Palameni Kuli Lesa
“Taaba Kutali Kuli Ifwe Umo Umo”
ABANTU balicepesha nga nshi nga kubalinganya ku muulu ne sonde. Nalimo mulatontonkanyapo amuti, ‘Bushe kwena abantu kuti bapalama kuli Lesa wa maka yonse?’ Kuti twamupalama nga ca kuti Lesa umwine uwakwate shina lya kuti Yehova, alefwaya ukuti tumupalame. Nomba bushe alafwaya ukuti tumupalame? Icasuko icingatusansamusha cisangwa mu fyo umutumwa Paulo aebele abantu basambilile nga nshi abaleikala mu Atena. Amashiwi abebele yaba pa Imilimo 17:24-27. Umfweni ifintu fine ifyo Paulo alandile pali Yehova.
Ica ntanshi, Paulo atile, Lesa ‘alengele pano calo na fyonse ifyabapo.’ (Icikomo 24) Ifyo icalo cayemba ne fintu abikamo ifilenga ubumi bwesu ukuwama, filanga ukuti Lesa alatusakamana kabili ni Kabumba uwatutemwa. (Abena Roma 1:20) Te kuti cilolenamo ukulamona ukuti Lesa ali-italusha ku bantu abumba umwine.
Ica bubili ca kuti, Yehova “e upeela abantu bonse ubumi no mupu na fyonse.” (Icikomo 25) Yehova e ulenga ukuti tutwalilile abomi. (Amalumbo 36:9) Ifintu ifilenga tuleba abomi pamo ngo mwela, amenshi ne fya kulya, fyonse bupe ubwafuma kuli Kabumba wesu. (Yakobo 1:17) Bushe kuti caba fye bwino ukusumina ukuti Lesa wesu, kapekape, kuti aitalusha kuli fwe fibumbwa fyakwe pa kuti twimwishiba no kumupalama?
Ica butatu ca kutila, “ku muntu umo [Lesa] alengele inko shonse isha bantu.” (Icikomo 26) Yehova taaba na kapatulula kabili tasobolola abantu. (Imilimo 10:34) Kanshi te kuti atutaluke. Lesa apangile “umuntu umo,” Adamu, ukwafuma abantu ba nko shonse ne mitundu. Lesa ‘afwaya ukuti abantu ba mitundu yonse bakapusuke.’ (1 Timote 2:4) Kanshi fwe bantu fye bonse kuti twapalama kuli Lesa te mulandu no mushobo, uko twikala nelyo uko twatuntuka.
Mu kulekelesha, Paulo atweba amashiwi ya kukoselesha aya kuti, Yehova “taba kutali kuli ifwe umo umo.” (Icikomo 27) Nangu cingati Yehova ni katebebe, umuntu onse uumufwaya no mutima onse, kuti amupalama. Icebo cakwe citweba ukuti, Yehova taba kutali lelo aba “mupepi kuli bonse abalilila kuli wene.”—Amalumbo 145:18.
Ifyo Paulo alandile fyatulanga fye apabuuta ukuti Lesa alafwaya ukuti tumupalame. Lelo Paulo alondolwele ukuti, kamo fye ‘tulemufwaya no kumupampanta’ e lyo twingamupalama. (Icikomo 27) Ulupapulo lwa bakapilibula ba Baibolo lutila, ‘amashiwi yonse yabili, ilya kufwaya no kupampanta yalanga ukuti, umuntu kuti apalama kuli Lesa nga acite ifi fintu fibili.’ Natulangilile: umuntu uuli mu muputule wa ng’anda yakwe umufitile, nga alefwaya apakwashisha amalaiti nelyo apabela icibi, afwile ukupampanta nelyo ukufwaya, lelo ilyo alecite fyo, aleshiba ukuti alepasanga. Kanshi na ifwe nga ca kuti tulefwaya Lesa no kumupampanta no mutima onse, akapalama kuli ifwe. Paulo atweba ukuti ‘tukamusanga icine cine.’—Icikomo 27.
Bushe mulafwaisha ukupalama kuli Lesa? Nga ca kuti ‘tulefwaya Lesa’ no “kumupampanta” mu citetekelo, takatutaluke. Yehova tayafya kumusanga pantu “taaba kutali kuli ifwe umo umo.”