“Mwilatiina, Mwe Mukuni Unono”

“Mwilatiina, mwe mukuni unono; ico Shinwe abekelwa ukumupeelo bufumu.”—LUKA 12:32.

1. Ni pali cinshi pashintilile amashiwi ya kwa Yesu aya kuti: “Mwilatiina, mwe mukuni unono”?

“FWAYENI ubufumu [bwa kwa Lesa].” (Luka 12:31) Lintu Yesu asosele aya mashiwi ku basambi bakwe, alumbulwile icishinte icatungulula ukutontonkanya kwa Bena Kristu ukufuma mu kasuba kakwe ukutentemukila ku kesu kene. Ubufumu bwa kwa Lesa bufwile ukuba e ca ntanshi fye mu bumi bwesu. (Mateo 6:33) Mu bulondoloshi bwa kwa Luka, nangu cibe fyo, Yesu atwalilile ukulanda amashiwi yabamo icitemwishi kabili aya kwebekesha kwi bumba lyaibela ilya Bena Kristu. Atile: “Mwilatiina, mwe mukuni unono; ico Shinwe abekelwa ukumupeelo bufumu.” (Luka 12:32) Pamo nga Kacema Musuma, Yesu alishibe ukuti kwaliko inshita shalulunkana pa ntanshi ya basambi bakwe abapalamisha. Lelo takwaliko umulandu uwa kuti baletiinina nga ca kuti batwalilile ukufwaya Ubufumu bwa kwa Lesa. E ico, ukukonkomesha kwa kwa Yesu takwali kukambisha kwakaluka. Ukucila, bwali bulayo bwabamo kutemwa ubo bwabombele ku kupuutamo ukucetekela no bukose.

2. Ni bani bapanga umukuni unono, kabili mulandu nshi bakwatile shuko mu kuibela?

² Yesu alelanda ku basambi bakwe, kabili abetile ngo “mukuni unono.” Alelanda na kabili kuli abo bantu Yehova aali no ‘kupeelo bufumu.’ Mu kulinganyako na mabumba yakalamba ayali no kupokelela Yesu mu nshita sha pa numa, ili bumba mu cine cine bali abanono mu mpendwa. Balangulwikwe na kabili aba mutengo pantu basalilwe ku nshita ya ku ntanshi iyawamisha, ku kubomfiwa mu mulimo wa cifumu. Shibo, Kacema Wakulisha, Yehova, eta umukuni unono mu kuba ne cilolwa ca kupokelela ubupyani bwa mu muulu mu kulundana no Bufumu bwa buMesia ubwa kwa Kristu.

Umukuni Unono

3. Cimonwa nshi ica bukata ica mukuni unono cintu Yohane amwene?

³ Ni bani, lyene, bapanga uyu mukuni unono uwakwata ishuko likalamba ilya musango yu? Baba bakonshi ba kwa Yesu Kristu abasubwa no mupashi wa mushilo. (Imilimo 2:1-4) Ukubamona nga bakemba ba mu muulu mu kuba na masese mu minwe yabo, umutumwa Yohane alembele ukuti: “Naloleshe, kabili moneni, Umwana wa mpaanga naiminina pa lupili lwa Sione, kabili pamo nankwe pali aba makana umwanda umo na ’makana amakumi yane na ’makana yane, abakwate shina lyakwe ne shina lya kwa Wishi lyalilembwa pa mpumi shabo. Bene e bashakoweshiwe ku banakashi, pantu bashatalile abopa; aba e bakonko Mwana wa mpaanga konse uko aya; bene balubwilwe mu bantu, babe fisabo ifyabalilapo ukupya kuli Lesa na ku Mwana wa mpaanga. Na mu tunwa twabo tamwasangilwe ica bufi; bantu babulwa akalema.”—Ukusokolola 14:1, 4, 5.

