Muletontonkanya pa Banenu Kabili Mulekoseleshanya

“Tutontonkanye pa banensu ku kucincishanya ku kutemwa kabili ku kubomba imilimo iisuma.”—HEB. 10:24.

KUTI MWAYASUKA SHANI?

Bushe amashiwi ya kuti “tutontonkanye pa banensu” yalola mwi?

Kuti twacita shani pa kuti ‘tucincishanye ku kutemwa kabili ku kubomba imilimo iisuma’?

Bushe kuti twakoseleshanya shani?

1, 2. Cinshi cayafwile ba Nte 230 ukupusuka mu lwendo lwa ku mfwa pa numa ya Nkondo ya Calo iya Bubili?

ILYO ubuteko bwa ba Nazi bwapwile amaka ninshi Inkondo ya Calo iya Bubili ili mupepi no kupwa, aba Nazi bafumishe icipope ca kwipaya abafungwa bonse abali mu nkambi sha kucushishamo abantu. Abafungwa abali mu nkambi ya Sachsenhausen bali no kubatwala ku fyabu uko bali no kubalonga mu ngalaba no kuyashibunshisha pali bemba pa kuti bafwe.

² Abafungwa 33,000 abali mu nkambi ya kucushiwilwamo iya Sachsenhausen bali no kwenda amakilomita 250 ukuya ku cabu ca Lübeck, mu Germany. Pali aba bafungwa, 230 bali ni Nte sha kwa Yehova abafumine mu fyalo 6. Abafungwa bonse tabakwete amaka pantu tabakwete ifya kulya kabili balilwele. Cinshi calengele ukuti bamunyinefwe bapusuke pali ulu lwendo lwa ku mfwa? Munyinefwe umo uwali pali aba abafungwa atile: “Twalekoseleshanya.” Ukutemwa uko batemwanene e lyo na “maka yacila aya bantunse” ayo Lesa abapeele, e fyabafwile ukupusuka.—2 Kor. 4:7.

3. Mulandu nshi tulingile ukulakoseleshanya?

³ Nangu ca kuti ifwe tatwaba pa lwendo lwa ku mfwa, tulakwata amafya ayengi. Ilyo Ubufumu bwa kwa Lesa bwatendeke ukuteka mu 1914, Satana balimupoosele pe sonde. Aliba “ne cipyu icikalamba, pa kwishiba ukuti ali fye ne nshita inono.” (Ukus. 12:7-9, 12) Ilyo Armagedone ilepalama, Satana aleleta amesho pa kuti onaule bucibusa bwesu na Lesa. E lyo kabili, cila bushiku tulakwata amafya. (Yobo 14:1; Luk. Mil. 2:23) Limo aya amafya kuti yalenga twanaka sana ica kuti nangu twali abakosa mu fya kwa Lesa, kuti twafuupuka. Ku ca kumwenako, pa myaka iingi, munyinefwe umo alikoseleshe abantu abengi ukuba aba cishinka kuli Yehova. Ilyo akotele, ena no mwina mwakwe batendeke ukulwalilila, ici calimufuupwile sana. Nga filya cali kuli uyu munyinefwe, ifwe bonse tulakabila “amaka ayacila aya bantunse” ayafuma kuli Yehova e lyo no kukoseleshiwa.

4. Pa kuti tulekoselesha bambi, kufunda nshi uko umutumwa Paulo alandile uko tufwile ukulakonka?

⁴ Pa kuti tulekoselesha bambi, tufwile ukulakonka ukufunda uko umutumwa Paulo afundile Abena Kristu abaHebere. Atile: “Tutontonkanye pa banensu ku kucincishanya ku kutemwa kabili ku kubomba imilimo iisuma, twilapuswa ku kulongana, filya waba umusango wa bamo, lelo tulekoseleshanya, maka maka apo mulemona ubushiku bulya bulepalama.” (Heb. 10:24, 25) Kuti twakonka shani uku kufunda ukusuma?

