ISAMBILILO 22
Kuti Mwacita Shani pa Kuti Mule-ebako Abantu Imbila Nsuma?
Ilyo mulesambilila icine ca mu Baibo, nalimo kuti mwalatontonkanya ukuti, ‘Abantu bonse fye bafwile ukwishiba ici icine!’ Ca cine abantu bonse bafwile ukucishiba! Na lyo line, nalimo kuti mwalaumfwa umwenso wa kwebako abantu ifyo musambilila. Lekeni tulande pa fingamwafwa ukukanaba no mwenso pa kuti mutendeke ukwebako abantu imbila nsuma iya mu Baibo.
1. Kuti mwacita shani pa kuti mule-ebako abantu abo mwaishiba ifyo musambilila?
Abasambi ba kwa Yesu batile: “Te kuti tuleke ukulanda pa fyo twamona ne fyo twaumfwa.” (Imilimo 4:20) Balitemenwe sana ifyo Yesu abasambilishe ica kuti balefwaya ukwebako abantu bonse ifyo Yesu abasambilishe. Bushe na imwe ifi e fyo mumfwa? Nge fyo mumfwa, mulesala inshila ne nshita iisuma iya kwebako balupwa lwenu ne fibusa pa fyo musambilila.—Belengeni Abena Kolose 4:6.
Inshila shimo isho mwingabomfya pa kutendeka ukwebako abantu imbila nsuma
Ilyo mulelanda na balupwa, kuti mwatendeka ukulanshanya nabo ilyashi lya mu Baibo nga mwalanda fye ukuti: “Kuli ifisuma ifyo nasambilile uno mulungu.”
Kuti mwabelengelako umunenu uulwele nelyo uusakamikwe ilembo lya kumukoselesha.
Nga ca kuti abo mubomba nabo bamwipusha ukubebako ifisuma ifyacitike pa mpela ya mulungu, kuti mwabebako ifyo mwasambilile pe sambililo lya Baibo nelyo ifyo mwasambilile mu kulongana.
Mulelangako abanenu webusaiti ya jw.org.
Muleitako abanenu ukwisasangwapo ilyo mulesambilila Baibo, nelyo kuti mwabalanga ifyo bengacita pa kuti bepushe ukutendeka ukusambilila Baibo pa jw.org.
2. Cinshi cawamina ukulafwaisha ukubila imbila nsuma pamo ne cilonganino?
Abasambi ba kwa Yesu tabalebila fye imbila nsuma ku bantu abo baishibe. Yesu “abatumine babili babili, pa kuti bamutangilile mu misumba yonse” mu kubila imbila nsuma. (Luka 10:1) Filya abateyenye bwino ukuya mu kubila imbila nsuma, fyalilengele abantu abengi bakwata ishuko lya kukutika imbila nsuma. Na kabili ukubila imbila nsuma capamo kwalilengele abasambi balasekelela. (Luka 10:17) Bushe na imwe te kuti mutemwe ukulabila imbila nsuma pamo ne cilonganino?
SAMBILILENI NA FIMBI
Sambilileni ifyo mwingacita pa kuti mwilaba no mwenso ilyo mulebila imbila nsuma, kabili moneni ifyo mukaba ne nsansa nga mulebombako uyu mulimo.
3. Yehova akulaba na imwe
Bamo abafwaya ukubila imbila nsuma nalimo kuti baba no mwenso pa mulandu wa fyo abantu bengalanda nelyo ifyo bengacita.
Bushe mulomfwa umwenso ukwebako abantu ifyo musambilila? Cinshi calenga?
Tambeni VIDIO, lyena lanshanyeni icipusho cakonkapo.
Bushe ba Nte bacaice abaciba muli vidio bacitile shani pa kuti baleke ukuba no mwenso?
Belengeni Esaya 41:10, lyena lanshanyeni ici cipusho:
Mulandu nshi mulingile ukupepela nga muleumfwa umwenso wa kubila imbila nsuma?
Bushe mwalishiba ici cishinka?