4. Cifulo nshi cintu umukuni unono wakwata pe sonde ilelo?

⁴ Ukutula pa Pentekoste 33 C.E., aba basubwa, abafyalwa ku mupashi balibomba nge nkombe sha kwa Kristu pe sonde. (2 Abena Korinti 5:20) Ilelo, abashalapo fye e bacilipo, ababombela pamo nge bumba lya musha wa cishinka kabili uwashilimuka. (Mateo 24:45; Ukusokolola 12:17) Ukutula mu mwaka wa 1935 ukucilisha, kwalilundwa “impaanga shimbi,” Abena Kristu baba ne subilo lya pe sonde, abo nomba bali mu mpendwa ya mamilioni. Aba balafwilisha mu kushimikila imbila nsuma mwi sonde lyonse.—Yohane 10:16.

5. Mibele nshi iya mutima iya bashalapo aba mukuni unono, kabili mulandu nshi tabalekabila ukutiinina?

⁵ Cinshi caba imibele ya mutima iya bashalapo aba uyu mukuni unono abacili pe sonde? Pa kwishiba ukuti bali no kupokelela “Ubufumu ubushitenshiwa,” babomba umulimo wabo washila mu kuba na katiina ka bukapepa no kucindikisha. (AbaHebere 12:28) Beluka mu kuicefya ukuti bakwata ishuko ilishingalinganishiwako ilyo lifumamo ubuseko bwabulo kupimwa. Balisanga “margariti umo uwaumo mutengo” uwaloshiweko na Yesu lintu alelanda pa lwa Bufumu. (Mateo 13:46) Ilyo ubucushi bukalamba bulepalama, abasubwa ba kwa Lesa beminina ababulo mwenso. Te mulandu ne fili mupepi no kwisa pa calo ca mutundu wa muntu mu kati ka “bushiku bwa kwa [Yehova, NW] ubukalamba kabili ubwamonekesha,” tabakwata umwenso wa kubombomanika pa lwa nshita ya ku ntanshi. (Imilimo 2:19-21) Mulandu nshi bengabela no munsokwe?

Impendwa Shilecepa

6, 7. (a) Mulandu nshi impendwa ya mukuni unono abacili pe sonde ibelele iinono fye? (b) Ni shani fintu umuntu umo umo alingile ukumona isubilo lintu akwata?

⁶ Mu myaka ya nomba line impendwa ya ba mukuni unono abacili pe sonde naicepa nga nshi. Ici camonekeshe ukufuma kuli lipoti wa Cibukisho uwa 1994. Mu filonganino mupepi na 75,000 ifya bantu ba kwa Yehova mu kusaalala kwa calo, kwali fye 8,617 abalangilile ku kulyako ifimpashanya ukuitunga kwabo ukwa kuba ifilundwa fya bashalapo. (Mateo 26:26-30) Mu kupusanako, ubwingi bonse pamo ubwa basangilweko bwali 12,288,917. Abena Kristu basubwa balishiba ukuti ici cili no kwenekelwa. Yehova alimikako impendwa yapimwa, 144,000, ukupanga umukuni unono, kabili alabalonganya ukutula pa Pentekoste 33 C.E. Mu kubamo kupelulula, ukwitwa kwa mukuni unono kwali no kufika ku kwisalika lintu impendwa yalepalama ku kukumanina, kabili ubushininkisho buli bwa kuti ukulonganikwa kwa cinkumbawile ukwa aba bapaalwa mu kuibela kwapwile mu 1935. Nangu cibe fyo, impaanga shimbi mu nshita ya mpela shasesemwe ukukula ku kuba “ibumba likalamba ilishingapendwa ku muntu nangu umo, abafuma ku luko lonse ne mikowa ne misango ya bantu na ’bantu na ’ba ndimi.” Ukutula 1935 ukulonganika kwa kwa Yehova ukwa cinkumbawile kwaba kwe bumba likalamba, abo isubilo lyabo lyaba bumi bwa muyayaya mwi sonde lya paradise.—Ukusokolola 7:9; 14:15, 16; Ilumbo 37:29.

