Bakangalila na Babomfi Batumikila Basontwa Kuli Lesa
“Muleyangwa mwe bene no mukuni onse uo Umupashi wa mushilo wamubikileko bucilolo.”—IMILIMO 20:28.
1, 2. Bushe Esaya 60:22 ilefishiwapo shani ilelo?
KALE sana Yehova asobele ukuti mu nshita ya ku mpela icintu ca kusungusha cali no kucitika. Alandile muli kasesema Esaya ati: “Umunono akabe kana limo, uwacepa akabo luko lwakosa, Ine Yehova ne wasose ci, mu nshita ya ciko nkacilengo kukalakasha.”—Esaya 60:22.
2 Bushe kwaliba ubushinino bwa kuti uku kusesema kulefishiwapo ilelo? Ee, cine cine! Muli ba 1870, icilonganino cimo ica Nte sha kwa Yehova calipangilwe mu Allegheny, Pennsylvania, ku United States of America. Ukufuma muli aka kalibumba kanono, ifilonganino ifingi nga nshi fyalimikwa mwi sonde lyonse kabili filelunduluka. Iminshipendwa ya babilisha Ubufumu e kuti uluko lwakosa nomba balebishanya ne filonganino ukucila pali 91,000 mu fyalo ukucila pali 235. Ukwabula no kutwishika, ici cishininkisha ukuti Yehova alekalakasha ukulongana kwa bakapepa ba cine ilyo “ubucushi bukalamba” bushilatendeka, ubo bupaleme nga nshi.—Mateo 24:21; Ukusokolola 7:9-14.
3. Ukubatishiwa ‘mwi shina lya kwa Tata, ilya Mwana, ne lya mupashi wa mushilo’ kwalola mwi?
3 Pa numa ya kuipeela kuli Yehova, kabili mu kumfwana ne fipope fya kwa Yesu, iyi minshipendwa babatishiwe “mwi shina lya kwa Tata ne lya Mwana ne lya Mupashi wa mushilo.” (Mateo 28:19) Ukubatishiwa “mwi shina lya kwa Tata” kwalola mu kuti aba bantu baipeela beshiba ukuti Yehova e Shibo wa ku muulu kabili E kapeela wa bumi kabili banakila bumulopwe bwakwe. Ukubatishiwa ‘mwi shina lya Mwana’ kwalola mu kuti balisumina ukuti Yesu Kristu e Kalubula, Intungulushi, kabili Imfumu. Balishiba no kuti umupashi wa kwa Lesa, nelyo amaka, wakwata umulimo wa kubatungulula mu bumi. Ici cilangilila ukuti babatishiwa na ‘mwi shina lya mupashi wa mushilo.’
4. Abatumikishi ba Bwina Kristu basontwa shani?
4 Ilyo babatishiwa, abasambi bapya basontwa ukuba abatumikishi ba kwa Yehova Lesa. Nani abasonta? Amashiwi yalembwa pali 2 Abena Korinti 3:5 na bo yalabakuma. Yatila: “Ukufikapo kwesu [ukuba abatumikishi] kwafuma kuli Lesa.” Ukusontwa kuli Yehova Lesa umwine kucindikwa apakalamba! Pa numa ya kubatishiwa, bakatwalilila ukukula lwa ku mupashi pa kuba abatumikishi ba “mbila nsuma” kulila fye balekonka ubutungulushi bwa mupashi wa kwa Lesa no kutwalilila ukubomfya Icebo cakwe.—Mateo 24:14; Imilimo 9:31.
Basontwa Kuli Lesa Tabasalwa ku Bantu
5. Bushe bakangalila ba Bwina Kristu na babomfi batumikila basontwa ku bantu? Londololeni.
5 Ubwangalishi bwa bakangalila bakosoka kabili abafikapo no bwafwilisho bwa babomfi batumikila filakabilwa ku kusakamana lwa ku mupashi abatumikishi balefulilako. (Abena Filipi 1:1) Aba baume ba bumupashi basontwa shani? Tabasontwa ukubomfya inshila Kristendomu abomfya pa kusonta. Ku ca kumwenako, bakangalila ba Bwina Kristu tabasalwa ku bantu, e kuti, ukuvotelwa ku cinabwingi ca baba muli ico cilonganino. Lelo, basontwa mu nshila ya bulesa. Ici cipilibula nshi?
