“Muyeshe Mwe Bene, Mumone Nga Muli Mu Kutetekela”
Ifishinka Fikalamba Ukufuma mu Abena Korinti Wa Cibili
UMUTUMWA Paulo aali uwayangwako pa lwa Bena Kristu mu Korinti. Ni shani fintu bali no kumona ukufunda kwapeelwe muli kalata wakwe uwa kubalilapo kuli bene? Aali mu Makedonia lintu Tito afikile na lipoti umusuma uwa kuti kalata yalengele abena Korinti ubulanda ukufika ku kulapila. Fintu ico calengele Paulo ukusekelela!—2 Abena Korinti 7:8-13.
Paulo alembele Abena Korinti Wa Cibili ukufuma mu Makedonia, nakalimo pa numa ya mwaka pa kati mu 55 C.E. Muli uyu kalata, alanshenye intampulo shabuulilwe ku kusunga icilonganino icasanguluka, akuulile ukufwaisha ku kusangwilako ku basumina abali mu kukabila mu Yudea, kabili apokolwele ubutumwa bwakwe. Ifingi ifyo Paulo asosele kuti fyatwaafwa ‘ukuyesha fwe bene, ukumona nga tuli mu kutetekela.’ (13:5) E co, cinshi twingasota ukufuma muli uyu kalata?
Kapyunga wa kwa Lesa wa Cisansamushi
Umutumwa alangile ukuti pamo fye nga fintu Lesa atusansamusha mu fya bucushi fyesu fyonse, tulingile ukusansamusha bambi no kubapepela. (1:1–2:11) Nangu cingati Paulo na ba kubishanya nankwe baali pe samba lya kutitikisha kukalamba, Lesa alibapokolwele. Nalyo line, abena Korinti baali na maka ya kwaafwa na mapepo mu kubemininako, pamo fye nga fintu tulingile ukupepelako bambi abapokelela icitetekelo ca cine. Lelo ni shani pa lwa mwaume wa bucisenene uwalumbulwa muli 1 Abena Korinti icipandwa 5? Mu kumonekesha alitamfiwe lelo aali nalapila. Ifyo afwile asansamushiwe lintu abena Korinti batambulwile ukwelela no kumubwesha mu kutemwa pa kati kabo.
Amashiwi ya kwa Paulo kuti yaingilishako ukutesekesha kwesu ku butumikishi bwesu ubwa Bwina Kristu, ukukosha ukwiminina kwesu ku citetekelo ca cine. (2:12–6:10) Pantu, abatumikishi ba cipingo cipya balikwate shuko lya kuba mu “kusefya kwa kucimfya” (NW) mu kuba na Lesa ukutungulula! Paulo na bakabomba banankwe balikwete bukapyunga bwakatamikwa pa mulandu wa nkumbu shalangilwe kuli bene. Ukupala bene, abasubwa ba kasuba ka lelo balikwata bukapyunga bwa kuwikishiwa. Nalyo line, Inte shonse isha kwa Yehova balanonsha bambi ukupitila muli bukapyunga bwabo.
Fishapo Bumushilo Kabili ba Kapekape
Paulo alatulango kuti bakapyunga ba Bwina Kristu bafwile ukufishapo bumushilo mu kutiina Yehova. (6:11–7:16) Nga ca kuti tuli no kwiminina abashangila mu citetekelo, tufwile ukusengauka ukuba kwi koli limo na bashasumina, kabili tulekabila ukusangululwa ku kukantana kwa ku mubili no kwa ku mupashi. Abena Korinti babuulile ncitilo ya kusangulula pa kutamfya kacita wa cilubo uwa bucisenene, kabili Paulo asekelele pa kuti kalata wakwe uwa kubalilapo abalengele ubulanda ukufika ku kulapila kwi pusukilo.
Na kabili tusambilila ukuti bakapyunga batiina Lesa balalambulwa pali bukapekape bwabo. (8:1–9:15) Ukukuma ku misangulo ku “ba mushilo” abali mu kukabila, Paulo ayambwile ica kumwenako cisuma ica bena Makedonia. Baali aba bukapekape ukucila pa maka yabo, kabili asubile ukumona umusango umo wine uwa bukapekape pa lubali lwa bena Korinti. Ukupeela kwabo—no kwesu—kulingile ukufuma ku mutima, pantu “Lesa atemwo mupe wa nsansa” kabili alacindamika abantu bakwe pa musango onse uwa bukapekape.
Paulo—Umutumwa Usakamana
Lintu twapwishishisha icili conse mu mulimo wa kwa Yehova nga bakapyunga, lekeni tuitakishishe muli wene, te muli fwe bene. (10:1–12:13) Na kuba, ni mu kuba fye ne fyanso fya ku mupashi “ifya maka muli Lesa” twingawisha ukupelulula kwa bufi. “Abatumwa abacishamo” aba kuitakisha pa kati ka bena Korinti tabali na maka ya kulingana ne calembwa ca kwa Paulo ica kushipikisha pamo nga kapyunga wa kwa Kristu. Nalyo line, pa kuti eba uwasansabikwa mu kucishapo, Lesa tafumishe “umuunga mu mubili”—nakalimo amenso ya kukanamona bwino nelyo abo abatumwa ba bufi. Paulo ukucila aali no kutakisha mu mabunake yakwe nangu ni fyo pa kuti “amaka ya kwa Kristu” yengatwalilila pali wene ukupale hema. Pamo ngo mwaume uwaiminine uwashangila mu citetekelo, tashininkishe uwa pa nshiko ku batumwa bacishamo. Abena Korinti balimwene ubushinino bwa butumwa Paulo aleteleko pa kati kabo “mu kutekanya konse, ku fishibilo ne fipesha amano ne fya maka.”