⁷ Ubwingi bwa abo aba mukuni unono abacili pe sonde bali nomba mu myaka yabo iya ba 70, ba 80, na ba 90. Bamo balicila pa mwaka walenga 100 uwa bumi. Bonse aba, te mulandu ne cingaba umushinku wabo, balishiba ukuti ukupitila mu kubuuka kwa ku muulu, mu kupelako bakalundana na Yesu Kristu no kuteka na wene mu Bufumu bwakwe ubwa bukata. Abo abe bumba likalamba bakaba batekwa ba pe sonde aba kwa Kristu Imfumu. Umo umo nasekelele pa co Yehova abakila abamutemwa. Te cesu ukusala isubilo lintu tuli no kukwata. Ico ni Yehova e upima. Amabumba yonse yabili kuti bacincimuka mwi subilo lyabo ilya ku nshita ya ku ntanshi iya nsansa, cibe ni mu Bufumu bwa mu muulu nelyo pe sonde lya paradise pe samba lya bulya Bufumu.—Yohane 6:44, 65; Abena Efese 1:17, 18.

8. Kutantalile shani ukukakatika kwa ba 144,000, kabili cinshi cikacitika lintu kwapwishishiwa?

⁸ Umukuni unono uwa ba 144,000 e “Israele wa kwa Lesa,” uyo apyana pali Israele wa cifyalilwa mu mifwaile ya kwa Lesa. (Abena Galatia 6:16) E ico, abashalapo bapangwa na bantu bashalapo aba lulya luko lwa ku mupashi abacili pe sonde. Abashalapo ba musango yo balekakatikwa mu kusuminisha kwa kupelako ukwa kwa Yehova. Mu cimonwa, umutumwa Yohane amwene ici uko cilecitika, kabili acitile lipoti ukuti: “Namwene malaika umbi alenina ku butulo bwa kasuba, ali ne cikakatikilo ca kwa Lesa wa mweo; awe abilikishe ishiwi likalamba kuli bamalaika bane abapeelwe ukufyenge calo na bemba, atile, Mwifyengapo icalo nangu ni bemba nangu miti, tusuke tukakatike abasha ba kwa Lesa wesu pa mpumi shabo. Naumfwile ne mpendwa ya bakakatikwe, amakana umwanda umo na ’makana amakumi yane na ’makana yane, abakakatikwe aba mu mikowa yonse ya bana ba kwa Israele [wa ku mupashi].” (Ukusokolola 7:2-4) Apantu uyu mulimo wa kukakatika Israele wa ku mupashi mu kumonekesha nautantalila nga nshi, ifya kuponako fya kucincimusha ifili no kucitika mu kwangufyanya fyalilangililwa. Ku ca kumwenako, “ubucushi bukalamba,” lintu imyela ine iya bonaushi yalekelwako pe sonde, bufwile ukuba mupepi nga nshi.—Ukusokolola 7:14.

9. Ni shani fintu umukuni unono umona impendwa ileingilishiwako iye bumba likalamba?

⁹ Abo aba mwi bumba likalamba abo kale kale balonganikwa balifika mu mamilioni. Fintu ici cikafya imitima ya bashalapo! Nangu ca kuti abo aba mukuni unono abacili pe sonde batwalilila ukucepelako mu mpendwa, balikansha no kupekanya abaume bafikapo abe bumba likalamba ukusunsa ifishingamo mu kulundana no kuteyanya kuletanunuka ukwa kwa Lesa ukwa pe sonde. (Esaya 61:5) Nga fintu Yesu alangilile, kukabako bakapusunsuka ba bucushi bukalamba.—Mateo 24:22.

“Mwilatiina”

10. (a) Kusansa nshi kuli no kwimishiwa pa bantu ba kwa Lesa, kabili kukatungulula kuli cinshi? (b) Fipusho nshi fileipushiwa kuli umo na umo uwa ifwe?

