Amepusho Ukufuma ku Babelenga

Ni mwi Paulo aloseshe ilyo alandile amashiwi ya kuti mukamfwilwa afwile ukuba “umukashi wa mulume umo” pa kuti afikepo ukuba pa mutande wa balepokelela ubwafwilisho ku cilonganino?—1 Timote 5:9.

Apo umutumwa Paulo alelanda pali mukamfwilwa, aya mashiwi ya kuti “umukashi wa mulume umo,” ukwabula no kutwishika yalelosha kuli filya umwanakashi aali ilyo umulume wakwe talafwa. Nomba bushe ninshi ico cilolele mu kuti uyu mukamfwilwa aupilwe fye umuku umo epela? Nelyo bushe kuti kwaba na mumbi umo aya mashiwi ya kwa Paulo yalolele?a

Bamo batila Paulo alelanda pali bamukamfwilwa abaupilwepo fye umuku umo. Kwena, ca cine ukutila mu ntambi ishingi e lyo na bantu ba mu ncende ishalekanalekana, baishibe ukutila mukamfwilwa nga toopilwe na kabili ninshi alikwata sana imibele isuma no kuti aliicindika icine cine. Lelo, ico calipusana na mashiwi Paulo alembele mu makalata yambi. Ku ca kumwenako, ku Bena Kristu ba mu Korinti, Paulo alilondolwele bwino sana ukutila ena alemona ukutila mukamfwilwa kuti aba sana ne nsansa nga toopilwe na kabili, lelo na kabili atile aali “muntungwa ukuupwa ku o alefwaya, ni muli Shikulu epela.” (1 Abena Korinti 7:39, 40; Abena Roma 7:2, 3) Te apo peka iyo, nangu fye ni muli kalata alembeele Timote, Paulo atile: “Ndefwaya bamukamfwilwa abakashana ukuupwa.” (1 Timote 5:14) E ico, tapali uwali no kusuusha nelyo ukupumya mukamfwilwa nga ca kuti asalapo ukuupwa na kabili.

Nomba bushe aya mashiwi Paulo alembeele Timote yalolele mwi? Aya mashiwi ya kuti “umukashi wa mulume umo” yasangwa fye muli ici cine cikomo epela. Mu lulimi lwa ciGriki, aya mashiwi yapilibula ukuti “umwanakashi wa mwaume umo.” Aya mashiwi yapilibula fye cimo cine na yalya Paulo alembele imiku iingi mu makalata yakwe, amashiwi aya kuti, “umulume wa mukashi umo,” nelyo “umwaume wa mwanakashi umo,” nga kukonka ululimi lwa ciGriki. (1 Timote 3:2, 12; Tito 1:6) Paulo abomfeshe aya mashiwi ya kuti “umulume wa mukashi” umo lintu alelanda pa fyo bakangalila Abena Kristu na babomfi batumikila bafwile ukuba pa kufikapo ukubomba imilimo mu cilonganino. Ilyo abomfeshe yalya mashiwi, aloseshe mu kuti, pa kuti umwaume uwaupa afikepo ukubomba imilimo mu cilonganino ca Bwina Kristu, alingile ukuba ne cishinka ku mukashi wakwe kabili alingile ukuba ne mibele iisuma. b Nomba apo twaishiba umo aya mashiwi yalolele, kanshi kuti twatila na mashiwi yaba pali 1 Timote 5:9 nayo yene yafwile yalepilibula fye cimo cine: Pa kuti mukamfwilwa afikepo ukuba pa mutande wa balepokelela ubwafwilisho ku cilonganino, aalingile ukuba umukashi waipeelesha kabili uwa cishinka ku mulume wakwe ilyo aali no mweo, kabili aalingile ukwishibikwa ukutila aali ne mibele iisuma. Mu cikomo cakonkapo, Paulo alilondolwele na fimbi ifyo mukamfwilwa alingile ukufikapo pa kuba pa mutande wa balepokelela ubwafwilisho ku cilonganino. Kabili fyonse ifyo alandilepo fitulanga fye ukuti alelanda pali mukamfwilwa wa mibele isuma.—1 Timote 5:10.

[Amafutunoti]