Ukusakamana Ifikwatwa fya kwa Shikulu

¹ Mu nshita sha Baibolo kangalila ali no mulimo wacindama sana kabili balimucetekele. Abrahamu apeele kangalila umulimo wa kufwaila umwana wakwe Isaki umukashi. (Ukute. 24:1-4) Limbi kangalila ali no mulimo wa kushininkisha ukutila umutande wa kwa Abrahamu watwalilila. Uyu wali mulimo uukalamba icine cine! E mulandu wine umutumwa Paulo alandile ukutila: “Icifwaikwa muli bakangalila ca kuti umuntu asangwe uwa cishinka!”—1 Kor. 4:2.

² Bukangalila bwa Bwina Kristu: Imilimo imo imo iya Bwina Kristu yalondololwa mu Baibolo nge milimo ya bukangalila. Ku ca kumwenako, umutumwa Paulo alandile ku Bena Efese pa lwa ‘bukangalila bwa cikuuku ca bupe fye ica kwa Lesa ico apeelwe pa mulandu wabo.’ (Efes. 3:2; Kol. 1:25) Amwene umulimo wakwe uwa kushimikila aba nko shonse imbila nsuma nga bukangalila ubo ali no kubomba mu cishinka. (Imil. 9:15; 22:21) Umutumwa Petro alembeele abasubwa banakwe ukuti: “Musekelelane ukwabula ukung’winta Ifyo umo na umo apokelela ica bupe, fibomfyeni ku kupyungilana nga bakangalila basuma aba cikuuku ca bupe fye ica kwa Lesa ica misango misango.” (1 Pet. 4:9, 10; Heb. 13:16) Fyonse ifyuma ifyo balya Bena Kristu bakubalilapo bakwete cali pa mulandu wa cikuuku ca bupe fye ica kwa Yehova. Kanshi, e baleangalila filya fikwatwa kabili balekabila ukufibomfya mu nshila ya Bwina Kristu.

³ Na lelo line Inte sha kwa Yehova e fyo bamona ifyuma. Baliipeela kuli Yehova Lesa kabili bamona fyonse ifyo bakwata—ubumi bwabo, amaka yabo, ne fyuma fyabo nge fisabo fya “cikuuku ca bupe fye ica kwa Lesa ica misango misango.” Aba bakangalila basuma, balishiba ukutila bakalubulula kuli Yehova Lesa pa fyo babomfya ifi fintu. Ukulunda pa fyo bakwata, paba no bwishibilo bwa mbila nsuma. Ici naco cikwatwa ico bafwaya ukubomfya mu nshila isuma: e kutila mu kucindike shina lya kwa Yehova no kwafwa abantu bambi ukwishiba icine.—Mat. 28:19, 20; 1 Tim. 2:3, 4; 2 Tim. 1:13, 14.

⁴ Inte sha kwa Yehova balebomba shani imilimo yabo iya bukangalila? Lipoti wa mwaka alelanga ukuti mu mwaka wapwile, mwi sonde lyonse Inte sha kwa Yehova bapoosele amaawala ukucila pali 1 bilioni mu kubila “imbila nsuma iya bufumu” kabili batungulwile amasambililo ya Baibolo ukucila pali 6,000,000 ku bantu abalefwaya ukusambilila Baibolo. (Mat. 24:14) Na kabili bucishinka bwa aba bakangalila kuli Yehova bwamonekele muli bukapekape bwabo ilyo balesangwilako ku mulimo wa mwi sonde lyonse no kwafwilisha umulimo wa kukuula Amayanda ya Bufumu, mu fyo bali abacileela kuli bakangalila benda na kuli bambi, na pa fyo baali ne cikuuku nga nshi ku bali mu kukabila, pamo nga balecushiwa ku nkondo. Nge bumba, Abena Kristu ba cine balesakamana bwino ifikwatwa fya kwa Shikulu.

