Yehova Atemwa Abape ba Nsansa
“Onse acite umo apangile mu mutima wakwe; te kupeela no mutimako nangu mu kupatikishiwa, pantu Lesa atemwo mupe wa nsansa.”—2 ABENA KORINTI 9:7.
1. Ni shani fintu Lesa na Kristu baba abape ba nsansa?
YEHOVA aali e mupe wa nsansa uwa kubalilapo. Mu buseko apeele ubumi ku Mwana wakwe uwafyalwa eka kabili amubomfeshe ku kupanga bamalaika no mutundu wa muntu. (Amapinda 8:30, 31; Abena Kolose 1:13-17) Lesa atupeele ubumi no mupu ne fintu fyonse, ukusanshako imfula ukufuma ku mulu ne fiputulwa fya nshita ifya kutwale fisabo, ukwisusha imitima yesu no kusansamuka kusuma. (Imilimo 14:17; 17:25) Mu cine cine, bonse babili Lesa no Mwana wakwe, Yesu Kristu, bape ba nsansa. Mu buseko balapeela mu kuba no mupashi wabula akaso. Yehova atemenwe icalo ca mutundu wa muntu apakalamba nga nshi ica kuti “apeele Umwana wakwe uwafyalwa eka, ukuti onse uumutetekela eonaika, lelo abe no mweo wa muyayaya.” Kabili Yesu mu kukanapatikishiwa ‘apeele umweo wakwe icilubula ca pa bengi.’—Yohane 3:16; Mateo 20:28.
2. Ukulingana na Paulo, musango nshi uwa mupe Lesa atemwa?
2 Ababomfi ba kwa Lesa na Kristu balingile, kanshi, ukuba abape ba nsansa. Ukupeela kwa musango uyo kwakoseleshiwe muli kalata wa cibili uwa mutumwa Paulo ku Bena Kristu mu Korinti, uwalembelwe mupepi na 55 C.E. Mu kumonekesha ukulosha ku bupe bwa kuitemenwa no bwa pa mbali ubwa ndalama ubwacitilwe ukucilisha ku kwaafwa Abena Kristu baali mu kukabila mu Yerusalemu na Yudea, Paulo atile: “Onse acite umo apangile mu mutima wakwe; te kupeela no mutimako nangu mu kupatikishiwa, pantu Lesa atemwo mupe wa nsansa.” (2 Abena Korinti 9:7; Abena Roma 15:26; 1 Abena Korinti 16:1, 2; Abena Galatia 2:10) Ni shani fintu abantu ba kwa Lesa baankulako ku mashuko ya mu nshita aya kupeela? Kabili cinshi twingasambilila ukufuma ku kufunda kwa kwa Paulo pa kupeela?
Ukuseshiwa ne Mitima ya Kuitemenwa
3. Kufika ku cipimo nshi abena Israele baafwilishe ubukuule bwe hema lya kulaishanya ilya kupepa kwa kwa Yehova?
3 Imitima ya kuitemenwa ilasesha abantu ba kwa Lesa ku kuipeela abene beka no bukumu bwabo mu kwafwilisha imifwaile ya bulesa. Ku ca kumwenako, abena Israele ba mu kasuba ka kwa Mose mu buseko baafwilishe ubukuule bwe hema lya kulaishanya ilya kupepa kwa kwa Yehova. Imitima ya banakashi bamo yabaseseshe ukupyata amasako ya mbushi, ilintu abaume bamo babombele nge ntukushi. Abantu mu nsansa bapeele golde, silfere, imbao, isha kolokondwe, ne fintu fimbi nge “ca musangulo ca kwa Yehova” ica kuitemenwa. (Ukufuma 35:4-35) Baali bakapekape nga nshi ica kuti ifisolobelo fyasangwilwe “fyalikumene ku mulimo onse ku kuucita, no kushalapo.”—Ukufuma 36:4-7.
