“Ukufuma ku Ŋanda ne Ŋanda”

“UBUSHIKU no bushiku mwi tempele no kufuma ku ŋanda ne ŋanda batwalilile ukwabulo kuleka ukusambilisha no kubilisha imbila nsuma pa lwa kwa Kristu, Yesu.” (Imilimo 5:42, NW) Inte sha kwa Yehova ilingi line babomfya ili lembo ne lya pa Imilimo 20:20 ku kushininkisha icishinte ca mu Malembo ica mulimo wabo uwa kushimikila kwa ku mwinshi no mwinshi. Mu Germany, nangu cibe fyo, bakalengulula bamo aba Nte sha kwa Yehova balisonsomba inshila intu New World Translation ipilibwilamo ifi fikomo, ukutunga ukuti imininako bubi bubi iciGreek ca kutendekelako.

Bushe ukutunga kwa musango uyo kutuntulu? Nakalya. Ku cintu cimo, mu kucefyako amabupilibulo yambi aya Baibolo aya ciGerman yapilibula ifi fikomo mu kupalako. Pa kati ka yene paba Zürcher Bibel yapitulukwamo ne “Fipingo Fipya” kuli Rupert Storr, Franz Sigge, na Jakob Schäfer (iyapitulukwamo na N. Adler). Ukulembwa ukwingi ukwa ciNgeleshi kulasuminisha.

Uwasambilila umwina Germany Hans Bruns alungamika ukupilibula kwakwe, “ukufuma ku ŋanda ne ŋanda,” pa Imilimo 5:42, ukusoso kuti: “Ukulingana ne lembo lya kutendekelako, cimoneka kwati baile ukufuma ku ŋanda ne ŋanda.” Ee, katʼ oiʹkon, inumbwilo ya kutendekelako muli ili lembo, taibomfiwa mu mano ya kulondolola verb (“pa ŋanda”) lelo mu mano ya kwananya, mu kukonke shiwi ukupilibula “ukulingana ne ŋanda.” (Umusango wa kufusha, katʼ oiʹkous, ukupilibula “ukulingana na mayanda,” usangwa pa Imilimo 20:20.) Abasambilila bambi, pamo nga Heinz Schürmann, bafwilisha ukupilibula kwa kwananya ukwa ishi numbwilo. Horst Balz na Gerhard Schneider, bakasabankanya ba dikishonari ya bulondoloshi bwa Icipingo Cipya, basosa ukuti iyi numbwilo kuti yapilibulwa “iŋanda pa numa ya ŋanda.” Ifitabo fya kuloshako ifyafulilako ifya ciNgeleshi filondolola ici cikomo mu kupalako.

Na kabili, lyene, New World Translation yalolenkana no kushipa no kusansa kwa bakalengulula. Icacilapo kucindama, cili icaumfwika ukuti kuliko icishinte cakosa ica mu Baibolo ica butumikishi bwa ku ŋanda ne ŋanda. (Linganyeniko Mateo 10:11-14; 24:14.) Inte sha kwa Yehova balikwata ishuko lya kupashanya abanabo aba mu mwanda wa myaka wa kubalilapo muli uku kuloshako.