⁵ “Kangalila wa Cishinka, Uwashilimuka”: Kangalila kuti aba umuntu umo nangu ibumba ilyateyanishiwa bwino. Yesu aitile icilonganino ca Bena Kristu basubwa pe sonde ukutila, “kangalila wa cishinka, uwashilimuka.” (Luka 12:42) Umulimo wa uyu “kangalila wa cishinka” wa kupeele “filyo” no kuba pa ntanshi mu mulimo wa kubila imbila nsuma mwi sonde lyonse. (Ukus. 12:17) Umulimo umbi uwapala uyu, uo Lesa apeela kangalila wa cishinka, uwimininwako ne Bumba Litungulula kusakamana bwino ifikwatwa na “matalanti” ya ku mupashi. (Mat. 25:15) Filya ficita ‘kangalila wa cishinka’ e fyo ne misambo icita. Balabombesha mu kusakamana bwino indalama shonse ishisangulwa ku kulundulula umulimo wa Bufumu. Iyi misambo ilasakamana bwino imisangulo yonse kabili “kangalila wa cishinka, uwashilimuka” aliba no mulimo wa kushininkisha ukutila imisangulo yabomfiwa bwino kabili mu nshila ilefwaikwa, ukwabula ukuyonaula

⁶ Ukukulilako kwa mulimo wa kupulinta uwa Nte sha kwa Yehova e kulelangilila ukutila imisangulo ilabomfiwa bwino. Ukushalika ama Baibolo ukubikapo ne mpapulo sha Baibolo—bamagazini, ama buku, ama broshuwa, ututabo, amatrakiti na matrakiti yakalamba ayetwa ati, Imbila ya Bufumu—ifi fyonse fyalibomfiwa bwino mu kusabankanya “imbila nsuma” muli shino “nshiku sha kulekelesha.” (Marko 13:10; 2 Tim. 3:1) Ulupungu lwa kwa Kalinda e lubomfiwa sana ku kupeelelamo ifya “kulya pa nshita yalinga” ku “ba mu ng’anda ya kwa Lesa” na ku banabo “ibumba likalamba” ilya “mpanga shimbi.”—Mat. 24:45; Efes. 2:19; Ukus. 7:9; Yoh. 10:16.

⁷ Pa kubala, Inte sha kwa Yehova balepulintisha impapulo ku twampani twa makwebo. Lelo muli ba1920, bamwene ukuti kuti cawamisha nga ca kutila ababomfi ba kwa Yehova balaipulintila impapulo abene kabili kuti balenonkelamo lwa ku mupashi. Ukutendeka muli ba1920, umulimo wa kupulinta mu Brooklyn, ku New York, wali fye uunono lelo waile ulekula panono panono ukufikila waba uukalamba.

⁸ Pa numa ya Nkondo ya Calo iyalenga Bubili, ukupulinta kwalitendeke kale kale mu fyalo ifingi pamo nga mu Canada, Denmark, England, Greece, South Africa, Switzerland, na ku masamba ya Germany. Mu kubangilila kwa ba1970, ifyalo pamo nga Australia, Brazil, Finland, Ghana, Japan, Nigeria, ne fyalo fya bena Philippines na fyo fyatendeke ukuipulintila impapulo. Ifyalo fimo pali ifi fyalo fyalepulinta ne fitabo ifikalamba.

⁹ Muli ba1970 na mu kubangilila kwa ba1980, kwali ukulunduluka ukukalamba mu fyo balebomfya pa kupulinta, kabili Inte sha kwa Yehova basukile batendeka ukubomfya inshila sha kupulintilamo ishipya. Kale balepulintila na mashini witwa letterpress machine. Mu kuya kwa nshita batendeke ukubomfya bamashini bambi abapya. Icafumamo ca kutila, impapulo ishisuma ishakwete ifikope ifyabalabata shilapulintwa, ukupusanako na filya caleba kale ilyo balepulintila na mashini wa letterpress. Kabili ukubomfya kompyuta na ko kwalyalula inshila ya kupulintilamo ifintu. Inte sha kwa Yehova batendeke ico beta ati MEPS (Multilanguage Electronic Phototypesetting System) iibomfiwa pa kupulinta impapulo mu ndimi shapusanapusana ukucila pali 370. Takwaba programu abomfiwa mu twampani twa makwebo uwingalingana na MEPS ukupulinta impapulo mu ndimi ishafulisha ifyo.

¹⁰ Tuletasha pa fyo MEPS ibomba ne pa nshila shimbi ishipya ishabako nomba isha kutuminamo ifyebo, pantu kwali kulunduluka ukukalamba na kumbi mu mipekanishishe ya ca kulya pa nshita yalinga. Ilyo takulaba ifi fya kupulintilamo ifipya, bamagazini abali mu ndimi shimbi ishishali mu ciNgeleshi balefuma pa numa ya myeshi iingi nelyo fye umwaka ninshi iciNgeleshi califuma kale. Nomba Ulupungu lwa kwa Kalinda lufuma pa nshita imo ine mu ndimi 150 e lyo na Loleni! mu ndimi 85. Ili lipaalo icine cine! Ishi shonse ni nshila shisuma isha kubomfeshamo ifikwatwa fya kwa Shikulu!

