“Icebo ca kwa Lesa . . . Caliluma”

¹ Umutumwa Paulo alembele ukuti: “Icebo ca kwa Lesa ca mweo, kabili caliluma.” (Heb. 4:12) Bushe aloseshe mwi pa kusose fi? Icebo ca kwa Lesa, nelyo ubukombe, ubusangwa muli Baibolo bulakuma nga nshi abantu. Amano yasangwa mu Baibolo yaba na maka ya kwalula imikalile ya muntu no kumulenga ukuwaminako. Icisansamushi ne subilo ifyo tusangamo filakulila abantunse kuli Kapeela wa Bumi, Yehova Lesa. Ubukombe bwa iko kuti bwalenga aba mitima yafumaluka ukutendeka ukwenda mu nshila iitwala ku mweo wa muyayaya. Lelo, pa kuti ifi fyonse ficitike, tufwile ukubomfya Baibolo ilyo tuleshimikila bambi.

² Belengeniko Ilembo Limo Cila Nshita: Cilemoneka kwati kuli bakasabankanya abengi abashilebelenga Baibolo ilyo baleshimikila ku ng’anda ne ng’anda. Bushe e fyo cili na kuli imwe? Pa mulandu wa kuti abengi tabakwata inshita ya kulanshanya na bo ifingi, napamo mwalisuka mwalibelela ukulashalika fye impapulo nelyo ukulanda fye ku mutwe amashiwi ya mwi lembo. Tulekoselesha bakasabankanya bonse ukwesha na maka yonse ukubelengako nangu fye icikomo cimo muli Baibolo ilyo baleshimikila imbila nsuma, na pa kucite fi umuntu ali no kumona ukuti ubukombe bwesu cine cine busangwa mu Cebo ca kwa Lesa.

³ Nangu ca kutila te bengi babelenga sana Baibolo, icili yalicindikwa ku bengi. Nangu fye bantu ababa ne fya kucita ifingi ilingi line balasumina pali baminiti banono ukukutika ku bukombe bufuma mu Cebo ca kwa Lesa. Nga ca kutila ilembo lyalinga lyabelengwa bwino no kulondololwa mu kwipifya, ukuluma kwa cebo ca kwa Yehova kuti kwalenga uulekutika ukucitapo cimo. Lelo bushe kuti mwafuma shani ku mashiwi mutendekelepo ukulanshanya no kuya ku kubelenga icikomo cimo muli Baibolo?

⁴ Esheni Ici mu Mulimo wa Magazini: Kangalila enda umo alabomfya bwino nga nshi Amalembo ilyo ali mu mulimo wa magazini. Alasenda Baibolo umunono mwi tumba lyakwe. Pa numa ya kutambika bamagazini no kulondolola icipande cimo mu kwipifya, alakupukula Baibolo ukwabula ukushingashinga no kubelenga icikomo cimo icilingene ne cipande. Ici kuti cacitwa pa kwipusha fye ukuti, “Bushe muletipo shani pali ubu bulayo bwa kukoselesha?” lyena alakonkanyapo no kubelenga ilembo limo ilisalilwe.

⁵ Ubuyo bwenu nabube bwa kubelengelako onse uulekutika ilembo limo nelyo yabili ukufuma muli Baibolo. Ukuluma kwa iko ukulenga umuntu ukucitapo cimo kuti kwaiswila abantu abengi inshila ya kukulilwa kuli Lesa.—Yoh. 6:44.