Kuti Twacite Milimo Yacilapo
1 Yesu Kristu alibombele imilimo iikalamba nga nshi mu butumikishi bwakwe. Mu cipesha mano aliishishe amakana, aundepe abengi, no kubuusha bamo ukufuma ku bafwa. (Mat. 8:1-17; 14:14-21; Yoh. 11:38-44) Abantu ba muli lulya luko lonse balimwenekeshe imibombele yakwe. Nangu cibe fyo, icungulo bushiku ca kupelako libe talafwa, aebele abakonshi bakwe ukuti: “Uuntetekela, imilimo iyo ine ncita na o akacita, kabili akacite milimo iyacilapo pali iyi.” (Yoh. 14:12) Kuti twacita shani imilimo “iyacilapo”?
2 Pa Kubombela mu Ncende Yakulilako: Imibombele ya kwa Yesu yapelele fye mu Palestine, lelo abasambi bakwe abebele ukuti bali no kube nte “ukufika ku mpela ya pano nse,” ukuya ukutali nga nshi ukucile fyashimikile Yesu. (Imil. 1:8) Umulimo wa kushimikila uo atendeke nomba waliya mu calo conse, ulebombwa mu fyalo 232. (Mat. 24:14) Bushe mulebombako mu kukumanina ukupwisha icifulo ca kubombelamo ico icilonganino cenu capeelwa?
3 Pa Kuya ku Bantu Bafulilako: Yesu aashile abasambi abanono fye ukuti bakatwalilile ukushimikila. Nangu cibe fyo, pa mulandu wa kuti abasambi bashimikile mu kupimpa pa Pentekoste wa 33 C.E., abalundilweko ukupokelele cine no kubatishiwa bulya bushiku bafikile abantu nalimo 3,000. (Imil. 2:1-11, 37-41) Ukulonganika abasontelwa “ukuya mu mweo wa muyayaya” kwalitwalilila ukufika na lelo, lintu tulebatisha avareji wa bantu 1,000 cila bushiku. (Imil. 13:48) Bushe mulebombesha na maka yonse ukufika ku bafwaisha ukwishibe cine, no kubwelelako bwangu bwangu ku kulundulula ubuseko?
4 Pa Kutwalilila fye Ukulashimikila: Ubutumikishi bwa kwa Yesu pano calo bwali fye bwa pa myaka itatu na hafu. Abengi pali ifwe balishimikila ukucilapo. Te mulandu ne fyo uyu mulimo ukakokola, tulatasha pa musambi umo umo twaafwa ukutendeka ukwenda mu nshila ya ku mweo. (Mat. 7:14) Bushe cila mweshi mulepikintika pe mu mulimo wa kwa Shikulu?—1 Kor. 15:58.
5 Tufwile ukuba abacetekela ukuti apo twaba na Yesu, nga basambi bakwe aba cishinka tukacita na imbi milimo yacilapo.—Mat. 28:19, 20.