4. Ni mu kuba na mibele nshi iya mutima Davidi na bambi basangwilileko ukulola kwi tempele?
4 Imyanda ya myaka pa numa, Imfumu Davidi asangwileko apakalamba ukulola kwi tempele lya kwa Yehova ilyali no kukuulwa no mwana wakwe Solomone. Apantu Davidi ‘atemenwe ŋanda ya kwa Lesa,’ apeele “fyuma” fyakwe ifya golde na silfere. Bacilolo, bamushika, na bambi ‘baiswishe ukuboko kwabo ne ca bupe ca kuli Yehova.’ Mu kuba na ca kufumamo nshi? Awe, “abantu balisaminwe pa kupeela kwabo ku kuitemenwa, pantu ne mitima ya cishinka bapeele ku kuitemenwa kuli Yehova”! (1 Imilandu 29:3-9) Baali abape ba nsansa.
5. Ni shani fintu abena Israele baafwilishe ukupepa kwa cine ukupulinkana imyanda ya myaka?
5 Ukupulinkana imyanda ya myaka, abena Israele bakwete shuko lya kwafwilisha ihema lya kulaishanya, amatempele ya pa numa, ne milimo ya bushimapepo ne ya bwina Lebi kulya. Ku ca kumwenako, mu kasuba ka kwa Nehemia abaYuda bapingwilepo mu kukosa ukucita imisangulo ku kusungilila ukupepa kwasanguluka, pa kuba abaibukila ukuti tabalingile ukulekeleshe ŋanda ya kwa Lesa. (Nehemia 10:32-39) Mu musango umo wine ilelo, Inte sha kwa Yehova mu nsansa balacito bupe ku kukuula no kusungilila ififulo fya kulonganinapo na ku kwafwilisha ukupepa kwa cine.
6. Peela ifya kumwenako fya kupeela kwa nsansa ukwa Bena Kristu.
6 Abena Kristu ba mu kubangilila baali abape ba nsansa. Ku ca kumwenako, Gai alebomba “ica cishinka” mu kuba uwa cileela kuli abo abaleenda pa mulandu wa mabuseko ya Bufumu, pamo fye nga fintu Inte sha kwa Yehova batambulula icileela kuli bakangalila benda abatumwa nomba na Watch Tower Bible and Tract Society. (3 Yohane 5-8) Cisenda ifipooswa fimo ukukwata aba bamunyina ukwenda ukuya ku filonganino no kutambulula icileela kuli bene, lelo fintu ici cabe ca kunonsha lwa ku mupashi!—Abena Roma 1:11, 12.
7. Ni shani fintu abena Filipi babomfeshe ubukumu bwabo ubwa ku mubili?
7 Ifilonganino mu cinkumbawile fyalibomfya ubukumu bwa fiko ubwa ku mubili ku kutwala pa ntanshi amabuseko ya Bufumu. Ku ca kumwenako, Paulo aebele abasumina mu Filipi ukuti: “Na mu Tesalonika mwatumine limo na libili ku fya kukabila kwandi. Pantu te ca bupe e fisabo mfwaisha; lelo mfwaisha ifilemusandulukila.” (Abena Filipi 4:15-17) Abena Filipi bapeele mu nsansa, lelo fya kusangwilako nshi fyacincishe ukupeela kwa musango uyo ukwa nsansa?
Cinshi Cicincisha Ukupeela kwa Nsansa?
