Ni Lesa Nshi Ulingile Ukupepa?

ICA ntanshi, ni ani ali Lesa umo uyo mpo alingile ukupepwa? Baibolo ilasuka mu nshila yacilapo kulungama. Ibuku lya Ukusokolola libilisha ukuti: “Mwaliwamina, mwe [Yehova, NW] Lesa wesu, ukupokelelo bukata no mucinshi na maka; pantu ni mwe mwalengele ifintu fyonse: kabili mulandu wa kufwaya kwenu fyabeleleko no kulengwa.” (Ukusokolola 4:11) Ee, Yehova, Kabumba, e Lesa eka uwawamina ukupepa kwesu. Mulandu nshi? Twalabwelela kuli ico cipusho mu kwipipa. Lelo intanshi, natulande pa lwa tulesa tumbi utupepwa no mutundu wa muntu.

Ku Numa ya Tulesa Tonse Utwa Bufi

Nangu cingati abantu babombela tulesa utwingi, icine ca kuti ukupepa konse ukupeelwa kuli tulesa mu nko shonse—ukufumyako fye ukupepa ukupeelwa kuli Yehova, Kabumba—kubomba imifwaile ya kwa lesa umo fye. Mu nshila nshi? Belenga amashiwi ya mutumwa Paulo ku Bena Kristu mu Korinti. Muli ulya musumba imilungu iingi yalepepwa, ukufuma kuli Aphrodite wa bucisenene ukufika kuli Aesculapius, kalesa kabo aka kuposha. Paulo alangile, nangu cibe fyo, ukuti mu cine cine kwaliko fye amaka yamo aya bubifi ku numa ya uto tulesa. Alembele ukuti: “Ifyo Abena fyalo bepaya amalambo, bepaile fiwa, kabili Lesa iyo.” (1 Abena Korinti 10:20) Ee, abena Korinti ba cisenshi bapepele ifiwa.

Ifiwa fyatuntwike mu kupondoka. Ica ntanshi kabili icacilapo pali fyonse cali cibumbwa ca bumalaika ico icabeleleke Efa mu kutobe funde lya kwa Lesa ku numa mwi bala lya Edene. (Ukutendeka 3:1-6; Yohane 8:44) Mu kucite co, ici cibumbwa capondokele ukulwisha bumulopwe bwa kwa Kabumba. Pa numa ya ico, aishile mu kwitwa Satana, ukupilibula “Kakaanya.” Pa numa, ifibumbwa fimbi ifya ku mupashi fyailundile kuli wene mu kupondoka. Na fyo fyabele ifiwa, kabili Satana aishibikwa nga “kateka wa fiwa.” (Mateo 12:24, 26) Mwi buku lya Ukusokolola, ifi fiwa fitwa “bamalaika” ba kwa Satana. (Ukusokolola 12:7) E co ukupepa ifiwa cimo cine no kupepa Satana.

Satana alikwata ukusonga kwakulisha. Umutumwa Yohane asosele ukuti “pano isonde ponse” palaala mu maka yakwe, kabili Paulo amwitile “lesa wa ino micitile ya fintu.” (1 Yohane 5:19; 2 Abena Korinti 4:4, NW) E ico, ukupepa lesa uuli onse ukufumyako Yehova mu cine cine kupepa Satana. Mu kupalako, cibomba imifwaile ya kwa Satana pa mulandu wa kuti ubuyo bwakwe kubeleleka abana ba kwa Adamu na Efa ku kupondoka mu kulwisha Yehova. Apantu Satana “[alufya] bonse abaikala mu calo conse,” mu kumonekesha alitunguluka mu milandu iingi iyafula. (Ukusokolola 12:9) Lelo te yonse. Kucili kwaliba amamilioni ababombesha ku kupepa Yehova. Mulandu Nshi?

Ifisabo fya Kupepa Kwalubana

Ku cintu cimo, balishiba ukuti ukupepa tulesa tumbi pa mbali ya kwa Yehova kupinde fingi ukucila ifyo bengafwaya ukulipila. Ukushula ifya mu mushili ifya ku Carthage ya pa kale mu North Africa kwashulile inshishi ya bana. Muli yene mwali imisakalala ya bacaice abapeelwe amalambo kuli lesa wa bena Foinike Baali. Ukupeele lambo lya mwana wali mutengo wakulisha abo bena Carthage balipile ku kupepa Baali. BuKatolika ubwa nshita ya pa kati na bo bwapindile umutengo ilyo bwalengele ukucula kushingapimwa mu Nkondo sha Mushilo ishacincishe ukwipaya no Kulubulwisha kwa Butotelo ukwakaluka. Ukupepa kwa tulesa twa bena Inca ukwa pa ntanshi ya Columbia ya mu America kwabimbilemo ukwipaya kwa kusefya kwa butotelo ukwa makana.

Mu nshita sha ndakai nga nshi, imisango yapusanapusana iya kupepa yalibimbwamo mu kwipayaulula ukwingi mu India, kabili yalisangwilako ku mpika shikalamba isha bupolitiki mu Middle East na Northern Ireland. Ubutuutu, ukupupe mipashi, no mwenso filingile ukutantikwa ngo lubali lwa mutengo uo umuntu alipila ku kupepa tulesa twakwe utwingi.