6. (a) Ukukonka inshila ya bulesa kusanshamo cinshi? (b) Mulandu nshi ukusontwa kwa bakangalila na babomfi batumikila kwabela kwa bulesa?
6 Inte sha kwa Yehova banakila ku kuteka kwakwe kabili babombela pamo mu kucita ukufwaya kwa kwa Lesa. (Amalumbo 143:10; Mateo 6:9, 10) Ukusonta bakangalila ba Bwina Kristu, nelyo baeluda, na babomfi batumikila kwa bulesa pantu umulimo wa kutasha no kusonta aba baume bacetekelwa ucitwa umwabelo kutantika kwa kwa Lesa ukwaba mu Amalembo ya Mushilo. Kabili pa kuba “umutwe kuli bonse,” Yehova alikwata insambu sha kupingula ifyo ukuteyanya kwakwe ukumoneka kufwile ukubomba.—1 Imilandu 29:11; Amalumbo 97:9.
7. Inte sha kwa Yehova shitungululwa shani?
7 Ukupusana ne mipepele iingi mu Kristendomu, Inte sha kwa Yehova tabaisalila ifyo bali no kupepa. Aba Bena Kristu bafumaluka batukuta ukulambatila ku fipimo fya kwa Yehova. Abangalila tabasontwa ku cilonganino ce calici, nelyo bashimapepo. Nga ca kuti aba ku calo balefwaya ukwingila muli uyu mulandu wa kusonta, abantu ba kwa Yehova balakaana ukupulamo mu fipimo fyakwe. Balashangila mu kucita ifyasosele abatumwa ba mu mwanda wa myaka uwa kubalilapo abatile: “Tuli no kunakila Lesa ukucilo kunakila abantu.” (Imilimo 5:29) E co, Inte bainashisha kuli Lesa muli fyonse. (AbaHebere 12:9; Yakobo 4:7) Ukukonka imitantikile ya bulesa kulenga Lesa ukutusenamina.
8. Inshila ya kusala abantu ukupitila mu kuvota yapusana shani ne nshila ya kusonta kwa bulesa?
8 Pa kuba ababomfi ba kwa Kateka Mukalamba Yehova, cisuma ukwishiba ubupusano bwaba pa kusalwa ku bantu no kusontwa kwa bulesa. Inshila ya kusala abantu ukupitila mu kuvota ifwaya ukuti kube impendwa yalingana iya baleimininako kabili ilingi kulaba amakampeni no usalwa ni ulya uukwete amavoti ayengi. Inshila sha musango yu tashibomfiwa mu kusonta kwa bulesa. Tabasontwa ku bantu; nelyo ku kabungwe ka mwi funde. Cimoneka kwati Paulo alelanda pa kusontwa kuli Yesu na Yehova ukuba “umutumwa wa Bena fyalo,” ilyo aebele abena Galatia ukuti tasontelwe “ku bantu, nangu kulashikwa ku muntu kano kuli Yesu Kristu, na Lesa Wishi uwamubuushishe ku bafwa.”—Abena Roma 11:13; Abena Galatia 1:1.
Ukusontwa ku Mupashi wa Mushilo
9. Imilimo 20:28 ilanda shani pa lwa kusontwa kwa bakangalila ba Bwina Kristu?
9 Paulo acinkwileko bakangalila mu Efese ukuti basontelwe kuli Lesa ukupitila mu mupashi wa mushilo. Atile: “E ico muleyangwa mwe bene no mukuni onse uo Umupashi wa mushilo wamubikileko bucilolo; akucemeni ulukuta lwa kwa Shikulu ulo anonkeele mu mulopa wakwe wine.” (Imilimo 20:28) Abo bakangalila ba Bwina Kristu balekabila ukutwalilila ukutungululwa no mupashi ilyo balebomba imilimo ya kucema umukuni wa kwa Lesa. Nga ca kuti umuntu uwasontelwe aleka ukufika pa fipimo fya bulesa, mu kuya kwa nshita umupashi wa mushilo wali no kubomba ku kumufumya pa cifulo cakwe.