8. Ni shani fintu wingashininkisha ukuti umupashi wa kwa Lesa ulasesha abantu bakwe ku kuba abape ba nsansa?
8 Umupashi wa mushilo uwa kwa Yehova, nelyo amaka ayabomba, yasesha abantu bakwe ku kuba abape ba nsansa. Lintu Abena Kristu ba mu Yudea baali mu kukabila, umupashi wa kwa Lesa waseseshe abasumina bambi ku kubaafwa lwa ku mubili. Pa kukoselesha Abena Kristu mu Korinti ukucita apapela amaka yabo mu kupeela ubupe bwa musango uyo, Paulo apeele ica kumwenako ca filonganino mu Makedonia. Nangu cingati abasumina aba mu Makedonia balekumanya ukupakasa no bubusu, balangishe ukutemwa kwa bumunyina pa kupeela ukucila pa maka yabo aya cine cine. Balombele nelyo fye ishuko lya kupeela! (2 Abena Korinti 8:1-5) Imifwaile ya kwa Lesa tayashintilila maka maka pa bupe bwa bukankaala. (Yakobo 2:5) Ababomfi bakwe abaipeela ababusu lwa ku mubili baba e ntulo ikalamba mu kwafwilisha mu ndalama umulimo wa kushimikilo Bufumu. (Mateo 24:14) Nalyo line, tabacula pa mulandu wa bukapekape bwabo, pantu Lesa mu kukanafilwa alapayanya ku kukabila kwa bantu bakwe muli uyu mulimo, kabili amaka yaba ku numa ya kutwalilila kwa uko no kwingilishako mu mupashi wakwe.
9. Ni shani fintu icitetekelo, ukwishiba, no kutemwa fyaampana ku kupeela kwa nsansa?
9 Ukupeela kwa nsansa kucincishiwa ne citetekelo, ukwishiba, no kutemwa. Paulo atile: “Ifyo fine mwaba [abena Korinti] abacisha muli fyonse, mu citetekelo, mu nsoso, mu kwishiba, kabili mu kucincila, na mu kutemwa kwenu kwa kuli ifwe, e fyo mube abacisha na muli ici ca nkumbu. Ifi ndesosa nshilesosa ifye funde, lelo ukuti mu kucincila kwa bambi ningalengo kuti ukutemwa kwenu na ko kumoneke ukuti kwaba ukwine kwine.” (2 Abena Korinti 8:7, 8) Ukusangwilako ku mifwaile ya kwa Yehova, ukucilisha lintu umupe akwete ifyapelebela, kufwaya icitetekelo mu kupayanya kwa kwa Lesa ukwa nshita ya ku ntanshi. Abena Kristu abapaka mu kwishiba bafwaya ukubombela imifwaile ya kwa Yehova, kabili abo abapaka mu kwishiba kwa kuli wene na bantu bakwe babomfya mu nsansa ubukumu bwabo ku kutwala pa ntanshi imifwaile yakwe.
10. Mulandu nshi cingasoselwa ukuti ica kumwenako ca kwa Yesu cisesesha Abena Kristu ku kupeela mu nsansa?
10 Ica kumwenako ca kwa Yesu cisesesha Abena Kristu ku kupeela mu nsansa. Pa numa ya kucincisha abena Korinti ukupeela ukufuma ku kutemwa, Paulo atile: “Mwaishibo kusenamina kwa kwa Shikulwifwe Yesu Kristu, ukuti nelyo aali uwacindama aisangwile umubusu pa mulandu wenu, ukuti imwe mu bubusu bwakwe e mo mucindamine.” (2 Abena Korinti 8:9) Umucindami mu mulu ukucila pa mwana mwaume uuli onse umbi uwa kwa Lesa, Yesu aisangwile ica fye kuli ifi fyonse kabili abuulile ubumi bwa buntunse. (Abena Filipi 2:5-8) Pa kusanguka umubusu muli iyi nshila yabula akaso, nangu cibe fyo, Yesu asangwilileko ku kushishiwa kwe shina lya kwa Yehova kabili abikile ubumi bwakwe pa nshi nge lambo lya cilubula ku kumwenamo kwa bantunse abali no kulipokelela. Mu kumfwana ne ca kumwenako ca kwa Yesu, bushe tatulingile ukupeela mu nsansa ku kwaafwa bambi no kusangwilako ku kushishiwa kwe shina lya kwa Yehova?