Mulandu Nshi Ulingile Ukubombela Yehova Lesa?

Pa lubali lumbi, ukupepa Yehova kuleta fye ukumwenamo. Ku cintu cimo, e umo “uuli no mweo umuyayaya umuyayaya, uwalengele umulu ne fyabamo, na pe sonde ne fyabapo, na bemba ne fyabamo.” (Ukusokolola 10:6) Muli ifyo, tulingile ukumupepa pantu e Kabumba wesu.

Mu kulundapo, tulingile ukupepa Yehova Lesa pa mulandu wa kuti imibele yakwe ilatulaalika ku kumupepa. Umutumwa Yohane asosele ukuti “Lesa kutemwa.” (1 Yohane 4:8) Umuntu wa busumino Yobo asosele ukuti: “[Lesa] wa mano ku mutima, wa maka ayatalila.” (Yobo 9:4) Mose aimbile ulwimbo pa lwa wene ukuti: “Cilibwe icasansuka, ya mpomfu imicitile yakwe; pantu imibele yakwe yonse bupingushi: Lesa wa cishinka kabili uwabulo bupondamishi, uwalungama kabili uwatambalala.” (Amalango 32:4) Ni ani uwingashimunuka ukupepa Lesa wa musango yo?

Mu kulundapo, Baibolo isoso kuti: “Bukapepa bwafwa ku fintu fyonse, pa kuba ne cilayo ku bwikashi bwa nomba no bukesa.” (1 Timote 4:8) Ifyo ici cili ica cine! Yehova afwaya icili icisuma ku mutundu wa muntu. Apayenye isonde ngo mushi wayemba ku fibumbwa fyakwe, kabili acitile ukupayanya ukwingi pa kuti ubumi bwingaba ubwa kuipakisha. Te mulandu no kupondoka kwa muntu, Lesa alitwalilila ukutungilila ubumi pali lino isonde, ukupayanya ifikabilwa fyonse ifya ku mubili ifya mutundu wa muntu ilintu “alenga akasuba kakwe ukutulila ababifi na basuma.”—Mateo 5:45.

Lelo “icilayo ku bwikashi bwa nomba” cilacila napo. Ukubombela Lesa kulekusha kabili kulesushiwa. E cintu twapangilwe ukucita. Kabili Lesa afwa abo abamubombela mu busumino ku kucito bumi ukuba ubwatunguluka. Ukupitila muli Baibolo, apeela ubutungulushi ku bantu abashimbe, abaupana, abana—abantu mu nyendelo shonse isha bumi. Apeela amano yashintililwapo, ayabomba ku kwaafwa mu mibele yonse pa kuti twingapikulula impika isha kwikala nga bantunse abashapwililika mu calo caba pe samba lya kusonga kwa kwa Satana. Nga ca kuti twapepa Lesa mu nshila iyo iimusekesha, kuti twaipakisha “umutende wa kwa Lesa uwapulamo mu kwiluka konse.”—Abena Filipi 4:7.

Icacilapo kucindama, na kabili, “cilayo ku bwikashi . . . bukesa.” Yesu aebele umuFarise Nikodemo ukuti: “Lesa atemenwe aba pano isonde ukutemwa kwa kuti apeele Umwana wakwe uwafyalwa eka, ukuti onse uumutetekela eonaika, lelo abe no mweo wa muyayaya.” (Yohane 3:16) Ubumi bwa muyayaya! Mulungu nshi pa mbali ya kwa Yehova uwingalaya icintu ca musango yo kabili lyene ukwisushisha ubulayo bwakwe? Imibele ya kulekelesha iya abo abapokelela ubo bupe bwakulisha yalilondololwa mu Ukusokolola ukuti: “[Lesa] akafuute filamba fyonse ku menso yabo, ne mfwa tayakabeko kabili iyo; takwakabe kabili ukuloosha nangu kukuuta nangu kucululuka; pa kuti ifya ntanshi nafiya.” (Ukusokolola 21:4, 5) Mu cituntulu, ifilolelo fya bumi ubuli no kwisa filingile ukutulenga ukufwaya ukubombela Yehova!

Ni Lesa nshi, lyene, tulingile ukupepa? Ni Yehova eka, Kabumba. Ku milungu yonse, ni kuli wene eka amashiwi yabomba aya kuti: “Ikalamba kabili yapesha amano imilimo yenu, mwe [Yehova, NW] Lesa wa maka yonse. Yalilungama kabili ya cine imibele yenu, mwe Mfumu ya muyayaya. Ni ani uushakatiine ishina lyenu, mwe [Yehova, NW], no kulicindika, ico ni mwe mweka uwa mushilo? Awe abena fyalo fyonse bakesapepela ku menso yenu; ico nafimoneka ifya bulungami fyenu.” (Ukusokolola 15:3, 4) Ifyo baba aba mano abo abankulako ku kukonkomesha kwa kwa kemba wa malumbo ukwa kuti: “Iseni, natushinshimune no kukontama, natufukame ku cinso ca kwa Yehova uwatulenga”!—Ilumbo 95:6.

[Icikope pe bula 6]

Tulesa tumbi uto Satana atuninkisha umutundu wa muntu ukupepa

[Icikope pe bula 7]

Ifilolelo fya bumi ubuli no kwisa filingile ukutulenga ukufwaya ukubombela Yehova