¹¹ Nangu ca kuti bamashini babomfiwa nomba balangufyanya ukupulinta, indalama ishingi shilapooswapo. Tapakokwele basangile ukutila ukupulinta bamagazini mu fyalo ifyapusanapusana 51 takwali ukwa mutengo. E co muli ba1990 “kangalila wa cishinka” atontonkenye pa nshila shimbi isha kubombelamo ifintu. Finshi ifyo asondwelele?

¹² Ifyo bafwailishe fyalangile ukutila “ifyuma” ifisangulwa ne Nte sha kwa Yehova e lyo ne fibusa fyabo fikalabomfiwa bwino nga ca kutila umulimo wa kupulinta wabikwa pamo. Kanshi panono panono baile balecefyako imisambo ya kupulinta impapulo. Icalo ca Germany e catendeka ukupulinta bamagazini ne fitabo fya mu fyalo fyaba ku Kabanga na Masamba ya Bulaya, ukubikako ne fyalo fimbi ifyo kale fyaleipulintila impapulo. Icalo ca Italy e cipulinta bamagazini ne fitabo fya fyalo fyaba mu ncende shimo shimo isha mu Afrika na ku kapinda ka ku kulyo na kabanga ka ku Bulaya, ukubikapo na Greece na Albania. Mu Afrika, ifyalo ifyaba no mulimo wa kupulinta ni Nigeria na South Africa. E fyo caba fye na mwi sonde lyonse, balicefyako ifyalo fya kupulinta impapulo.

¹³ Ukusakamana Ifikwatwa: Mu Mayanda ya Bufumu yonse aya Nte sha kwa Yehova aya mwi sonde lyonse, mwaliba utubokoshi twa misangulo utwalembwapo ukutila: “Imisangulo ya Mulimo wa mwi Sonde Lyonse—Mateo 24:14.” Imisangulo ya kuitemenwa ibikwa muli uto tubokoshi ilabomfiwa lyonse ilyo kwaba ukukabila. “Kangalila wa cishinka” no musambo umo umo e bapingula ifya kubomfya imisangulo. Kanshi nga ifunde lya mu calo lyasuminisha, indalama shibikwa mu tubokoshi twa misangulo mu calo cimo kuti bashibomfya mu kwafwilisha umulimo uwa Nte sha kwa Yehova mu fyalo fimbi ifyaba ukutali. Mu fyalo fimo imisangulo balaibomfya lintu kwaima ubukangalume ku kwafwilisha abasumina banabo abalecula ku fintu pamo nge fikuuku, ifinkukuma, ne nkondo sha bana calo. Imisangulo imo ine ilabomfiwa mukwafwilisha bamishonari mu fyalo ukucila pali 235.

¹⁴ Mu filonganino fyonse ifya Nte sha kwa Yehova, ukubilisha pa ndalama ilingi line kubako fye umuku umo pa mweshi kabili pa maminiti fye ayanono. Mu Ng’anda ya Bufumu nelyo pa kulongana kukalamba takuba ukupishamo imbale sha misangulo. Takuba ukulombelesha indalama. Tabapeela abantu incito ya kuya balepitamo ukulombelesha indalama. Ilingi line mu Ulupungu lwa kwa Kalinda muba fye icipande cimo pa mwaka icilondolola ifyo abalefwaya ukupeela imisangulo ya kwafwilisha umulimo uwa mwi sonde lyonse ku Watch Tower Bible and Tract Society bengacita. Muli Loleni! tabalandamo sana pa fyo indalama shingasangulwa ku Society. Nomba uyu mulimo wakulisha ifi mwi sonde lyonse uwa kubila imbila nsuma, ukukuula Amayanda ya Bufumu, ukusakamana ababa mu mulimo waibela uwa nshita yonse, no kwafwilisha Abena Kristu baba mu kukabila, wafwilishiwa shani? Yehova alipaala abantu bakwe mu nshila ya kupapusha pa kubalenga ukuba bakapekape. (2 Kor. 8:2) Tuletasha bonse abasangwilako ku ‘kucindika Yehova ne fyuma fyabo.’ Kuti baba abashininwa ukutila “kangalila wa cishinka” akatwalilila ukulasakamana ifikwatwa fya kwa Shikulu. Tulepepela no kutila Yehova akatwalilila ukupaala imilimo yonse iilecitwa ku kulundulula umulimo wa mwi sonde lyonse.