Mulekuulana
1 Umutumwa Paulo alibombeshe sana ukukosha abasumina banankwe. (Imil. 14:19-22) Na ifwe tulasakamana bamunyinefwe nga bali na mafya, kabili tulafwaya ukubafwa. Baibolo itila bonse fye tufwile ukusakamana abanensu, te baeluda fye bafwile ukubasakamana. (Rom. 15:1, 2) Moneni inshila shibili isho twingalangilamo ukuti tuleumfwila uku kufunda kusuma ukwa kuti “Mulesansamushanya no kukuulana.”—1 Tes. 5:11.
2 Ilukeni Ifyo Bambi Balekabila: Icebo ca kwa Lesa citweba ukuti Dorka “aiswilemo imilimo isuma ne fya nkumbu ifyo alecita.” (Imil. 9:36, 39) Alemona abalekabila kabili aleesha apapela amaka yakwe ukubafwilisha. Ala mwandini aaba ca kumwenako cisuma sana kuli ifwe! Napamo kuti mwamona ukuti umukoloci alekabila ukumwafwilishako mu myendele ku kulongana. Nelyo kuti kwaba painiya uushikwete wa kubomba nankwe mu mulimo wa kushimikila inshita ya kasuba mu kati ka mulungu. Nga mwamona abalekabila ifya musango uyu e lyo mwabafwilisha, kuti bakoseleshiwa icine cine!
3 Ukulanshanya Ifya ku Mupashi: Kuti twakuula bambi na ku fyo tulanda. (Efes. 4:29) Eluda uwabomba imyaka iingi atile: “Nga mulefwaya ukulanda pa fya kukoselesha, landeni pa fya ku mupashi. Pa kutendeka ukulanshanya pa fikuulilila, napamo kuti mwaipusha fye icipusho cayanguka ica kuti, ‘Mwasambilile shani icine?’” Mulebikako amano ku baice mu cilonganino. Sakamaneni bonse abalebwelele numa na bonse abakwate nsoni. (Amapi. 12:25) Mwileka inshita ilepwila fye ku kulanda pa fya kusekesha mu nshita ya kulanda pa fya ku mupashi na basumina banenu.—Rom. 1:11, 12.
4 Nomba finshi mwingasosa pa kuti mukuule bambi? Ilyo mwalebelenga no kusambilila pa lwenu, bushe tamwasangilepo icishinka cimo icalengele muletasha sana Yehova? Bushe pali ifyalandilwe mwi lyashi lya cintubwingi nelyo mwi Sambililo lya Ulupungu lwa kwa Kalinda ifyo mwatemenwe? Nelyo bushe mwalitemenwe ica kukumanya bamo bashimike icakoseshe icitetekelo cenu? Nga mwacindamika ifyo fintu fya ku mupashi, lyonse mukalakwata ifya kukoselesha ifyo mwingebako bambi.—Amapi. 2:1; Luka 6:45.
5 Natutwalilile ukukuulana ukupitila mu kwafwilisha bambi no kubomfya bwino ululimi lwesu.—Amapi. 12:18.