Bakabilisha ba Bufumu Bacita Lipoti

Abana be Sukulu Abena Nigeria Bapaalwa pa Mulandu wa Busumino

UMUTUMWA Paulo alembele ukuti: “Nga cingacitwa, mube aba mutende ku bantu bonse nga caba mu maka yenu.” (Abena Roma 12:18) Abana be sukulu aba Nte sha kwa Yehova mu Nigeria balabomfya uku kufunda, nelyo fye lintu bapakaswa. Nge ca kufumamo, Yehova alabapaala.

◻ Kafundisha umo apatile nga nshi Inte sha kwa Yehova. Mu kati ka kukumana kwa lucelo kumo, aitile Inte bonse ku ntanshi no kubakambisha ukwimba ulwimbo lwa cishipa. Balikeene, ukulondolola ukuti balefwaya ukupeela ukuipeelesha kwapaatulwa kuli Lesa. Kafundisha lyene atwele bonse ku nse no kubeba ukukumpa icani. Pali iyi nshita, abasambi bambi batwalilile ukusambilila mu makalasi.

Nte umukalamba atwele broshuwa ya School and Jehovah’s Witnesses kuli kafundisha, ukulondolola ukwiminina kwa kukanabuulamo ulubali ukwa Nte sha kwa Yehova. Nangu cibe fyo, kafundisha alikeene ukulanshanya umulandu nelyo ukupoka broshuwa. Na kuba, ilyo line aluminishe ukukandwa kwa bana.

Inte abacaice batwalilile ukushipikisha uku kukandwa kabili batwalilile ukukumpa icani nelyo fye ni lintu kafundisha ashalipo. Kasuba kamo kafundisha alibeleme no kubabebeta ukwabulo kwangalilwa ilyo batwalilile ukubomba no kwimba inyimbo sha Bufumu. Alyebekeshiwe nga nshi ica kuti abebele ukubwelela mwi kalasi, ukulumbulula ukupapa pa mibele yabo. Cinshi cali ica kufumamo? Kafundisha nomba alikwate sambililo lya Baibolo ne Nte sha kwa Yehova!

Mu kushininkisha aba abana be sukulu balipaalilwe pa mulandu wa busumino bwabo kuli Yehova ne fishinte fyakwe.—Amapinda 10:22.

◻ Ruth ne fibusa fyakwe na bo bene balipaalilwe pa mulandu wa busumino bwabo ku cifwaikwa ca kwa Yehova ica “kukanaba ulubali lwa calo.” (Yohane 17:16, NW) Ruth, uuli ne myaka 18, atampile bupainiya lintu aali ne myaka 12. Wene ne Nte bambi bapokelele ukukaanya ukufuma ku filundwa fya bakafundisha ba pa sukulu pa mulandu wa kukaana ukwimba ulwimbo lwa cishipa. Kafundisha aipwishe ukumonana na bafyashi ba bakashana. Pa numa bapeele ubulondoloshi, ukubomfya broshuwa ya School, kafundisha alikushiwe kabili tabalile apeela abo basambi ubwafya.

Kasuba kamo, nangu cibe fyo, kafundisha uwafumine ku India asaalwile no kukanda umo uwa bakashana pa ntanshi ye kalasi lintu umukashana akeene ukwimba ulwimbo lwa cishipa. Umukashana mu kushipa acingilile icitetekelo cakwe kabili kafundisha amutwele kuli kafundisha mukalamba uwe sukulu. Lintu bafikile kulya, Nte wacaice asangile ukuti inkonkani ya kwa kafundisha mukalamba na o wine aali kulya. Ku kupapushiwa kwakwe, kafundisha mukalamba ne nkonkani yakwe batampile ukuseka. Ukwalukila kuli kafundisha, kafundisha mukalamba asosele ukuti: “Mwe bamayo mwe, mwilasakamikwa pa lwa aba bakashana. Nelyo fye nga mwingabepaya, kuti basoobolapo ukufwa ukucila ukulumbula amashiwi ya cishipa. Bushe tamwabala amumfwa pa lwa bene?” Wene na kaafwa wakwe lyene balandile pa lwa citetekelo no kushipa kwa Nte sha kwa Yehova. Ukulanda ku mukashana, kafundisha mukalamba alombele ukwelelwa ku kulengwe nsoni umukashana aculile. Lyene alundilepo ukuti: “Twalilila mu ncitilo shobe isha citetekelo. Ndakumbwa ubutotelo bwenu no kwiminina kwenu kwashipa ponse pabili ku nse na kuno ku sukulu.” Pa numa, kafundisha uwali uwa kukaanya alombele ukwelelwa kuli Nte, ukusoso kuti nomba alomfwikisha ukwiminina kwa kukanabuulamo ulubali ukubuulwa ne Nte.

Aba bana bakonkele ica kumwenako ca baHebere batatu abashali na kutoba bumpomfu bwabo kuli Lesa pa kukontamine cimpashanya, kabili ne ca kwa Daniele, uwakeene ukuleka ukupepa kuli Yehova. Aba baume balipaalilwe kuli Yehova pa mulandu wa kuti baali aba busumino ku mafunde ya kwa Lesa ayalungama.—Daniele, ifipandwa 3 na 6.