Isubilo Lyawamisha!
“Onse uuli no mweo kabili antetekela, takafwe umuyayaya.”—YOHANE 11:26.
1. Amamilioni ya bafwa bakabuukila mu bwikashi bwa musango nshi?
LINTU amamilioni ya bantu bakabuuka, tabakabwelele pe sonde ilyabulapo akantu. (Imilimo 24:15) Bakabuukila mu bwikashi bwawaminako kabili bakasange fyo umwa kwikala, ifya kufwala, ne fya kulya ifingi nafipekanishiwa. Ni bani bakateyanye fi fyonse? Ukwabulo kutwishika kukabako abantu abakabako abomi mu calo cipya ilyo ukubuuka kwa pe sonde kushilatendeka. Nomba ni bani abo bene?
2-4. Lisubilo nshi ilishaiwamina ililepembelela abo bali aba mweo mu “nshiku sha kulekelesha”?
2 Ukufikilishiwa kwa busesemo bwa Baibolo kulango kuti tuleikala mu “nshiku sha kulekelesha” isha ino micitile ya fintu.a (2 Timote 3:1) Mu kwangufyanya fye, Yehova Lesa ali no kucilima mu milandu ya bantu no kufumya ububifi pano isonde. (Ilumbo 37:10, 11; Amapinda 2:21, 22) Bushe pali iyo nshita, cinshi cikacitika kuli abo balebombela Lesa mu busumino?
3 Yehova takonawile abalungami kumo na babifi. (Ilumbo 145:20) Tatala acitapo icintu ca musango yo, kabili takacite fyo lintu akawamye sonde ukufumyapo ububi. (Linganyeniko Ukutendeka 18:22, 23, 26.) Na kuba, ibuuku lya mu Baibolo ilya kulekelesha lilanda ulwe “bumba likalamba ilishingapendwa ku muntu nangu umo, abafuma ku luko lonse ne mikowa ne misango ya bantu na bantu na ba ndimi,” balefuma mu “Bucushi bukalamba.” (Ukusokolola 7:9-14) Ee, aba muli cinkupiti mukalamba bakapusunsuka ubucushi bukalamba umukesapwila icalo ca bubifi ica ndakai, kabili bakengila mu calo cipya ica kwa Lesa. Mulya e mo aba cumfwila bakanonkela mu kukumanina mu kupayanya kwa kusungusha ukwa kwa Lesa ukwa kulubula abantu ku lubembu ne mfwa. (Ukusokolola 22:1, 2) Muli fyo, “ibumba likalamba” talyakapite mu mfwa. Mwandi ilyo lisubilo lishaiwamina!
4 Bushe kuti twacetekela ili subilo lya kupapusha? Ukwabula fye no kutwishika! Yesu Kristu umwine alangilile fyo kwali no kubako inshita lintu abantu bakaba no mweo ukwabulo kufwa. Ilyo fye talabuusha cibusa wakwe Lasaro, Yesu aebele Marita ati: “Onse uuli no mweo kabili antetekela, takafwe umuyayaya.”—Yohane 11:26.
Na Imwe Bene Kuti Mwaikala Kuli Pe na Pe
5, 6. Cinshi mulingile ukucita nga mulefwaya ukwikala kuli pe na pe mu Paradise pe sonde?
5 Bushe mulafwayo kwikala kuli pe na pe muli Paradise pano isonde? Bushe mulafuluko kumona abatemwikwa benu na kabili? Kanshi mufwile ukupokelela ukwishiba kwalungikwa ukwa mifwaile ya kwa Lesa. Pa kupepa kuli Lesa, Yesu atile: “Awe uyu e mweo wa muyayaya, ukuti bamwishibe, mwe Lesa wine wine mweka, no yo mwatumine, ni Yesu Kristu.”—Yohane 17:3.
6 Ukufwaya kwa kwa Lesa kwa kuti ‘abantu bonse bakapusuke no kufika ku kwishibe Cine.’ (1 Timote 2:3, 4) Ino e nshita ya kusambilila fintu mwingekala kuli pe na pe muli Paradise pe sonde capamo na bambi amamilioni abo kale kale balecito kufwaya kwa kwa Lesa. Inte sha kwa Yehova bakaba aba nsansa ukumwafwilisha ukusambilililapo na fimbi pa lwa kwa Lesa na fintu afwaya. Mulandu nshi mushingamonanina na bo pa Ng’anda ya Bufumu ipalamine no ko mwikala nelyo ukulembela ku keyala kapalamishe kuli imwe pa mutande uli pe bula likonkelepo?
[Futunoti]
a Moneni Ukwishiba Uko Kutungulula ku Mweo wa Muyayaya, amabula 98-107, icasabankanishiwa na Watchtower Bible and Tract Society of New York, Inc.
[Icikope pe bula 31]
“Ibumba likalamba” talyakapite mu mfwa