10. Caba shani ukuti umupashi wa mushilo ubomba umulimo wacindama mu kusonta kwa bulesa?
10 Caba shani ukuti umupashi wa mushilo walikwata umulimo wacindama? Ica ntanshi, ifyebo filanda pa lwa fifwaikwa pa kuba kangalila wa ku mupashi fyapuutilwemo ku mupashi wa mushilo. Muli bakalata bakwe kuli Timote na Tito, Paulo atantike ifipimo bakangalila na babomfi batumikila bali no kufikapo. Fyonse pamo, alandile pa fintu nalimo 16 ififwaikwa. Ku ca kumwenako, bakangalila tabali na kutungwa akabi, bali no kuba aba mushiye, abatekanya, abayana, abasekelela abeni, abakampuko kusambilisha, kabili imitwe ya ndupwa iisuma. Bali no kulinga ukunwa ubwalwa, tabali na kuba abatemwe ndalama, kabili bali no kuilama. Mu nshila imo ine, ifipimo fyasumbuka e fyo abaletinamina ukusontwa ukuba ababomfi batumikila bali no kufikapo.—1 Timote 3:1-10, 12, 13; Tito 1:5-9.
11. Milingo nshi imo iyo abaletinamina imilimo ya mu cilonganino balingile ukufikapo?
11 Ukupituluka muli iyi milingo kulangilila ukuti abatungulula mu kupepa Yehova bafwile ukuba fya kumwenako ifisuma mu myendele ya Bwina Kristu. Abaume abatinamine milimo ya mu cilonganino bafwile ukuishininkisha abene ukuti umupashi wa mushilo ulebomba pali bene. (2 Timote 1:14) Cifwile ukumoneka ukuti umupashi wa mushilo uletwala muli aba baume ifisabo fya “kutemwa, ukusekelela, umutende, ukutekanya, icongwe, ubusuma, icishinka, ukunakilila, ukuteko mutima.” (Abena Galatia 5:22, 23) Ifisabo fya musango yo kuti fyamonekela mu fyo babomba na basumina banabo na bambi. Kwena, bamo kuti balangisha sana ifisabo fimo ifya mupashi, ilyo bambi kuti bafika sana pa milingo imbi iya bakangalila. Lelo, mu mikalile yabo yonse, bonse abasubila ukusontwa ukuba bakangalila nelyo ababomfi batumikila balingile ukulanga ukuti baume ba bumupashi, abakumanisha ififwaikwa fyaba mu Cebo ca kwa Lesa.
12. Ni bani abo twingatila basontwa ku mupashi wa mushilo?
12 Lintu Paulo akonkomeshe bambi ukumupashanya, acitile co no kupama pantu wene alepashanya Yesu Kristu, ‘uwatushilile ica kumwenako ukuti tukonke mu makasa yakwe.’ (1 Petro 2:21; 1 Abena Korinti 11:1) E co, abakumanisha ifyo Amalembo yafwaya pa nshita basontwa ukuba bakangalila nelyo ababomfi batumikila kuti twatila basontwa ku mupashi wa mushilo.
13. Umupashi wa mushilo wafwa shani abatasha abaume ku kubomba mu cilonganino?
13 Kwaliba icintu na cimbi icilangilila ifyo umupashi wa mushilo ubomba mu kutasha no kusonta bakangalila. Yesu atile ‘Shinwe wa mu muulu apeela umupashi wa mushilo ku bamulomba.’ (Luka 11:13) E co lintu baeluda mu cilonganino bakumana ukuti batashe abaume ba kubomba imilimo mu cilonganino, bapepela umupashi wa kwa Lesa ukuti ubatungulule. Batasha ukulingana ne fyalembwa mu Cebo capuutwamo ica kwa Lesa, kabili umupashi wa mushilo ubalenga ukumona nga ca kuti umuntu balefwaya ukutasha nakumanisha ifyo Amalembo yafwaya. Abaletasha tabafwile ukutungululwa ku mimonekele ya ku nse, ifyo uyo muntu asoma, nelyo ifyo alamuka. Bafwile ukwangwa ku kumona nga ca kuti uyu muntu wa bumupashi, uyo aba mu cilonganino bengabutukilako ukuti bayefundwa lwa ku mupashi.
