Imimwene ya Baibolo

Ni Shani Fintu Umwaka wa 2000 Wacindama?

ABENGI tababikako ubucindami bwa fya mipepele ku mwaka wa 2000 nga fintu abantu aba mu fyalo fya ku Masamba ukubikako fye ne fyalo fimbi baacita. Ku ca kumwenako, abaYuda, abaShilamu, na baHindu balikwata amakalenda yabo ayashapalana na makalenda ya ku Masamba. Abena China bakonka kalenda wa kubalika no kwililwa kwa mweshi mu kupenda inshiku isha fya mipepele ne sha ntambi. E ico, ku mabilioni ya bantu ilelo, nakalimo fye ku cinabwingi ca bantu ba pe sonde, umwaka wa 2000 tawakwato bupilibulo bwaibela.a

Nangu ni fyo, maka maka mu fyalo fya ku Masamba, abengi mu kufwaisho kwishiba balolela ukutendeka ukulepalamina ukwa myaka amakana yatatu nga fintu kalenda tubomfya pali ndakai alangilila. Bamo te kwishiba fye bafwaya. Bamono mwaka wa 2000 ngo kutendeka kwa nkulo ipya, nge nshita ya kwaluka kukalamba mu lyashi lya kale. Abengi abaitunga ukusumina muli Baibolo balampanya ukufikilishiwa kwa masesemo no mwaka wa 2000. Bamo benekela ukuti ifintu ifikalamba ifya ku mupashi fikacitika. Bambi mu mwenso benekelo bonaushi bukalamba—ukupwa kwa calo. Bushe Baibolo yalilandapo pa kwenekela kwa musango yo?

Yehova, Kasunga wa Nshita

Lesa wa mu Baibolo alondololwa nga “Umukote wa nshiku ne nshiku.” (Daniele 7:9) Alasunge nshita mu kulungika, nga fintu cingamonwa mu mibombele ya fingi ifya fibumbwa fyakwe, mu kushinguluka kwa maplaneti na mu kusela kwa maatomu. Alikwata ukutantika kwakwe ukwa nshita uko akonka mu kulungika. Baibolo itila: ‘Alingile inshita sha [nko] ishalingilwe kabela, no kupakule mipaka ya bwikalo bwa shiko.’ (Imilimo 17:26) Yehova ni Kasunga wa nshita uulungika.

Mu kulinganako, Baibolo mu kulungatika ilanda pa lwa kupende nshita. Ipayanya umutande wa lyashi uusuminisha ukupende nshita mu kukonkana ukubwelela ku kutendeka kwa lyashi lya bantunse. Ukupenda kwa musango yo kulangililo kuti 4026 B.C.E. e mwaka Lesa alengele Adamu. Pa numa ya myaka 2,000, Abrahamu alifyelwe. Imyaka 2,000 na imbi yalipitilepo ukufika pa nshita ya kufyalwa kwa kwa Yesu.

Bamo abasambilila ifya kupende nshita mu Baibolo baliipangila amapendo ayasobela ifikacitika ku ntanshi mu nshiku ishapampamikwa. Ku ca kumwenako, ukubomfye fiputulwa fya nshita ifyakonkana ifya butali bwa myaka mupepi na 2,000 ifyalekenye Adamu, Abrahamu, na Yesu, bamo basobelo kuti kukacitika icinjelengwe pa mpela ya ciputulwa ca myaka 2,000 ukutula apo Yesu afyalilwe. Ici ca kumwenako fye cimo ica kupende nshita ukwingi ukutunganishiwa ukuti kwashimpwa pa kupende nshita ukwa mu Baibolo.

Ca cine, Baibolo ilanda pa lwa nshita lintu Yehova Lesa akakalulula imilandu ya bantunse ukupitila mu kufumyapo ububifi no kuletako icalo cipya. Ubusesemo bwa Baibolo bulanda ulwa “nshita ya mpela,” “ukupwa kwa pano isonde,” “inshiku sha kulekelesha,” no “Bushiku bwa kwa Lesa.” (Daniele 8:17; Mateo 24:3; 2 Timote 3:1; 2 Petro 3:12) Nangu cibe fyo, “impela” iyasobelwa mu Baibolo no mwaka wa 2000 tafyayampana nangu panono. Mu Malembo tamwaba nangu cimo icilangililo kuti ukupwa kwa myaka amakana yabili kwalikwato bupilibulo bwaibela nga fintu kalenda wa pali ndakai alangilila.