“TUTONTONKANYE PA BANENSU”

5. Bushe amashiwi ya kuti “tutontonkanye pa banensu” yalola mwi, kabili kuti twacita shani ifi?

⁵ Amashiwi ya kuti “tutontonkanye pa banensu” yapilibula “ukubika amano ku fyo bambi balekabila.” Pa kuti twishibe bwino ifyo bambi balekabila ilyo tuli pa Ng’anda ya Bufumu, tatufwile ukupelela fye pa kubaposha nelyo ukulalanda fye pa fintu ifishacindama. Kwena, tufwile “ukubika fye amano ku fyesu” kabili tatufwile ‘ukulaibika mu milandu ya bantu bambi.’ (1 Tes. 4:11; 1 Tim. 5:13) Na lyo line, pa kuti tukoseleshe bamunyinefwe, tufwile ukubeshiba bwino, tufwile ukwishiba ifyo balepitamo, imibele yabo, ifyo bucibusa bwabo na Lesa bwaba, ifyo bacitamo bwino ne fyo bashicita bwino. Bafwile ukulamona ukuti tuli fibusa fyabo kabili twalibatemwa. Tufwile ukulaba pamo nabo, te lilya fye bali na mafya kabili balekabila ukubakoselesha lelo na pa nshita fye iili yonse.—Rom. 12:13.

6. Finshi fikafwa baeluda ‘ukulatontonkanya’ pa mukuni bapeelwa ukwangalila?

⁶ Baibolo ikoselesha baeluda ukuitemenwa ‘ukucema umukuni wa kwa Lesa uo abapeela ukwangalila,’ no kulafwaisha ukubomba. (1 Pet. 5:1-3) Bushe kuti babomba shani umulimo wa kucema nga ca kutila tabaishiba bwino impaanga isho bapeelwa ukwangalila? (Belengeni Amapinda 27:23.) Nga ca kutila baeluda baleitemenwa ukwafwa bamunyinabo kabili baleumfwa bwino ukuba pamo nabo, aba mu cilonganino tabakaletiina ukulomba ubwafwilisho ilyo balebukabila. Na kabili, cikalabangukila ukweba baeluda ifyo baletontonkanya ne filebasakamika. Ne ci cikalenga baeluda ‘ukulatontonkanya’ pa mukuni uo bapeelwa ukwangalila.

7. Bushe tufwile ukumona shani amashiwi ya cisosesose ayo abantu abafuupulwa balanda?

⁷ Paulo aebele icilonganino ca mu Tesalonika ukuti: “Koselesheni abanaka.” (Belengeni 1 Abena Tesalonika 5:14.) Pa banaka, paba ‘ababa no bulanda’ na bafuupulwa. Amapinda 24:10 yatila: “Bushe ulanenuka mu bushiku bwa macushi? Awe ninshi amaka yobe yanono.” Limo umuntu uwafuupulwa alalanda amashiwi ya “cisosesose.” (Yobo 6:2, 3) Ilyo ‘tuletontonkanya’ pa bantu ba musango uyu, tufwile ukulaibukisha ukuti limo ifyo balanda te fiba mu mutima wabo. Ifi fine e fyo ba Rachelle baishileishiba. Banyinabo bali sana no bulanda. Ba Rachelle batile: “Bamayo ilingi balelanda amashiwi ya kukalifya. Nga caba ifi, naleibukisha imibele iyo bamayo bakwata, ukuti baliba no kutemwa, ba cikuuku kabili ni bakapekape. Nasambilile ukuti abantu ababa no bulanda sana balalanda ifintu ifingi ifya cisosesose. Icingabipa sana, kubeba amashiwi ayabipa nangu ukubacitila ifyabipa nga batukalifya.” Amapinda 19:11 yatila: “Umuntu wa mano takalipa bwangu, kabili atemwa ukusuulako fye ku filubo.”

8. Ni bani maka maka abo tufwile ‘ukulanga’ ukuti twalibatemwa, kabili mulandu nshi?

⁸ Kuti ‘twatontonkanya’ shani pa muntu uumfwa ububi pa membu acitile kale nangu ca kutila alilapila? Paulo alembeele abena Korinti pa mubembu uwalapiile ukuti: “Mumubelele fye uluse no kumusansamusha, epali uwaba ifi afwa ku cikonko. E ico ndemukoselesha ukuti mumulange ukuti mwalimutemwa.” (2 Kor. 2:7, 8) Tatufwile ukulatontonkanya fye ukuti munyinefwe alishiba ukuti twalimutemwa kabili twalimubikako amano, tufwile ukumulanga ifi mu fyo tulanda ne fyo tucita.