¹⁰ Satana ne fibanda fyakwe baliboteleshiwa ku bwina mupalamano bwe sonde. Wene na cinkupiti wakwe balelonganikwa ku kucita ukusansa kwabo ukwa kapeleko pa bantu ba kwa Yehova. Uku kusansa, ukwasobelwa muli Baibolo, kwalondololwa nga ukusansa kwa kwa Goge wa ku Magoge. Ni pali bani ukucilisha Ciwa alungatika ukusansa kwakwe? Bushe tacili ni pa filundwa fya kulekelesha ifya mukuni unono, Israele wa ku mupashi uwa kwa Lesa, abo baleikala mu mutende “pa mutoto wa pano isonde”? (Esekiele 38:1-12) Ee, lelo abashalapo be bumba lya busumino ilya basubwa, capamo na banabo ba bucishinka, impaanga shimbi, bakamonako fintu ukusansa kwa kwa Satana kukabalamuna ukwankulako kwakulisha pa lubali lwa kwa Yehova Lesa. Akacilima mu kucingilila abantu bakwe, kabili ici cikakolomona ukutendeka kwa “bushiku bwa kwa Yehova, ubukulu kabili ubwa kutiinya.” (Yoele 2:31) Ilelo, umusha wa cishinka kabili uwashilimuka alepwilikisha umulimo wakatama, uwa kupususho bumi, ukusoka ulwa uku kucilima kuleisa ukwa kwa Yehova. (Malaki 4:5; 1 Timote 4:16) Bushe mu kucincila uleafwilisha uyo mulimo, ukwakana mu kushimikila imbila nsuma ya Bufumu bwa kwa Yehova? Bushe ukatwalilila ukucite fyo pamo nga kabilisha wa Bufumu uwabulo mwenso?

11. Mulandu nshi imibele ya mutima iyashipa ibelele iyakatama ilelo?

¹¹ Mu cilolwa ca mibele ya calo ca ndakai, fintu cili icalingana ne nshita ku mukuni unono ukumfwila amashiwi Yesu alungike kuli bene aya kuti: “Mwilatiina, mwe mukuni unono”! Imibele ya mutima iya bukose iya musango yo yalicindama mu cilolwa ca ico conse icilepwilikishiwa mu kumfwana ne mifwaile ya kwa Yehova. Pamo ngo muntu umo umo, uwa mu mukuni unono umo na umo aleshiba ukukabila kwa kushipikisha ukufika fye na ku mpela. (Luka 21:19) Nga fintu Yesu Kristu, Shikulu kabili Cibinda wa mukuni unono, ashipikishe no kushinina ukuba uwa busumino ukufika fye na ku kupwishishiwa kwa bumi bwakwe ubwa pe sonde, e fyo umo na umo uwa bashalapo afwile ukushipikisha no kushinina ukuba uwa busumino.—AbaHebere 12:1, 2.

12. Ni shani fintu Paulo, ukupala Yesu, akonkomeshe Abena Kristu basubwa ukukanatiina?

¹² Bonse abasubwa bafwile ukukwata imimwene imo ine nge ya mutumwa Paulo. Mona fintu amashiwi yakwe nga kabilisha wa ku cintubwingi uwasubwa pa lwa kwima ku bafwa yaba mu kumfwana no kukonkomesha kwa kwa Yesu ukwa kukanatiina. Paulo alembele ati: “Ibukisha Yesu Kristu uwabuuka ku bafwa, uwa mu bufyashi bwa kwa Davidi umwabele mbila nsuma yandi; iyo nculilamo ukufika na ku fifungilo, kwati ndi ncitatubi. Lelo icebo ca kwa Lesa tacakakwa. E ico nshipikishisha pa mulandu wa basalwa, ukuti na bo bamone ipusukilo muli Kristu Yesu pamo no bukata bwa muyayaya. Cebo ca cishinka: Nga twafwile pamo nankwe, tukekala no mweo pamo nankwe; nga twashipikisha, tukaba no bufumu pamo nankwe; nga twamukaana, wene na o akatukaana; nga tatubele ba cishinka, wene abelelela uwa cishinka: pantu te ’ti acite ifishaba mibele yakwe.”—2 Timote 2:8-13.