14. Finshi tusambilila pa Imilimo 6:1-3?
14 Ilyo amabumba ya baeluda yabombela pamo na bakangalila benda mu kutasha bamunyina ku kuba baeluda na babomfi batumikila, ukusontwa kuba ukulingana ne fyo kwaleba mu mwanda wa myaka uwa kubalilapo. Inshita imo, kwali ukukabila kwa baume bafikapo lwa ku mupashi ku kubomba umulimo wacindama. Ibumba litungulula lyatile: “Muimwene abaume cinelubali ba muli imwe abashimikwe cisuma, abaisulamo Umupashi na mano, tubasonte pa mulimo uyu.” (Imilimo 6:1-3) Ilyo abaume balebombela pali uyu mulimo batashishe abantu, ababasontele baume bali mu Yerusalemu abapeelwe umulimo wa kusonta. Ifi fiine e fyo caba na lelo.
15. Ibumba Litungulula libomba shani umulimo wa kusonta abaume?
15 Ibumba Litungulula ilya Nte sha kwa Yehova mu kulungatika lisonta bonse ababa mu Makomiti ya Misambo. Pa kupingulapo abengapeelwa umulimo wakule fi, Ibumba Litungulula libukisha amashiwi Yesu asosele aya kuti: “Umuntu onse uwapeelwe fingi, bakafwayako ifingi; no wabikilweko ifingi, bakafwayako ifyacilamo.” (Luka 12:48) Ukulunda pa kusonta ababa mu Makomiti ya Misambo, Ibumba Litungulula lisonta baeluda ba pa Bethel na bakangalila benda. Lelo, balapeelako na bamunyina bacetekelwa umulimo wa kusonta bambi. Ici na co ca mu Malembo.
‘Sonteni, Ifyo Namwebele’
16. Mulandu nshi Paulo ashiilile Tito mu Krete, kabili ici cilangilila cinshi pa lwa kusonta kwa bulesa ilelo?
16 Paulo aebele kabomba munankwe Tito ukuti: “Nakushilile umulandu uyu mu Krete, uwa kuti ulondolole ifyabulapo, no kulaasa [“kusonta,” NW] abakalamba mu mishi yonse ifyo nakwebele.” (Tito 1:5) Paulo lyene atantike ifyalefwaikwa ifyo Tito ali no kumona mu baume bali no kufika pa kusontwa kwa musango yu. E co, ilelo, Ibumba Litungulula lisonta bamunyina bafikapo pa maofeshi yanono ukubemininako mu kusonta baeluda na babomfi batumikila. Kulaba ukupoosako amano ukuti abaleimininako Ibumba Litungulula balyumfwikisha kabili bakonka ubutungulushi bwaba mu Malembo ubwa kusonta kwa musango yu. E co, abaume bafikapo basontwa ukubomba mu filonganino fya Nte sha kwa Yehova mwi sonde lyonse ukulingana no butungulushi bwe Bumba Litungulula.
17. Amaofeshi yanono aya Sosaite yabomba shani na batashiwe ukusontwa ukuba bakangalila nelyo ababomfi batumikila?
17 Lintu amashina ya batashiwe ukusontwa ukuba bakangalila nelyo ababomfi batumikila yatumwa kwi ofeshi linono ilya Watch Tower Society, abaume babelesha bashintilila pa butungulushi bwa mupashi wa kwa Lesa pa kusonta aba bantu. Aba baume balishiba ukuti bakalubulula, kabili beluka ukuti tabafwile ukubika bwangu iminwe pa muntu, epali bashingamwa imembu shakwe.—1 Timote 5:22.
18, 19. (a) Bamo basontwa shani? (b) Umulimo onse uwa kutasha no kusonta ubombwa shani?
18 Limo bamo basontwa ukupitila muli kalata uo bominepo inshimbi ya kabungwe ka mwi funde. Formu uo bominepo inshimbi uwa musango yo kuti abomfiwa ku kusonta bamunyina ukucila pali umo mu cilonganino.