“UKUCINCISHANYA KU KUTEMWA KABILI KU KUBOMBA IMILIMO IISUMA”

9. Bushe amashiwi ya kuti “ukucincishanya ku kutemwa kabili ku kubomba imilimo iisuma” yalola mwi?

⁹ Umutumwa Paulo alembele ukuti: “Tutontonkanye pa banensu ku kucincishanya ku kutemwa kabili ku kubomba imilimo iisuma.” Tufwile ukwafwa bamunyinefwe ukuba no kutemwa no kubomba imilimo iisuma. Umulilo nga uli mupepi no kushima, tulasonkeleshako inkuni no kupuutapo pa kuti wake. (2 Tim. 1:6) E fyo tufwile ukucita na kuli bamunyinefwe pa kuti tubafwe ukutemwa Lesa na bantu banabo. Cimo ico tufwile ukucita pa kuti tubacincishe ukulabomba imilimo iisuma, kulabatasha.

10, 11. (a) Ni bani bakabila ukutashiwa? (b) Langilileni ifyo ukutasha kwingafwa umuntu ‘uwalufyanya.’

¹⁰ Bonse fye tulafwaya ukututasha, nampo natufuupulwa nelyo iyo. Eluda umo atile: “Batata tabalentasha nangu nincita icisuma, kanshi ilyo nalekula naleimona uushacindama. . . . Nangu ca kuti ino nshita ndi ne myaka 50, ndatemwa ifibusa fyandi nga fyantasha ukuti ndebomba bwino umulimo wa bueluda. . . . Ifyo napitamo fyalinsambilisha ukuti calicindama ukutasha bambi, kabili ndesha na maka ukucita ifyo.” Bonse fye tulakoseleshiwa nga batutasha, nampo ni fwe bapainiya, tuli bakoloci, nelyo twalifuupulwa.—Rom. 12:10.

¹¹ Ilyo ‘abafikapo mu buKristu balelungika umuntu uwalufyanya,’ bafwile ukumulungika mu kutemwa no kumutasha pa fisuma ifyo alecita kale. Ukucita ifi kuti kwalenga uulufyenye ukwaluka no kutendeka ukucita icalungama. (Gal. 6:1) Ifi e fyacitikile nkashi yesu Miriam. Atile: “Inshita imo ifintu fyalimbipile sana, ifibusa fyandi ifya pa mutima fyalitamfiwe mu cilonganino, batata nabo balilwele ubulwele bwa kuli bongobongo. Nali no bulanda sana. Pa kuti ncefyeko ubulanda, natendeke ukwangala no mulumendo uushali Nte.” Ifi uyu nkashi acitile fyalengele ukuti aleumfwa ukuti talinga ukutemwikwa na Yehova, kabili alefwaya no kufuma mu cilonganino ca Bena Kristu. Nomba ilyo eluda amwibukisheko ukuti kale alebombela Lesa ne cishinka no kuti Yehova alimutemwa, Miriam alikoseleshiwe kabili atendeke ukutemwa Yehova na kabili. Alilekele ukwangala na ulya mulumendo kabili alitwalilile ukubombela Yehova.

12. Cinshi cingacitika nga ca kutila tulelinganya bamunyinefwe kuli bambi, ukubalengulula, nelyo ukulenga baleyumfwa aba mulandu pa fyo balefilwa ukucita?

¹² Tufwile ukucenjela ilyo ‘tulecincisha’ bamunyinefwe ukutwalilila abacincila mu mulimo wa kwa Lesa. Tatufwile ukulabalinganya kuli bambi, ukulabalengulula pantu balefilwa ukucita ifyo tulemona ukuti e fyo bafwile ukucita, nelyo ukubalenga ukuyumfwa aba mulandu pantu balefilwa ukubombesha. Ukucita ifi kuti kwalenga bacincila fye pa nshita iinono, lelo te kuti batwalilile. Lelo inshila iisuma iya ‘kucincishamo’ bamunyinefwe, kulabatasha no kubafwa ukwiluka ukuti ukutemwa Lesa e kulenga ukuti tube abacincila mu mulimo wakwe.—Belengeni Abena Filipi 2:1-4.

“TULEKOSELESHANYA”

13. Bushe ukukoselesha bambi kwalola mwi? (Moneni icikope cili pa ntendekelo ya cino cipande.)

¹³ Tufwile ‘ukulakoseleshanya maka maka apo tulemona ubushiku bulya bulepalama.’ Ukukoselesha bambi cipilibula ukubakosha pa kuti batwalilile ukulabombela Lesa. Ukucincisha bambi ku kutemwa kabili ku kubomba imilimo iisuma kuti twakupashanya ku kusonkelesha inkuni pa kuti umulilo wishima e lyo ukukoselesha bambi kuti twakupashanya ku kubika utusansu pa mulilo pa kuti ubilime. Ukukoselesha bambi kusanshamo ukukosha no kusansamusha abali no bulanda. Nga tulefwaya ukukoselesha abali no bulanda, tufwile ukulanda nabo cikuuku cikuuku. (Amapi. 12:18) Na kabili, tufwile ukuba ‘abayanguka ukumfwa’ kabili ‘abakokola ukulanda.’ (Yako. 1:19) Nga tulekutikisha ilyo munyinefwe alelanda, kuti twaishiba ifilengele ukuti afuupulwe kabili kuti twaishiba ne fya kulanda pa kumukoselesha.

