Mulenashanasha Ilyo Mulesambilisha
1. Bushe ukubomfya bwino Icebo ca kwa Lesa ilyo tuleshimikila ilingi line kusanshamo no kucita finshi?
1 Bakabomba bafikapo nga filya fyali umutumwa Paulo, balishiba ukuti pa kuti umuntu ‘alungike pa kusambilisha icebo ca cine’ talingile ukupelela fye pa kubelenga Amalembo ya Mushilo. (2 Tim. 2:15) Ilyo tulebomfya Icebo ca kwa Lesa pa kusambilisha abantu, kuti ‘twabanashanasha’ shani?—Imil. 28:23.
2. Kuti twa-afwa shani abantu ukucindika Icebo ca kwa Lesa?
2 Balangeni Ifyo Icebo ca kwa Lesa Cisosa: Intanshi, lekeni abo muleshimikila bamone no kucindika Baibolo ukutila e mwaba amano ya kwa Lesa. Nga twalanga ukuti twalicetekela Icebo ca kwa Lesa, abo tuleshimikila nabo bene kuti babikako sana amano ilyo tulebabelengela ilembo. (Heb. 4:12) Nalimo kuti twalanda fye atuti: “Nalisanga ukuti ilingi cilaba bwino sana ukwishiba ifyo Lesa alandapo pali ili lyashi. Umfweni ifyo Icebo cakwe cilanda.” Nga cingacitika, lekeni Icebo ca kwa Lesa icine ceka cilelanda, e kutila mulebelenga Baibolo.
3. Pa numa ya kubelenga ilembo, cinshi twingacita pa kwafwa abo tuleshimikila ukumfwikisha umulolele ilyo ilembo?
3 Ica bubili, londololeni ilembo mwabelenga. Abantu abengi balafilwa ukumfwa umulolele ilembo nga e muku wa kubalilapo ukulibelenga. Ilingi line tulakabila ukulondolola ilembo pa kuti beshibe umo lilolele ne fyo likumine ilyashi tulelandapo. (Luka 24:26, 27) Landeni pa mashiwi yamo ayali mwi lembo ayalelenga icishinka mulelandapo ukumfwika. Pa kuti mushininkishe ukuti abo muleshimikila nabomfwa icishinka, napamo kuti mwabepushako icipusho.—Amapi. 20:5; Imil. 8:30.
4. Ni nshila nshi iya kulekelesha iyacindama iingatwafwa ukulanashanasha ilyo tulesambilisha abantu?
4 Mulepelulula pa Malembo: Ica butatu, esheni ukulanda ifyebo ifingekala mu mintontonkanya no kufika abantu pa mitima. Afweni abo muleshimikila ukumona ifyo ilyo ilembo libakumine. Ukupelulula pa Malembo kuti kwanashanasha umuntu ica kuti ayalula na matontonkanyo yakwe. (Imil. 17:2-4; 19:8) Ku ca kumwenako, pa numa ya kubelenga Amalumbo 83:18 kuti twapelulushanya nabo tuleshimikila ifyo cacindama ukwishiba ishina lya muntu nga tulefwaya ukupanga icibusa cisuma nankwe. Lyena napamo kuti mwaipusha amuti, “Bushe na imwe mumona ukuti ukwishiba ishina lya kwa Lesa kuti kwalenga mwalapepa amapepo ayalondoloka?” Ukulenga ubo tuleshimikila bamona ifyo ilembo likumine imikalile yabo muli uyu musango kulanga fye ukuti Baibolo ilafwa sana abantu. Ukunashanasha abantu ilyo tulebasambilisha Icebo ca kwa Lesa kulenga aba mitima isuma ukwisa mu kupepa Yehova Lesa wa cine kabili uwa mweo.—Yer. 10:10.