19 Ukusonta kwa bulesa kufuma kuli Yehova ukupitila mu Mwana wakwe ne nshila ya kwa Lesa iimoneka iya pe sonde, “umusha wa cishinka kabili uwashilimuka” ne Bumba lyakwe Ilitungulula. (Mateo 24:45-47) Umulimo onse uwa uku kutasha no kusonta utungululwa ku mupashi wa mushilo. Cabe fi pantu ififwaikwa fyaimikwa mu Cebo ca kwa Lesa, icapuutwamo ku mupashi wa mushilo, kabili umuntu uusontelwe apeela ubushinino bwa kuti alikwata ifisabo fya mupashi. E co, tufwile ukumona ukuti umupashi wa mushilo e usonta. Nga fintu fye bakangalila na babomfi batumikila balesontwa kuli Lesa mu mwanda wa myaka uwa kubalilapo, e fyo caba na lelo.
Tulatasha pa Butungulushi bwa kwa Yehova
20. Mulandu nshi tusosela ifyasosele Davidi pa Amalumbo 133:1?
20 Muli ino nshita ya kulunduluka kwa ku mupashi no kwingilishiwako mu mulimo wa bulesa uwa kushimikila Ubufumu, tulatasha ukuti Yehova e usonta bakangalila na babomfi batumikila. Uku kutantika kwa mu Malembo kutwafwa ukuti ifwe fwe Nte sha kwa Yehova tutwalilile ukufika pa fipimo fyasumbuka ifyo Lesa aatupimina ifya bulungami. Na kabili, umupashi wa Bwina Kristu no kubombesha kwa aba baume kulafusha sana umutende ushaiwamina no kwikatana twaikatana nga babomfi ba kwa Yehova. Nga kemba wa malumbo Davidi, tulengwa ukusosa ukuti: “Moneni, ifyo kwawama kabili ifyo kwa nsansa ukwikalilila pamo kwa ba bwananyina!”—Amalumbo 133:1.
21. Esaya 60:17 ilefishiwapo shani lelo?
21 Tulatasha nga nshi pa butungulushi bwa kwa Yehova ukupitila mu Cebo cakwe no mupashi wa mushilo! Kabili amashiwi yalembwa pali Esaya 60:17 yalicindama icine cine. Yatila: “Pe punda lya butale nkaletapo golde, na pe punda lya cela nkaletapo silfere, pe punda lya fimuti ubutale, na pe punda lya mabwe icela. Nkacito Mutende ukuba bakaangalila bobe, no Bulungami ukuba bakapitao bobe.” Apo kwaliba ukulunduluka mu kubomfya sana inshila sha bulesa ku Nte sha kwa Yehova, twalipaalwa mu kuteyanya kwa kwa Lesa konse ukwa pe sonde.
22. Na nsambu fintu nshi tutashishapo, kabili finshi tufwile ukupampamina ukucita?
22 Tulatasha nga nshi pa kutantika kwa bulesa uko twakwata. Kabili tulatasha nga nshi pa mulimo wakosa lelo uwa nsansa uubombwa na bakangalila na babomfi batumikila abasontwa kuli Lesa. No mutima onse tulumbanya Shifwe wa mu muulu uwa kutemwa, uwatupeela ulubanda lwa ku mupashi no kutupaala nga nshi. (Amapinda 10:22) E co, natupampamine pa kwendela pamo no kuteyanya kwa kwa Yehova. Na kucilisha, natutwalilile ukubombela capamo ku kucindika, ukulumbanya, no kukatamika ishina lya kwa Yehova ilikalamba kabili ilyashila.
Kuti Mwayasuka Shani?
• Mulandu nshi twingasosela ukuti bakangalila na babomfi batumikila basontwa kuli Lesa te ku bantu?
• Abaume ba Bwina Kristu abacetekelwa basontwa shani ku mupashi wa mushilo?
• Ibumba Litungulula libomba shani umulimo wa kusonta bakangalila na babomfi batumikila?
• Ulwa kusonta kwa bulesa, mulandu nshi tufwile ukutashisha Yehova?
[Ifikope pe bula 15]
Baeluda na babomfi batumikila balikwata ishuko lya kusontwa kuli Lesa