13. Kushininwa nshi ukwashika uko ifilundwa fya mukuni unono bakwata, kabili cinshi cintu kubasesha ukucita?

¹³ Ukupala umutumwa Paulo, ifilundwa fyashalapo ifya mukuni unono uwasubwa baliba abaitemenwa ukushipikisha ukucula ilyo balebilisha ubukombe bwa maka ubusangwa mu Cebo ca kwa Lesa. Ukushininwa kwabo kwalishika nga nshi ilyo balecetekela mu malayo ya bulesa aye pusukilo na ya kupeelwa kwabo “icilongwe ca mweo” nga ca kuti bashininkisha ukuba aba busumino ukufika na ku mfwa. (Ukusokolola 2:10) Pa kukumanya ukubuuka kwa ilyo line fye no kwaluka, bakaba pamo na Kristu, ku kutekela capamo na wene nge shamfumu. Mwandi kucimfya kwa nshila yabo iya kusunga bumpomfu nga bakacimfya ba calo!—1 Yohane 5:3, 4.

Isubilo Lyaibela

14, 15. Ni shani fintu isubilo lya kwima ku bafwa ilya mukuni unono lyaba ilyaibela?

¹⁴ Isubilo lya kubuuka ilyo umukuni unono wakwata lyaba ilyaibela. Ni mu nshila nshi? Ica kubalilapo, kulatangilila ukubuuka kwa mu cinkumbawile ukwa “balungama na ’bashalungama.” (Imilimo 24:15) Mu cishinka, ukubuuka kwa basubwa kwafyantikwa mu kukonkana kumo ukwa kucindama, nga fintu capampamikwa mu kumonekesha kuli aya mashiwi yasangwa pali 1 Abena Korinti 15:20, 23 aya kuti: “Kristu abuushiwa ku bafwa, icisabo ca ntanshi ku balaala. Lelo onse mwi tulwe lyakwe line: Kristu e cisabo ca ntanshi; e lyo aba kwa Kristu, pa [kubapo, NW] kwakwe.” Pa kukwata umusango wa kushipikisha ne citetekelo ifyo Yesu alangishe, umukuni unono walishiba ifilebapembelela ilyo bapwisha ubumi bwabo ubwa pe sonde, ukucilisha ukutula pantu Shikulu wa cine aishile kwi tempele lyakwe ku kupingula mu 1918.—Malaki 3:1.

¹⁵ Paulo atupeela umulandu walundwako uwa kumwena uku kwima ku bafwa ngo kwaibela. Nga fintu calembwa pali 1 Abena Korinti 15:51-53, alembele ukuti: “Moneni, ndemwebe ca nkama: Tatwakalaale bonse, lelo tukaaluka bonse, mu kashita akanininini, mu kukapakapa kwa linso, pa ntandala ya kupelelekesha. . . . Pantu ici icilebola cili no kufwalo kukanabola, kabili ici ca mfwa cili no kufwalo kukanafwa.” Aya mashiwi yabomba kuli abo aba mukuni unono abafwa mu kati ka kubapo kwa kwa Kristu. Ukwabula ukulaala pa ciputulwa ca nshita icalepa mu mfwa, balafwikwa bumunshifwa, “mu kashita akanininini, mu kukapakapa kwa linso.”

16, 17. Ukukuma kwi subilo lyabo ilya kwima ku bafwa, ni shani fintu Abena Kristu basubwa ilelo ukucilisha babelele abapaalwa?