“Ni Lilali Ifi Fintu Fikabako?”

Abatumwa ba kwa Yesu balefwaisho kwishiba ukutantika kwa kwa Lesa ukwa nshita lintu baipwishe Yesu ukuti: “Twebeni, ni lilali ifi fintu fikabako? Kabili cinshi iciishibilo ca kwisa kwenu, ne ca kupwa kwa pano isonde”? (Mateo 24:3) Mu kupalako, abengi ilelo balafwaisho kwishiba ifya ku ntanshi. Ca cifyalilwa fye ukufwaisha ukwishiba aya masesemo yacindama aya Baibolo na lintu yakafikilishiwa. Nangu cibe fyo, ca mano ukusumina no kucindike mimwene ya kwa Lesa pali uyu mulandu.

Ukupitila mu Mwana wakwe, Yehova alisokolola amapange yakwe kabili alyasuka mu kulungatika pali uyu mulandu. Ilyo Yesu aali talanina ukuya ku muulu, abasambi bakwe bamwipwishe na kabili pa lwa nshita amalayo ya kwa Lesa yakafikilishiwa. Yesu abaaswike ukuti: “Te cenu ukwishibe nshita nangu myaka ifyo Tata abikile mu maka yakwe.” (Imilimo 1:7) Pa kubalilapo, Yesu alyebele abasambi bakwe ati: “Lelo ulwa bushiku bulya na kashita kalya takuli uwaishiba, nangu ni bamalaika ba mu muulu, nangu Mwana, kano Tata.”—Mateo 24:36.

Mu kumfwika, tacaba mu maka ya muntunse “ukwishibe nshita nangu myaka,” maka maka ukulosha ku nshita lintu amasesemo ya Baibolo yakafikilishiwa. Lesa alisalapo ukukanatusokolwela ifyebo fya musango yo. (Mateo 24:22-44) Bushe kuti twayalula imifwaile ya kwa Lesa nga pa lwesu twalongolo “bushiku bulya na kashita kalya,” mu kupusanako na fintu afwaya? Ukwabulo kutwishika, ici te kuti cicitike. (Impendwa 23:19; Abena Roma 11:33, 34) Baibolo ilando kuti: “Amano ayapanda Yehova yaiminina umuyayaya.” (Ilumbo 33:11) Pa kuba Lesa wa maka yonse, lyonse alatunguluka.—Esaya 55:8-11.

Te mulandu no kuti ni Lesa e wasunga ‘ukwishibe nshita ne myaka . . . mu maka yakwe,’ abengi bacili balitemwa ukutunganya. Bamo baliisonta ukuba bakasesema be shamo. Pali uyu mulandu, mu kulungatika umutumwa Paulo afundile Abena Tesalonika pa lwa busanso bwa kukutika kuli abo abatunganya pa lwa nshita. Alembele ukuti: “Tulemupaapaata, mwe bamunyinefwe, mwileka mitima yenu itenshiwe nangu kutentulwa ku wa mupashi wa kusesema, nangu ni ku cebo, nangu ni kuli kalata ngo wafuma kuli ifwe, ukuti nabufiko Bushiku bwa kwa Shikulu. Mwileka muntu amubepe nangu ni ku musango onse.”—2 Abena Tesalonika 2:1-3.

Inte sha kwa Yehova mu kukosa basumino kuti imifwaile ya kwa Lesa pa lwa nshita ya ku ntanshi ukwabulo kutwishika ikafikilishiwa mu nshita iyo aimika, ukulingana no bushiku na kashita ifyo apampamika. (Habakuki 2:3; 2 Petro 3:9, 10) Kabili twasumino kuti inshita naipalama sana lintu ifi fintu fikacitika. (2 Timote 3:1-5) Nangu cibe fyo, tatutunganya nelyo ukutungilila imfundo ishiseekele ilelo.b Mu cine cine, umwaka wa 2000 nangu umwaka wa 2001, nangu ukutendeka kwa nshita imbi iili yonse iyaimikwa na bantunse tafyabamo mu kutantika kwa kwa Yehova ukwa nshita.

[Amafutunoti]