ISAMBILILO 47
Bushe Namuipekanya Ukubatishiwa?
Ukufuma apo mwatendekele ukusambilila, namusambilila ifingi pali Yehova, kabili mufwile mwalyalukako muli fimo pa kuti mulekonka ifyo mulesambilila. Lelo nalimo kwaliba ifyalenga muleshingashinga ukuipeela kuli Yehova no kubatishiwa. Muli lino isambililo twalalanda pali fimo ifilenga abantu abengi baleshingashinga ukubatishiwa, e lyo ne fyo mwingacita pa kuti ifi tafilengele mwalashingashinga ukubatishiwa.
1. Bushe mufwile ukwishiba fyonse ifyaba mu Baibo pa kuti mufikepo ukubatishiwa?
Pa kuti mufikepo ukubatishiwa, mufwile “[ukwishiba] bwino bwino icine.” (1 Timote 2:4) Ici tacilolele mu kuti mulingile ukwishiba fyonse ifyaba mu Baibo pa kuti mufikepo ukubatishiwa. Na Bena Kristu ababatishiwa kale balitwalilila ukusambilila. (Abena Kolose 1:9, 10) Lelo mufwile ukwishiba amasambililo ya mu Baibo aya kutendekelako. Baeluda mwaba nabo mu cilonganino bakamwafwa pa kuti mukeshibe nga ca kuti namwishiba aya masambililo.
2. Finshi fimo ifyo mulingile ukucita ilyo mushilabatishiwa?
Ilyo mushilabatishiwa, mufwile “[ukulapila] no kwalukila kuli Lesa.” (Belengeni Imilimo 3:19.) Ukulapila kumfwa ububi pa fyabipa ifyo mwalecita kale no kulomba Yehova ukuti amubelele uluse. Na kabili mufwile ukulaesha na maka ukukanalacita ifyo Lesa apata, no kulacita ifingalenga alasekelela. Fimbi ifyo mufwile ukulacita kulaya mu kulongana lyonse no kulabila imbila nsuma capamo ne cilonganino.
3. Cinshi mushilingile ukulatiinina ukubatishiwa?
Bamo balatiina ukuti nga babatishiwa tabakakumanishe ukulacita fyonse ifyo balaya Yehova. Ca cine inshita shimo mukalalufyanya nga filya fine abaume na banakashi aba cishinka abalembwa mu Baibo balelufyanya. Lelo Yehova tenekela ababomfi bakwe ukuba abapwililika. (Belengeni Amalumbo 103:13, 14.) Alatemwa nga nshi nga amona mule-esha apo mwingapesha ukumubombela no mutima wenu onse! Akulamwafwa. Na kuba Yehova alanda ukuti takuli nangu cimo “[icikakwata] amaka ya kutupaatulako ku kutemwa [kwakwe].”—Belengeni Abena Roma 8:38, 39.
SAMBILILENI NA FIMBI
Moneni ifyo ukwishiba bwino Yehova no kulamulomba ukuti alemwafwa kwingalenga mwafikapo ukubatishiwa.
4. Mufwile ukwishiba bwino Yehova
Bushe mufwile ukwishiba shani Yehova ilyo mushilabatishiwa? Mufwile ukumwishiba bwino ica kuti mwamutemwa kabili mwalafwaisha ukucita ifyo afwaya. Tambeni VIDIO pa kuti mumone ifyo abasambi ba Baibo mwi sonde lyonse bacita pa kuti babatishiwe. Lyena lanshanyeni icipusho cakonkapo.
Finshi bamo abaciba mu vidio bacitile pa kuti baipekanye ukubatishiwa?
Belengeni Abena Roma 12:2, lyena lanshanyeni aya mepusho:
Bushe mulatwishika fimo ifyo Baibo isambilisha nelyo bushe mulatwishika nga ca kuti Inte sha kwa Yehova balasambilisha icine?
Nga ca kuti mulatwishika, finshi mwingacita pa kuti muleke ukutwishika?
5. Ifyo mwingacita pa kuti mwilashingashinga ukubatishiwa
Bonse fye tulaba na mafya nga twaipeela kuli Yehova kabili twabatishiwa. Pa kuti mumone amafya bamo bakwata, tambeni VIDIO, lyena lanshanyeni amepusho yakonkapo.
Muli vidio twatamba, mafya nshi ba Narangerel balingile ukucimfya pa kuti balebombela Yehova?
Bushe ukutemwa Yehova kwabafwile shani ukucimfya aya mafya?
Belengeni Amapinda 29:25 na 2 Timote 1:7, lyena lanshanyeni ici cipusho:
Cinshi cingalenga twacimfya amafya?
6. Yehova akalamwafwa
Yehova akalamwafwa ukulacita ifyo afwaya. Tambeni VIDIO, lyena lanshanyeni amepusho yakonkapo.
Finshi fyalengele umusambi wa Baibo uo twacitamba mu vidio aleshimunuka ukubatishiwa?
Cinshi asambilile icalengele acetekele sana Yehova?
Belengeni Esaya 41:10, 13, lyena lanshanyeni ici cipusho:
Cinshi cingalenga mwashininkisha ukuti mukakumanisha ukucita fyonse ifyo mukalaya Yehova nga mwaipeela kuli ena?
7. Muletasha sana Yehova pa fyo amutemwa
Nga muletontonkanya sana pa fyo Yehova amutemwa, mukalamutasha sana kabili mukalafwaisha ukumubombela umuyayaya. Belengeni Amalumbo 40:5, lyena lanshanyeni ici cipusho:
Finshi Yehova amucitila ifyo mwatemwa sana?
Kasesema Yeremia alitemenwe Yehova ne cebo cakwe, kabili aletasha sana pe shuko akwete ilya kubombela Yehova. Alandile ati: “Amashiwi yenu yalilengele umutima wandi wasansamuka kabili walasekelela, pantu nainikwa ishina lyenu.” (Yeremia 15:16) Asukeni aya mepusho:
Cinshi twingalandila ukuti ukuba Inte ya kwa Yehova lishuko nga nshi?
Bushe mulefwaya ukubatishiwa no kuba Inte ya kwa Yehova?
Cinshi cilemulesha ukubatishiwa?
Finshi mulemona ukuti e fyo mulingile ukucita pa kuti mukafikepo ukubatishiwa?
ABANTU BAMO BATILA: “Te kuti nkumemo ukucita fyonse ifyo ningalaya Yehova nga nabatishiwa.”
Bushe ifi e fyo na imwe mumfwa?
IFYO MUSAMBILILE
Yehova nga amwafwa kuti mwafikapo ukubatishiwa.
Ukupitulukamo
Bushe mulingile ukwishiba fyonse ifyaba mu Baibo pa kuti mufikepo ukubatishiwa?
Finshi nalimo mulingile ukwalukamo ilyo mushilabatishiwa?
Cinshi mushilingile ukutiinina ukubatishiwa?
ISHIBILENIPO NA FIMBI
Belengelenipo na fimbi pa kuti mwishibe icifwile ukumulenga mwasalapo ukubatishiwa.
“Bushe Namufikapo Ukubatishiwa?” (Ulupungu lwa kwa Kalinda, March 2020)
Moneni ifyo mwingacita pa kuti mwilashimunuka ukubatishiwa.
“Cinshi Cilendesha Ukubatishiwa?” (Ulupungu lwa kwa Kalinda, March 2019)
Tambeni vidio pa kuti mumone ifyo umwaume umo acitile pa kuti afikepo ukubatishiwa.
Pa kubala ba Ataa baleshimunuka ukubatishiwa. Moneni icalengele basalepo ukubatishiwa.