baisamwiba, no kweba abantu, abati, Nabuuka ku bafwa: no kulufya kwa kupelelekesha kukabipo kucila ukwa kutendeka.”

“Muli na balinshi,” e fyayasuka Pilato. “Kabiyeni, kekasheni umo mwaishibila.” E co baya no kwikashe nshishi pa kukakatikapo icilibwe no kutuma ifita fya bena Roma nga balinshi.

Mu kubangilila kwa pa Mulungu ulucelo Maria umwina Magadala, Maria nyina wa kwa Yakobo, capamo na Salome, Yoana, na banakashi bambi, baleta ifya cena cisuma ku nshishi ku kuwamya umubili wa kwa Yesu. Mu nshila balasoshanya abati: “Ni ani aletukunkulushishapo ilibwe ilili pa mwinshi?” Lelo pa kufika, basanga ukuti icinkukuma nacicitika kabili malaika wa kwa Yehova nakunkulusha ilibwe ukulifumyapo. Abalinshi nabaya, kabili inshishi ili iyabulwamo akantu! Mateo 27:57–28:2; Marko 15:42–16:4; Luka 23:50–24:3, 10; Yohane 19:31–20:1; 19:14; 12:42; Ubwina Lebi 23:5-7; Amalango 21:22, 23; Ilumbo 34:20; Sekaria 12:10.

◆ Mulandu nshi ubushiku bwa pali Cisano bwaitilwa Ubwa kupekanya, kabili cinshi cili Isabata ‘likalamba?’

◆ Malembo nshi yafikilishiwa ukulosha ku mubili wa kwa Yesu?

◆ Cinshi cintu Yosefe na Nikodemo bali no kucita no kushikwa kwa kwa Yesu, kabili kwampana nshi bakwata na Yesu?

◆ Kulomba nshi bashimapepo bacita kuli Pilato, kabili ni shani fintu ayankulako?

◆ Cinshi cacitika pa Mulungu ulucelo?