Baacitile Ukufwaya kwa kwa Yehova

Umwanakashi Washilimuka Aleuka Ubusanso

UMWANAKASHI wa mano ukuupwa ku mwaume icinangwa—e fyo cali kuli Abigaili na Nabali. Abigaili aali “musuma uwashilimuka, kabili uwayembe mpumi.” Mu kupusanako, Nabali aali “uwayafya kabili umubi imicitile yakwe.” (1 Samwele 25:3) Ifya kucitika ifyabimbilemo aba bantu baupana abapusana fyalengele amashina yabo ukutwalilila ukulembwa mu lyashi lya mu Baibolo. Natumone ifyo cali.

Uluse Lwalile Nkwale

Cali mu mwanda wa myaka uwalenga 11 B.C.E. Davidi kale kale aali nasubwa ukuba imfumu pali Israele, lelo mu cifulo ca kuteka aalebutauka fye. Imfumu yaleteka, Shauli, yalipimpile fye ukuti kano fye afwe. Pali uyu mulandu, Davidi apatikishiwe ukuba imbutushi. Wene pamo ne fita 600 basukile bayabelama mu matololo ya Maone, ku kapinda ka ku kulyo aka Yuda kabili ukulola ku matololo ya Sinai.—1 Samwele 23:13; 25:1.

Ilyo baali kulya, bakumene na bakacema abalebombela umuntu we shina lya Nabali. Uyu muntu wa cuma intuntuko ya kwa Kalebu akwete impaanga 3,000 ne mbushi 1,000, kabili alebeyela impaanga shakwe mu Karmele, umusumba wabelele ku kapinda ka ku kulyo aka Hebrone kabili napamo bakilomita mupepi na 40 ukufuma ku Maone.a Davidi na bantu aali nankwe baafwile bakacema ba kwa Nabali ukulinda imikuni yabo ku bapuupu abalepitana mu matololo.—1 Samwele 25:14-16.

Pali iyi nshita, ukubeya impaanga kwalitendeke mu Karmele. Iyi yali ni nshita ya mitebeto ku bateeka impaanga, ukupala fintu caleba ku balimi pa nshita ya kulobolola. Kabili yaleba ni nshita ya kuba na bukapekape, ilyo abene ba mpaanga balelambula abalebabombela. E co tacali kuituntumba kwalengele Davidi ukutuma abaume 10 ku musumba wa Karmele ku kulomba Nabali ifya kulya ku kubalipila pa mulimo untu babombele ku mikuni yakwe.—1 Samwele 25:4-9.

Ukwankulako kwa kwa Nabali takwalimo bukapekape nangu panono. “Nani Davidi?” e fyo aipwishe mipuulwe mipuulwe. Lyene, ukulangilila ukuti Davidi na bantu bakwe baali fye basha abafyukile ukufuma kuli Shikulwibo, aipwishe ukuti: “Bushe mbuule ifilyo fyandi, no mwangashi wandi, no kwipayaula kwandi uko naipayawila bakabeya bandi, mpeele na ku bantu abo nshiishibe uko bafumine?” Lintu Davidi aumfwile ci, aebele abantu bakwe ukuti: “Kakeniko umuntu onse ulupanga lwakwe mu musana.” Abaume mupepi na 400 baliipangeshe ku bulwi.—1 Samwele 25:10-13.

Ukushilimuka kwa kwa Abigaili

Amashiwi ya musaalula aya kwa Nabali yafikile ku matwi ya mukashi wakwe, Abigaili. Napamo uyu tawali e muku wa kubalilapo anyantukilemo no kulandilako Nabali. Te mulandu na fintu cali, icishinka cili ca kuti Abigaili alibombelepo mu kwangufyanya. Ukwabulo kweba Nabali, alonganike ifipe—ukusanshako impaanga shisano ne fya kulya ifingi—no kuya ku kukumanya Davidi mu matololo.—1 Samwele 25:18-20.