¹⁶ Mu lubuuto lwa uku kumfwikisha, kuti twamwensekesha ubupilibulo bwa mashiwi ya mutumwa Yohane ayasangwa pa Ukusokolola 14:12, 13. Alembele ukuti: “Pano e pali ukushipikisha kwa ba mushilo ababaka amafunde ya kwa Lesa no kutetekela kwa kuli Yesu. Kabili naumfwile ishiwi lya mu muulu liletila, Lemba, auti, Balishuka abafwa abafwila muli Shikulu ukufuma kuli nomba. Umupashi wati, Ifyo fine, pa kuti batushe ku kucucutika kwabo; pantu imilimo yabo ilebakonka.”

¹⁷ Mwandi cilambu caibela cabikilwa abashalapo aba mukuni unono! Ukubuuka kwabo kukesa bwangu bwangu, ukukonka fye pa numa ya kusendama mu mfwa. Mwandi kwaluka kwawamisha uko bakumanya ilyo babuula umulimo wabo mu bwikalo bwa mupashi! Mu kuba no kukatamikwa kwa musango yo ukwa mukuni unono ukucitikako no kufikilishiwa kwa masesemo yakalamba ya Baibolo ukutantalile nga nshi, ifilundwa fya kulekelesha ifyashalapo ifya mukuni unono mu cine cine tafikabila ‘ukutiina.’ Kabili ukubulwo mwenso kwabo kubomba ku kukoselesha abo aba mwi bumba likalamba, abalingile ukulundulula imibele ya mutima imo ine iya kubulwo mwenso ilyo baleenekela ukulubulwa mu kati ka nshita yakulisha iya bucushi iyo isonde talyabala alishiba.

18, 19. (a) Mulandu nshi inshita tuleikalamo ibelele iye pamfya? (b) Mulandu nshi bonse abasubwa ne mpaanga shimbi bashilingile ukutiinina?

¹⁸ Ukulondolola imibombele ya mukuni unono kulenga bene ne bumba likalamba ukutwalilila ukutiina Lesa wa cine. Inshita ya bupingushi kuli wene naifika, kabili inshita yayana iisheleko yalyumo mutengo. Inshita ya kuti bambi bacitepo cimo naicepesha nga nshi. Ifwe, nangu ni fyo, tatutiina ukuti imifwaile ya kwa Lesa ikafilwa. Mu cine cine ikatunguluka!

¹⁹ Kale kale, amashiwi yapongomoka aya mu muulu yalyumfwikwa ukusoso kuti: “Ubufumu bwa pe sonde bwaisabo bwa kwa Shikulwifwe, no bwa kwa Kristu wakwe, na o akulabe Mfumu umuyayaya umuyayaya.” (Ukusokolola 11:15) Mu kushininkisha, Kacema Wakulisha, Yehova, aletungulula impaanga shakwe shonse mu “makuba ya bulungami pa mulandu we shina lyakwe.” (Ilumbo 23:3) Umukuni unono mu kubulwo kuluba uletungululwa ku cilambu cabo ica ku muulu. Kabili impaanga shimbi shikapusushiwa ishacingililwa ukupula mu bucushi bukalamba ku kuipakisha ubumi bwa ciyayaya mu bwikashi bwa pe sonde ubwa Bufumu bwa bukata ubwa kwa Lesa pe samba lya kuteka kwa kwa Kristu Yesu. E ico, ilintu amashiwi ya kwa Yesu yaloshiwe ku mukuni unono, mu kushininkisha ababomfi ba kwa Lesa bonse pe sonde balikwata umulandu wa kukutikila ku mashiwi yakwe aya kuti: “Mwilatiina.”

Bushe Kuti Walondolola?

◻ Mulandu nshi tulingile ukwenekela impendwa isheleko iya mukuni unono ukucepelako?

◻ Cinshi cili e mibele ya bashalapo basubwa ilelo?

◻ Mulandu nshi Abena Kristu bashilingile ukutiinina, te mulandu no kusansa kulepalamina ukwa kwa Goge wa ku Magoge?

◻ Mulandu nshi isubilo lya kwima ku bafwa ilya ba 144,000 libelele ilyaibela, ukucilisha ilelo?