11, 12. Ni shani fintu imitantikile isuma ingatulenga ukuba abape ba nsansa?
11 Imitantikile isuma ilenga ukupeela kwa nsansa ukucitikako. Paulo aebele abena Korinti ukuti: “Ku bwa ntanshi bwa mulungu no mulungu, bonse mupaatulepo fimo no kubika, umo mwingakwatila, ukuti ilyo nkesa kwikaba kusangula.” (1 Abena Korinti 16:1, 2) Mu nshila yapalako iya pa mbali kabili iya kuitemenwa, abo abalefwaya ukupeela ubupe ku kutwala pa ntanshi umulimo wa Bufumu ilelo kuti bacita bwino ukubika pa mbali shimo isha mu ndalama shabo shintu basanga kuli iyo mifwaile. Nge ca kufumamo ca mitantikile isuma iya musango uyo, Inte ngo muntu umo umo, indupwa, ne filonganino kuti bacita ubupe ku kulundulula ukupepa kwa cine.
12 Ukubomfya amapange ya kusangwilako kukatulenga aba nsansa. Nga fintu Yesu asosele, “mwalibe nsansa ishafulilako mu kupeela ukucila ishaba mu kupokelela.” (Imilimo 20:35) E co abena Korinti baali na maka ya kwingilishako ubuseko bwabo pa kukonka ukufunda kwa kwa Paulo ku kufikilisha ipange lyabo ilya mwaka umo ubukokole ku kutuma indalama ku Yerusalemu. “Kwasekelelwa umo umuntu akwatila, te umo ashakwatila,” e fyo asosele. Lintu umuntu umo acita imisangulo umo akwatile, ilingile ukukatamikwa apakalamba. Nga ca kuti twacetekela muli Lesa, kuti alinganye fintu ica kuti abo abakwete ifingi bali ni bakapekape, te ba kupoosaika, kabili abo abakwete finono tabakwete ukubulisha ukucefya ubukose bwabo na maka ku kumubombela.—2 Abena Korinti 8:10-15.
Ukwangalila Kwabamo Kusakamana ukwa Kupeela
13. Mulandu nshi abena Korinti baali no kukwatila ukucetekela mu kwangalila kwa kwa Paulo ukwa bupe?
13 Nangu cingati Paulo ayangalile ukutantika kwa bupe pa kuti abasumina abaali mu kukabila bengaba na maka ya kuipakisha ukukumbusuka kwa ku mubili no kuibimba mu kuba no lupikwe lwacilapo mu mulimo wa kushimikila, atemwa wene nelyo bambi tababuulilepo indalama ishili shonse ku milimo yabo. (2 Abena Korinti 8:16-24; 12:17, 18) Paulo abombele ku kukumanisha ukukabila kwakwe kwine ukwa ku mubili mu cifulo ca kubika ifisendo fya mu ndalama pa cilonganino icili conse. (1 Abena Korinti 4:12; 2 Abena Tesalonika 3:8) Mu kupeela ubupe kuli wene, kanshi, abena Korinti baleseekesha bwene ku mubomfi wacetekelwa, uubombesha uwa kwa Lesa.
14. Ukukuma ku kubomfiwa kwa bupe, calembwa nshi Watch Tower Society yakwata?
14 Ukutula pa kulembeshiwa kwa mwi funde ukwa Watch Tower Bible and Tract Society mu 1884, abasangwilako balikwata ubushininkisho bwa kuti yaba mwangalishi wacetekelwa uwa bupe bonse ubwasekeshiwa kuli yene mu kwimininako umulimo wa Bufumu ubwa kwa Yehova. Ukulingana na charter ya iko, Sosaite ilaibikilisha ukwisusha ukukabila kwakulisha ukwa bantu bonse, ukukabila ku fintu fya ku mupashi. Ici cicitwa mu musango wa fitabo fya Baibolo no kusambilisha pa fya kunonke pusukilo. Ilelo, Yehova alekalakasha ukulonganikwa kwa bapale mpaanga mu kuteyanya kwakwe ukuletanunuka, kabili ipaalo lyakwe pa mibomfeshe ya mano iya bupe mu mulimo wa kushimikilo Bufumu buli bushininkisho bwalengama ubwa kusuminisha kwa bulesa. (Esaya 60:8, 22) Tuli abacetekela ukuti akatwalilila ukusesha imitima ya bape ba nsansa.