Lintu Abigaili amwene Davidi, ilyo line fye aliwile ubukupeme ku cinso ca kwa Davidi. “Shikulu ebika mutima wakwe pali uyu muntu cinangwa Nabali,” e fyo apaapeete. “Ipaalo ili kanakashi wenu aleta kuli shikulu, lekeni lipeelwe ku balumendo abendaenda mu makasa ya kwa shikulu.” Alundileko no kuti: “Ici [icikumine Nabali] tacakabe kuli imwe ica kukuntukilwa, nangu ica kutalansukako umutima kuli shikulu.” Ishiwi lya ciHebere ilyapilibulwa pano ukuti “ukukuntukilwa” lilosha ku kulasaula kwa kampingu. E co Abigaili asokele Davidi ukukanacite cintu ico aali no kwisalanguluka pa numa.—1 Samwele 25:23-31.

Davidi alyumfwile kuli Abigaili. Atile kuli wene: “Yabe ayapaalwa amano yobe, nobe ube uwapaalwa we wandesha lelo ukwingila mu milopa. . . . Aubulayangufyanya no kwisa ku kunkumanya, nga tapashele umwaume kuli Nabali pa kuco lucelo.”—1 Samwele 25:32-34.

Ifyo Twingasambililako

Ubu bulondoloshi bwa mu Baibolo bulelangilila ukuti tacalubana nangu panono ku mwanakashi wa bukapepa ukuitendekelako mu kulinga nga ca kuti cakabilwa. Abigaili acitile ifyapusene ne fyalefwaya umulume wakwe, Nabali, lelo Baibolo taimusenuka pali ici. Mu kupusanako, ilamutasha ukuti mwanakashi uwashilimuka kabili uwa mano. Ukupitila mu kuitendekelako pali iyi nshita yaafya, Abigaili alipuswishe imyeo iingi.

Nangu cingati mu cinkumbawile umukashi alingile ukulangisha imibele ya bukapepa iya kunakila, kuti caba fye bwino ukukaanya umulume wakwe lintu ifishinte fyalungama filepana fitobwe. Kwena, alingile ukubombesha ukutwalilila ukuba “uwafuuka kabili uwatalala” kabili talingile ukucite fipuseneko pa mulandu fye wa kukalifiwa, icilumba, nelyo bucipondoka. (1 Petro 3:4) Nangu cibe fyo, umukashi wa bukapepa talingile ukuyumfwa uwatitikishiwa ukucite cili conse ico eshibe ukuti tacilimo amano nangu panono nelyo iciletoba ifishinte fya Baibolo. Mu cine cine, ubulondoloshi ubulanda pali Abigaili bulangilila ifishinka fya maka ifya kulondolwela abapampamina pa kusoso kuti Baibolo ilangisha abanakashi pamo nga basha fye.

Ubu bulondoloshi buletusambilisha na kabili pa lwa kuilama. Inshita shimo shimo, Davidi aalelangisha iyi mibele mu kufishapo. Ku ca kumwenako, alikeene ukwipaya Imfumu Shauli uwamupimpiile, nangu cingati alikwete ishuko lyakulisha ilya kucite fyo kabili Shauli epaiwa nga calengele Davidi ukwikala ku matwi tondolo. (1 Samwele 24:2-7) Mu kupusanako, lintu Nabali amusaalwile, Davidi alifililwe ukuilama no kufwaya ukulandula. Ici cilesoka nga nshi Abena Kristu, ababombesha ukukanaba “ababwesesho muntu nelyo umo ububi pa bubi.” Lyonse, balingile ukukonka ukukonkomesha kwa kwa Paulo ukwa kuti: “Nga cingacitwa; mube aba mutende ku bantu bonse nga caba mu maka yenu. Mwiba abalandula, mwe batemwikwa, lelo peeleni ubukali bwa kwa Lesa apa kupita.”—Abena Roma 12:17-19.

[Futunoti]

[Icikope pe bula 15]

Abigaili aletela Davidi ifya bupe