Beni Cibusa wa kwa Lesa Umuyayaya!

Pa kuti umuntu abe cibusa wesu kano twakosapo; na pa kuti atwalilile ukuba cibusa wesu tufwile ukukosapo. Mukapaalwa nga nshi pa kukosapo kwenu ukuba cibusa wa kwa Lesa. Yesu aebele abasumine muli wene ukuti: “Icine cikamulenga abantungwa.” (Yohane 8:32) Ni mwi ico calola?

Kuti mwaba abantungwa pali nomba. Kuti mwalubukako ku fisambilisho fya bufi ifyo Satana akubanya. Kuti mwalubukako ku kubulwe subilo nge fyaba abengi abashaishiba Yehova. (Abena Roma 8:22) Ifibusa fya kwa Lesa ‘tafitiina ne mfwa.’—AbaHebere 2:14, 15.

Kuti mwaba abantungwa mu calo cipya ica kwa Lesa. Fintu mwingaba no buntungwa bwine bwine ku ntanshi! Abantu mu Paradise pe sonde bakalubulwa ku nkondo, ukulwala na bumpulamafunde. Bakalubuka ku bupiina ne nsala. Bakalubuka ku kukota ne mfwa. Bakalubuka ku mwenso, ulumanimani no lufyengo. Baibolo ilanda pa lwa kwa Lesa ukuti: “Ni mwe mufumbatule minwe yenu, no kwikusha conse ica mweo ifyo cilefwaya.”—Amalumbo 145:16.

Ifibusa fya kwa Lesa fikekala umuyayaya. Ica bupe cawamisha ico Lesa akapeela bonse abafwaya ukuba ifibusa fyakwe caba mweo wa muyayaya. (Abena Roma 6:23) Taleni tontonkanyeni fintu cikawama ukwikala umuyayaya!

Mukakwata inshita ya kucita ifintu ifingi. Napamo mulafwaya ukusambilila ukulisha icilimba. Nelyo mulafwaya ukusambilila ukulenga ifikope nelyo ukuba kabasa. Napamo mulafwaya ukusambilila pa lwa finama nelyo ifimenwa. Nelyo kuti mulafwaya ukutandala no kumona ifyalo fyalekanalekana na bantu. Ukwikala umweo wa muyayaya kukalenga ukuti mukacite fyonse ifi!

Mukakwata inshita ya kupanga ifibusa ifingi. Ukwikala umuyayaya kukalenga mukeshibe na bambi abengi ababa ifibusa fya kwa Lesa. Mukeshiba ifintu balamukamo ne mibele yabo iisuma, kabili na bo bakaba ifibusa fyenu. Mukabatemwa, na bo bakamutemwa. (1 Abena Korinti 13:8) Ukwikala umuyayaya kukalenga mukakwate nshita ya kupanga bonse pe sonde ifibusa fyenu! Kabili ne cacindamisha, ilyo imyaka ikalapita, bucibusa bwenu na Yehova bukalakoselako. Shi namube cibusa wa kwa Lesa umuyayaya!