15. Mulandu nshi untu uyu magazini mu nshita mu nshita alumbula ubupe?
15 Sosaite mu nshita mu nshita ibomfya imikululo ya uyu magazini ku kwibukishako bakabelenga kwi shuko lyabo ilya kupeela ubupe bwa kuitemenwa ku mulimo wa kushimikilo Bufumu uwa mu kusaalala kwa calo. Ici tacili kulombelesha, lelo cili ca kucinkulako kuli bonse abalefwaisha ukwafwilisha “umulimo wa mushilo uwa mbila nsuma” ilyo Lesa alebapeelo lubanda. (Abena Roma 15:16, NW; 3 Yohane 2) Society ibomfya indalama shonse ishapeelwa mu nshila yacilishapo kumemenga pa kwishibisha ishina lya kwa Yehova no Bufumu. Imisangulo yonse ilapokelelwa mu kuba no kutasha, ileshibishiwa, no kubomfiwa ku kwananya imbila nsuma iya Bufumu bwa kwa Lesa. Ku ca kumwenako, ukupitila muli ishi nshila imibombele ya bamishonari ilatungililwa mu fyalo ifingi, ne fibombelo fya kupulintila ifyakatama ku kusalanganishiwa kwa kwishiba kwa Baibolo filasungililwa no kutanununwa. Ukulundako, imisangulo ku mulimo wa mu kusaalala kwa calo ilabomfiwa ku kufimba ifipooswa fileingilishako ifya kupulinta amaBaibolo ne mpapulo shalemenena kuli Baibolo pamo pene na makaseti ya audio na video. Mu nshila sha musango uyo amabuseko ya Bufumu yalatwalwa pa ntanshi ku bape ba nsansa.
Te mu Kupatikishiwa
16. Nangu cingati banono aba Nte sha kwa Yehova abali abakankaala lwa ku mubili, mulandu nshi imisangulo yabo itashiwa?
16 Ni Nte shinono isha kwa Yehova ababa abakankaala lwa ku mubili. Nangu cingati kuti pambi bapeela ubwingi bwa ndalama bunono ku kulundulula amabuseko ya Bufumu, ubupe bwabo nangu ni fyo bwalikatama. Lintu Yesu amwene mukamfwilwa mubusu alepoosamo utunyampuku tubili utwa ndalama mu cipao ce tempele, atile: “Uyu mukamfwilwa mubusu apooselemo icacilamo kuli bonse; pantu bonse [aba kusangwilako bambi] bene ni ku fipakile fyabo bapooselemo ifya bupe, lelo wene ni ku kubulwa kwakwe apooselemo fyonse ifya maliila ifyo akwete.” (Luka 21:1-4) Nangu cingati ica bupe cakwe cali cinono, aali umupe wa nsansa—kabili umusangulo wakwe walitashiwe.
17, 18. Cinshi cili ubucindami bwa mashiwi ya kwa Paulo pali 2 Abena Korinti 9:7, kabili cinshi calangililwa kwi shiwi lya ciGreek ilyapilibulwa “wa nsansa”?
