Palameni Kuli Lesa
Uubusha Abafwa
BUSHE mwalifwilwapo? Nga mwalifwilwapo, ninshi mwalishiba ukuti imfwa e iletela sana umuntu ubulanda. Kabumba wesu alishiba ubulanda mwapitamo, kabili akafumyapo imfwa. Lesa alitweba muli Baibolo abantu abo abuushishe pa kuti twishibe ukutila tapeela fye abantu ubumi lelo alabuusha na bafwa. Natulande pa muntu umo uo Yesu Kristu Umwana wa kwa Lesa abuushishe ku maka ayo Lesa amupeele. Ici cisungusho calembwa pali Luka 7:11-15.
Mu mwaka wa 31 C.E., Yesu aile ku musumba wa Naini uwabelele mu citungu ca Galili. (Icikomo 11) Cimoneka kwati caletwala ku cungulo ilyo bafikile ku nse ya musumba. Baibolo itila: “Ilyo alepalamina ku mpongolo ya musumba, shi moneni! kwali umuntu uwafwa uwaletwalwa ku nse, uwali umwana mwaume umo fye mpo kuli nyina, na o mukamfwilwa. Ne bumba likalamba ilyafumine mu musumba lyali nankwe.” (Icikomo 12) Uyu mukamfwilwa afwile alyumfwile ubulanda sana! Apo uyu mwana wafwile e o akwete fye, kanshi ashele ukwabula uwa kumusakamana no kumucingilila pantu apa ninshi no mulume wakwe alifwa.
Yesu abikile amano kuli mukamfwilwa uwali no bulanda, nalimo uwaleendela fye mupepi no busamba apo basendele icitumbi ca mwana wakwe. Baibolo itila: “Awe Shikulu atile ashimumona fye, amwikatilwe nkumbu, no kutila kuli wene: ‘Leko kulila.’” (Icikomo 13) Yesu alyumfwile sana uluse pa bucushi bwa kwa mukamfwilwa. Yesu na o wine afwile alitontonkenye pali banyina, pantu na bo iyi nshita napamo ninshi balifwilwa, kabili alishibe ukuti na bo bene tapakokole bakamuloosha.
Yesu apaleme ku basendele icitumbi, lelo te kubakonka alefwaya. Atambulwile ukuboko no “kukumya ku busamba” kabili abantu bonse baliminine. Ninshi ne shiwi lyakwe lileumfwika ukuti alikwata amaka ya kubuusha abafwa atile: “‘We mulumendo, Ndekweba nati, Ima!’ No wafwile alimine, atendeka ukulanda, na Yesu amupeele kuli nyina.” (Icikomo 14 na 15) Ilyo uyu mulumendo afwile, umwanakashi ashele ukwabula umwana. Kanshi ilyo Yesu “amupeele kuli nyina,” ulya mukamfwilwa uwali no bulanda sana ukwabula no kutwishika alililile ifilamba fya nsansa pantu umwana wakwe alibuukile.
Bushe na imwe mulafwaya ukumona abantu benu abafwa no kukwata insansa shakweteko mukamfwilwa? Muleibukisha ukuti Lesa alamumfwila ubulanda. Filya Yesu aumfwilile uluse mukamfwilwa calangile ifyo Lesa omfwa uluse nga tulecula pantu Yesu ali nga Wishi. (Yohane 14:9) Baibolo isambilisha ukuti Lesa alebukisha abafwa kabili alafuluka ukubabuusha. (Yobo 14:14, 15) Icebo ca kwa Lesa, Baibolo citupeela isubilo ilisuma sana ilya kutila, kuti twaisaikala umuyayaya mu paradaise pano calo no kusangwako ilyo abantu besu bakabuuka. (Luka 23:43; Yohane 5:28, 29) Ala na imwe tulemukoselesha ukusambilila na fimbi pali Lesa uubusha abafwa no kwishiba ifyo mwingakwata isubilo lya kuti abantu benu bakabuuka!
[Icikope pe bula 23]
“Uwafwile alimine atendeko kulanda, na Yesu amupeele kuli nyina”