Nangu ca kuti Ica Kucilila tacaleimininako lcibukisho, fimo ifyaleba pa Ca Kucilila fyalikwata ubupilibulo kuli ifwe? Ku ca kumwenako, umutumwa Paulo aitile Yesu ukuti “impaanga ya pa Ca Kucilila.” (1 Kor. 5:7) Nga filya fine umulopa wa mpaanga uo basanshile pa nceshi sha pa mwinshi wapuswishe abantu, e fyo no mulopa wa kwa Yesu upususha abantu. (Ukufu. 12:12, 13) Na kabili, tabalefuna ifupa ilili lyonse ilya mpaanga iyo balebomfya pa Ca Kucilila. Na Yesu ilyo balemwipaya, tabafunine ifupa lyakwe ilili lyonse nangu ca kuti ukufuna amafupa ya muntu uo baleipaya lwali lutambi.—Ukufu. 12:46; Yoh. 19:31-33, 36.