17 Ukulosha ku mulimo wa kukumbusuka uwa Bena Kristu ba mu Yudea, Paulo atile: “Onse acite umo apangile mu mutima wakwe; te kupeela no mutimako nangu mu kupatikishiwa, pantu Lesa atemwo mupe wa nsansa.” (2 Abena Korinti 9:7) Umutumwa kuti pambi aloseshe ku ciputulwa ca Amapinda 22:8 mu bupilibulo bwa Septuagint, apasoso kuti: “Lesa apaala umupe wa nsansa; kabili akapayanya ku kubulisha kwa milimo yakwe.” (The Septuagint Bible, iyapilibulwa na Charles Thomson) Paulo apyanikishe “apaala” na “atemwa,” lelo kuliko ukulundinkana, pantu ukulobolola kwa mapaalo kwisako ukufuma ku kutemwa kwa kwa Lesa.
18 Umupe wa nsansa mu cine cine ali wa nsansa ukupeela. Pantu, ukufuma ku numbwilo ya ciGreek iyapilibulwa “wa nsansa” pali 2 Abena Korinti 9:7 kwisako ishiwi “ukusekesha”! Pa numa ya kulondolola ici, uwasambilila R. C. H. Lenski atile: “Lesa atemwa umupe wasansamuka, uwa buseko, uwa nsansa . . . [untu] icitetekelo [cakwe] cikupwa mu kumwentula lintu ishuko lya mu nshita na limbi ku kupeela lyamufikila.” Umuntu wakwata umupashi wa buseko uwa musango uyo tapeela no mutimako nelyo mu kupatikishiwa lelo akwata umutima wakwe mu kupeela kwakwe. Bushe waliba uwa nsansa ifyo pa lwa kupeela mu kwafwilisha kwa mabuseko ya Bufumu?
19. Ni shani fintu Abena Kristu ba mu kubangilila bacitile imisangulo?
19 Abena Kristu ba mu kubangilila tabapishishemo imbale ya musangulo nelyo ukubelesha ica pe kumi pa kusangula icalenge kumi ica mu malipilo yabo ku mifwaile ya butotelo. Ukucila, imisangulo yabo yali iya kuitemenwa umupwilapo. Tertullian, uwaalwilwe ku Bwina Kristu mupepi na 190 C.E., alembele ukuti: “Nangu cingati twalikwata icipao cesu, tacapangilwa ne ndalama sha kushita ipusukilo, pamo ngo butotelo ubwakwata umutengo wa buko. Pa bushiku bwa pa mweshi [mu kumonekesha limo mu mweshi], nga ca kuti atemwa, umo umo alabikamo ubupe bunono; lelo lyeka fye nga ca kuti caba buseko bwakwe, kabili lyeka fye nga ca kuti aba na maka; pantu takwaba ukupatikisha; conse kuitemenwa.”—Apology, Icipandwa XXXIX.
20, 21. (a) Cinshi cintu uwafumine uwa mu kubangilila uwa uyu magazini asosele pa lwe shuko lya kwafwilisha imifwaile ya kwa Lesa mu fya ndalama, kabili ni shani fintu ici cibomba nelyo fye ni nomba? (b) Cinshi cicitika lintu twacindika Yehova ne fyuma fyesu?
20 Ukupeela kwa kuitemenwa kwaliba lyonse mwata pa kati ka babomfi ba kwa Yehova aba mu kasuba ka lelo. Pa nshita shimo, nangu cibe fyo, bamo tabashukila mu kukumanina ishuko lyabo ilya kwafwilisha imifwaile ya kwa Lesa pa kupeela ubupe. Mu February 1883, ku ca kumwenako, uyu magazini atile: “Bamo bakwete icisendo cikalamba nga nshi ica mpiya [ica fya ndalama] pa mulandu wa bambi, ica kuti amaka yabo aya kwaafwa mu fya ndalama yaleshiminina ukufuma ku kucishamo kubomba no kunaka, kabili muli ifyo ukubomfiwa kwabo kulonaika; kabili te ico fye ceka, lelo abo . . . abashaumfwikisha imibele, balilufye shuko lya mu nshita pa mulandu wa kubulwa ukubomba muli iyo ntunga.”