Inte sha kwa Yehova abengi balemona kwati te kuti bashipe ukwebako abantu imbila nsuma. Ku ca kumwenako, ba Sergey tabaicetekele kabili calebakosela ukulanda na bantu. Lelo balisambilile Baibo. Batile: “Nangu ca kuti nali no mwenso, nalitendeke ukwebako abantu ifyo nalesambilila. Ico natemenwe ca kuti ukwebako abantu ifyaba mu Baibo kwalengele natendeka ukuicetekela. Na kabili ukulaebako abantu bambi ifyo nalesambilila kwalikoseshe icitetekelo candi.”
4. Mulecindika abo mulelanda nabo
Ilyo mulebila imbila nsuma, mwilatontonkanya fye pa fyebo mwalalanda, lelo muletontonkanya na pa nshila mwalafilandilamo. Belengeni 2 Timote 2:24 na 1 Petro 3:15, lyena lanshanyeni aya mepusho:
Kuti mwabomfya shani ifyaba pali aya malembo ilyo mulelanshanya na bantu pa fyaba mu Baibo?
Balupwa lwenu bamo nelyo ifibusa fyenu nalimo te kuti basumine ifyo mulebeba. Kuti mwacita shani? Finshi mushifwile ukucita?
Cinshi cingawamina ukulaipushisha abantu amepusho mu mucenjelo ukucila ukubapatikisha ukusumina ifyo mulelanda?
5. Ukubila imbila nsuma kulalenga tuleba ne nsansa
Yehova alipeele Yesu umulimo wa kubila imbila nsuma. Bushe Yesu alemona shani uyu mulimo? Belengeni Yohane 4:34, lyena lanshanyeni aya mepusho:
Ukulya ifya kulya ifisuma kulalenga tuletwalilila ukuba abomi no kuba ne nsansa. Cinshi Yesu alinganishishe ukucita ukufwaya kwa kwa Lesa, ukubikako fye no kwebako abantu imbila nsuma, ku kulya ifya kulya?
Busuma nshi bwaba mu kwebako abantu imbila nsuma?
Ifingamwafwa
Ilyo muli pa kulongana kwa mu kati ka mulungu, mulesambililako inshila ishalekanalekana isho mwingatendekelamo ukulanshanya na bantu.
Kuti mwalanda na bamusambilisha pa kuti mukatendeke ukulandako amalyashi mu kulongana kwa mu kati ka mulungu. Amalyashi ya basambi kuti yamwafwa ukuipekanya ukwebako abantu ifyo mulesambilila.
Pa kupituluka mu fyo mwingasuka amepusho yamo ayo abantu bepusha, kuti mwabomfya ifyebo fiba apatila “Abantu Bamo Batila” nelyo “Bamo Kuti Baipusha Abati” ifyaba muli cino cine citabo.
BAMO KUTI BAIPUSHA ABATI: “Kale namumwenepo, bushe ifintu fili shani?”
Kuti mwabomfya shani iyo inshita ukwebako umuntu ifyo musambilile mu Baibo?
IFYO MUSAMBILILE
Ukwebako abantu imbila nsuma kulalenga twaba ne nsansa, kabili nga mwatendeka mukamona ukuti takwa-afya.
Ukupitulukamo
Cinshi mulingile ukulaebelako abantu imbila nsuma?
Kuti mwacita shani pa kuti mulanshanye na bantu ukwabula ukubakalifya?
Kuti mwacita shani pa kuti muleke ukuba no mwenso wa kubila imbila nsuma?
ISHIBILENIPO NA FIMBI
Moneni inshila 4 isha-anguka isho mwingabomfya pa kwebako abantu imbila nsuma ukubomfya kardi apaba webusaiti ya jw.org.
Moneni imibele 4 iingamwafwa ukulabila bwino imbila nsuma.
“Bushe Namuipekanya Ukuba Umulondo wa Bantu?” (Ulupungu lwa kwa Kalinda, September 2020)
Moneni ifyo ilyashi lya muntu umo uo balandapo mu Baibo lingalenga twaba abashipa ukubila imbila nsuma, nangu ca kuti tuli baice.
Moneni ifyo mwingacita pa kulanshanya ifyaba mu Baibo na balupwa abashili ba Nte.
“Ifyo Mwingafika pa Mitima ya Balupwa Abashili ba Nte” (Ulupungu lwa kwa Kalinda, March 15, 2014)