Pamo nga kapyunga kabili ngo mutumwa, Paulo alikwete amabuseko ya ku mupashi aya basumina banankwe ku mutima, pamo fye nga fintu tulingile ukukwata. (12:14–13:14) ‘Mu kucankwa apakalamba aali no kupoosela kabili no kupooselwa pa mulandu wa [myeo, NW] yabo.’ Lelo Paulo asakamikwe ukuti pa kufika mu Korinti, aali no kusanga bamo abaali tabalalapila ku milimo yabo iya ku mubili. E ico, apandile bonse amano ukuyesha abene ukumona nga bali mu kutetekela kabili apepele ukuti ‘becita cibi.’ Mu kusondwelela, acincishe bene ukusekelela, ukuteululwa no kusansamushiwa, ukutontonkanya mu kusuminishanya, no kwikala mu mutende. Mwandi kufunda kwawama na kuli ifwe bene!
Twalilila Ukuyesha!
Kalata wa cibili uwa kwa Paulo ku Bena Kristu ba mu Korinti muli ifyo atubulula inshila shalekanalekana isha kuyesha fwe bene tumone nga tuli mu kutetekela. Amashiwi yakwe mu cishinka yalingile ukutusesesha ku kusansamusha bambi, pamo fye nga fintu Lesa atusansamusha mu bucushi bwesu bonse. Cintu umutumwa asosele pa lwa bukapyunga bwa Bwina Kristu cilingile ukutukuntila ku kupwishishisha bwene mu busumino ilintu tulefishapo bumushilo mu kutiina Yehova.
Ukubomfya ukufunda kwa kwa Paulo kuti pambi kwatulenga bakapekape bacililako kabili abacilapo kwaafwa. Nalyo line, amashiwi yakwe yalingile ukutucincisha ku kutakisha muli Yehova, te muli fwe bene. Yalingile ukukusha ukwangwako kwesu ukwabamo kutemwa ku basumina banensu. Kabili mu kushininkisha ifi ne fishinka fimbi mu Abena Korinti Wa Cibili kuti fyatwaafwa ‘ukuyesha fwe bene, tumone nga tuli mu kutetekela.’
[Akabokoshi ne Cikope pe bula 26]
BELEBESHA UBUKATA BWA KWA YEHOVA: Lintu Mose atentemwike ukufuma pa Lupili lwa Sinai ne fipampa fya Cishimiko, icinso cakwe calibengeshime pantu Lesa aali nalanda nankwe. (Ukufuma 34:29, 30) Paulo alumbwile ici kabili atile: “Ifwe bonse pa kulanga nga mu cilola ubukata bwa kwa [Yehova, NW] ku menso ayafimbulwa, tusangulwa aba cipasho cakwe cine ukufuma ku bukata no kuya ku bukata, umwalole cafuma kuli [Yehova, NW] Umupashi.” (2 Abena Korinti 3:7-18) Ifilola fya ku minwe ifya pa kale fyapangilwe ne fyela fya musango uyo pamo nga bronze nelyo umukuba kabili fyapukwitwe apakalamba pa kuti fingakwata imimonekele ya kubelebesha iisuma. Ukupala ifilola, abasubwa balabelebesha ubukata bwa kwa Lesa ubusanika kuli bene ukufuma kuli Yesu Kristu, mu kulundulukilako ‘ukubasangula aba cipasho’ icapeelwa no Mwana wa kwa Yehova uubelebesha ubukata. (2 Abena Korinti 4:6; Abena Efese 5:1) Ukupitila mu mupashi wa mushilo na Malembo, Lesa alabumba muli bene “ubuntu bupya,” ukubelebesha kwa mibele yakwe iine. (Abena Efese 4:24; Abena Kolose 3:10) Nampo nga isubilo lyesu lya ku mulu nelyo lya pe sonde, lekeni tulangishe ubo buntu no kuteesa ishuko lya kubelebesha ubukata bwa kwa Lesa muli bukapyunga bwesu.
[Akabokoshi ne Cikope pe bula 27]
“IFYANSO FYA BULUNGAMI”: Inshila imo intu Paulo na ba kubishanya nankwe baitashishe pamo nga bakapyunga ba kwa Lesa yali “ku fyanso fya bulungami ifya ku kulyo na ku kuso.” (2 Abena Korinti 6:3-7) Ku kulyo kwabomfiwe ku kushinsha ulupanga, kabili ku kuso ku kwikata inkwela. Nangu cingati basanshilwe ukufuma mu mbali shonse, Paulo na bakabomba banankwe baali abaipangasha ku kulwa ubulwi bwa ku mupashi. Bwalwishishe bakasambilisha ba bufi na “batumwa abacishamo” pa kuti icilonganino ca mu Korinti tacali na kupumbulwa ukufuma ku kuipeelesha kuli Kristu. Paulo tayalukile ku fyanso fya mubili wa lubembu—ubucenjeshi, ukufinsha, nelyo ulongolo. (2 Abena Korinti 10:8-10; 11:3, 12-14; 12:11, 16) Ukucila, “ifyanso” fyabomfiwe fyali fibombelo fyalungama, nelyo ifya bulungi, ku kutwala pa ntanshi ubuyo bwa kupepa kwa cine ukulwisha ukusansa konse. Inte sha kwa Yehova nomba babomfya “ifyanso fya bulungami” ifya musango uyo ku mifwaile imo ine.