Amepusho Ukufuma ku Babelenga

Cinshi twingasoselo kuti amashiwi yatila, “uo eka aba na bumunshifwa” na ya kuti, “uo umuntunse nangu umo tabala amona na kabili te kuti amumone,” yalosha kuli Yesu te kuli Yehova Lesa iyo?

Umutumwa Paulo alembele ukuti: “Uku kumoneka, uwa nsansa kabili Uwa maka eka, ali no kukulanga mu nshita ya kuko iyalinga, wene ni Mfumu ya shamfumu kabili shikulu wa bashikulu, uo eka aba na bumunshifwa, uwaikala mu lubuuto ulushingapalamwako, uo umuntunse nangu umo tabala amona na kabili te kuti amumone.”—1 Timote 6:15, 16.

Abalanda pa fya mu Baibolo batila: ‘Bushe amashiwi ya kuti “uo eka aba na bumunshifwa,” “Uwa maka eka,” na “uo umuntu nangu umo tabala amona kabili te kuti amumone,” kuti yalosha shani ku muntu umbi, ukucila ukulosha ku wa Maka yonse?’ Ca cine ukuti aya mashiwi kuti yabomfiwa kuli Yehova. Lelo, ifyalelandwapo muli ifi fikomo filangilila ukuti amashiwi Paulo alandile pali 1 Timote 6:15, 16, yalosha kuli Yesu.

Ku mpela ya cikomo 14, Paulo alanda “pa kumoneka kwa kwa Shikulwifwe Yesu Kristu.” (1 Timote 6:14) Kanshi, ilyo Paulo alembele mu 1Ti 6 cikomo 15 ukuti, “Uku kumoneka, uwa nsansa kabili Uwa maka eka, ali no kukulanga mu nshita ya kuko iyalinga,” alelosha ku kumoneka kwa kwa Yesu, te kumoneka kwa kwa Yehova Lesa iyo. Lelo bushe “Uwa maka eka” nani? Cilimo amano ukusondwelela ukuti Uwa maka uo Paulo alelandapo, ni Yesu. Mulandu nshi? Ifyalelandwapo muli ifi fikomo filanga bwino ukuti Paulo alelinganya Yesu kuli bakateka ba buntunse. Nga fintu Paulo alembele, ca cine ukuti Yesu ni “Mfumu ya shamfumu kabili ni shikulu wa bashikulu.”a Nga kulinganya aba bantu kuli Yesu, ca cine ukuti Yesu fye e ‘Wa maka eka.’ Yesu alipeelwa “ukuteka, no bukata, no bufumu, ukuti abantu na bantu bonse, na bantu ba nko, ne ndimi, bamupyungile.” (Daniele 7:14) Takuli kateka umuntunse uwingatila na o alikwatako ayo maka!

Nga mashiwi ya kuti, “uo eka aba na bumunshifwa,” yena yalosha kuli ani? Apa na po, Paulo alelinganya Yesu ku shamfumu sha buntunse. Takwaba kateka nangu umo umuntunse uwingalanda ukuti alipeelwa bumunshifwa. Yesu fye eka e wapeelwa bumunshifwa. Paulo alembele ukuti: “Pantu twalishiba ukuti Kristu, apo nomba alibuushiwa ku bafwa, tafwa kabili iyo; imfwa taili cibinda pali wene kabili iyo.” (Abena Roma 6:9) E ico, Yesu e muntu wa kubalilapo Baibolo yalandapo ukuti alipeelwa bumunshifwa. Na cine, pa nshita lintu Paulo alelemba aya mashiwi, Yesu fye eka e wapeelwe ubumi ubushingonaika.

Tufwile no kulaibukisha ukuti nga cali cilubo kuli Paulo ukulanda ukuti Yehova Lesa eka e waba na bumunshifwa, pantu pali iyi nshita alelemba aya mashiwi, ninshi Yesu na o alipeelwa kale bumunshifwa. Lelo cali ica cine kuli Paulo ukulanda ukuti Yesu eka e wali na bumunshifwa pantu alemulinganya kuli bakateka ba pano isonde.

Kabinge, ca cine sana ukuti ukutula fye apo Yesu abuushiwilwe no kuya ku muulu, ‘umuntunse nangu umo tabala amumona na kabili te kuti amumone.’ Kwena, abasambi bakwe abasubwa no mupashi bakamona Yesu nga bafwa kabili apo pene ukubushiwilwa ku muulu ukuba ne mibili ya bumupashi. (Yohane 17:24) Lelo takwaba umuntu nangu umo pe sonde uwingamona Yesu mu bukata bwakwe ubwa ku muulu. Kanshi, kuti twatila ca cine ukuti ukutula apo Yesu abuushiwilwe no kuya ku muulu, “umuntunse nangu umo” tabala amumona.

Kwena, nga twabelenga fye aya mashiwi ya pali 1 Timote 6:15, 16, kuti twamona kwati yalosha kuli Lesa. Lelo ifyo Paulo alelandapo palya, ukubikapo no bulondoloshi bwa malembo yambi, fitulanga ukuti Paulo alelosha kuli Yesu.

[Futunoti]