21 Ilyo ibumba likalamba lilekonkomokela mu kuteyanya kwa kwa Yehova ilelo, kabili ilyo umulimo wa kwa Lesa uletanunukila muli Europe ya ku Kabanga na mu fifulo fimbi ifyabindilwe ku numa, kuliko ukukabila kuleingilishako ku kutanununwa kwa mafakitari ya kupulintilamo ne fibombelo fimbi. AmaBaibolo yalundwako ne mpapulo shimbi fifwile ukupulintwa. Imilimo iingi iya teokratiki ilecitwa; nangu cibe fyo, imo kuti yaba na maka ya kutwalilila mu kwangufyanya kwacilapo nga ca kuti kwaliko indalama shalinga. Kwena, natukwata icitetekelo ca kuti Lesa akapayanya icili icakabilwa, kabili natwishiba ukuti abo ‘abalecindika Yehova ku fyuma fyabo’ bakapaalwa. (Amapinda 3:9, 10) Mu cine cine, “uutanda alefusha, akaseepe fyafula.” Yehova ‘akatupeelo bucindami muli fyonse ifya bukapekape,’ kabili ukupeela kwesu ukwa nsansa kukalenga abengi ukutootela no kulumbanya wene.—2 Abena Korinti 9:6-14.
Langa Ukutasha Kobe pa fya Bupe fya kwa Lesa
22, 23. (a) Ca bupe nshi icishingalandwa ica kwa Lesa? (b) Apantu tulatesekesha ifya bupe fya kwa Yehova, cinshi tulingile ukucita?
22 Ukuseshiwa no kutasha kwashika, Paulo umwine wine atile: “Kube ukutootela kuli Lesa pa ca bupe cakwe icishingalandwa!” (2 Abena Korinti 9:15) Nge “cikonsolwelo” ca pa membu sha Bena Kristu basubwa ne sha abo aba pano isonde, Yesu e citendekelo kabili inshila ku ca bupe ca kwa Yehova icishingalandwa. (1 Yohane 2:1, 2) Cilya ca bupe cili “kusenaminwa ukwacishamo kwa kuli Lesa” uko alanga ku bantu bakwe pe sonde ukupitila muli Yesu Kristu, kabili calipaka kwi pusukilo lyabo na ku bukata bwa kwa Yehova no kwebelwa.—2 Abena Korinti 9:14.
23 Ukutasha kwesu ukwashika kuya kuli Yehova pa ca bupe cakwe icishingalandwa ne fya bupe fimbi ifingi ifya ku mupashi na ku mubili ku bantu bakwe. Pantu, ubusuma bwa kwa Shifwe wa ku mulu kuli ifwe bwalibo bwa kupapusha nga nshi ica kuti bwacila pa maka ya buntunse aya numbwilo! Kabili mu kushininkisha bulingile ukutucincisha ku kuba abape ba nsansa. Mu kuba no kutesekesha kwa kuyumfwa kwa kufuma ku mutima, lyene, natubombe apapela amaka yesu ku kulundulula imifwaile ya kwa Lesa wesu uwa bukapekape, Yehova, umupe wa nsansa wacilishapo!
Bushe Uleibukisha?
◻ Imitima ya kuitemenwa yalisesha abantu ba kwa Yehova ukucita cinshi?
◻ Cinshi cicincisha ukupeela kwa nsansa?
◻ Ni shani fintu Watch Tower Society ibomfya ubupe bonse buntu ipokelela?
◻ Musango nshi uwa mupe Lesa atemwa, kabili ni shani fintu tulingile ukulanga ukutasha kwesu ku fya bupe Fyakwe ifingi?
[Icikope pe bula 15]
Lintu ihema lya kulaishanya lyalekuulwa, abena Israele babombele mu kupikintika kabili bacitile imisangulo ya bukapekape kuli Yehova
[Icikope pe bula 18]
Ubupe ukupala bulya ubwa kwa mukamfwilwa umubusu bulatesekeshiwa kabili bwalibo bwakatama