14. Bushe munyinefwe umo uwanakile bamwafwile shani?

¹⁴ Moneni ifyo eluda umo uwa cikuuku ayafwile munyinefwe uwanakile pa myaka iingi. Ilyo eluda alekutika ku fyo alelondolola, alilwike ukuti uyu munyinefwe alitemenwe sana Yehova. Alebelenga magazini yonse iya Ulupungu lwa kwa Kalinda kabili ale-esha na maka ukusangwa ku kulongana lyonse. Lelo ifyo bamo bacitile mu cilonganino e fyakalifye uyu munyinefwe. Eluda alekutikisha kabili alyeseshe ukwishiba ifyo uyu munyinefwe aleumfwa. Talemulengulula ilyo alelanda kabili amwebele ukuti ena no lupwa lwakwe balitemwikwa icine cine. Mu kuya kwa nshita, uyu munyinefwe aishileiluka ukuti alilekele ifyabipa ifyacitike kale ukumulenga aleke ukulabombela Lesa uo atemenwe. Eluda aebele uyu munyinefwe ukuti bakaye nankwe mu kushimikila. Eluda alyafwile uyu munyinefwe ica kuti alitendeke ukushimikila kabili mu kuya kwa nshita alifikilepo ukuba eluda na kabili.

15. Finshi twingasambilila kuli Yehova pa kukoselesha abafuupulwa?

¹⁵ Palapita inshita pa kuti umuntu uwanaka aleke ukumfwa ububi nelyo abombelepo pa fyo twamwafwa. Tufwile ukutwalilila ukumwafwa. Paulo atile: “Muleafwako abanakuka, muletekela abanenu imitima.” (1 Tes. 5:14, Baibolo ya Ishiwi lya kwa Lesa) Mu nshita ya kutendwa bwangu, tufwile ukutwalilila ‘ukubafwa.’ Kale, Yehova alitekanishishe ababomfi bakwe abafuupwike. Ku ca kumwenako, Lesa alitekanishishe Eliya kabili alibikile amano na ku fyo aleumfwa. Yehova alipeele Eliya ifyo alekabila pa kuti atwalilile ukumubombela. (1 Isha. 19:1-18) Pa mulandu wa kuti Davidi alilapiile ukufuma pa nshi ya mutima, Yehova alimubelele uluse. (Amalu. 51:7, 17) Lesa alyafwile no walembele Amalumbo 73, uwapene aleke ukumubombela. (Amalu. 73:13, 16, 17) Yehova wa mutembo kabili wa cikuuku kuli ifwe, maka maka nga tuli no bulanda nelyo natufuupulwa. (Ukufu. 34:6) Inkumbu shakwe ‘shiba ishipya cila lucelo,’ kabili “tashakapwe.” (Inyimbo 3:22, 23) Yehova afwaya ifwe ukulamupashanya no kuba ne cikuuku ku baba no bulanda.

MULEKOSELESHANYA PA KUTI MUTWALILILE UKUBA PA MUSEBO WA KU BUMI

16, 17. Ilyo impela ya cino calo ilepalama, cinshi tufwile ukulacita, kabili mulandu nshi?

¹⁶ Pa bafungwa 33,000 abafumine mu nkambi ya kucushishamo abantu iya Sachsenhausen, abafungwa abengi nga nshi balifwile. Lelo ba Nte bonse 230 abafumine muli ilya nkambi balipuswike. Icalengele ukuti bapusuke mulandu wa kuti balekoseleshanya kabili baletungililana.

¹⁷ Ifwe twaba pa “musebo uwaya ku bumi.” (Mat. 7:14) Nomba line bakapepa ba kwa Yehova bonse bali no kwingila mu calo cipya icalungama. (2 Pet. 3:13) E ico, natutwalilile ukula-afwana ilyo tuli pali uyu musebo uuya ku bumi bwa muyayaya.

[Icikope pe bula 20]

Muleshimikila pamo na Bena Kristu banenu

[Icikope pe bula 20]

Mulecincishanya ku kutemwa kabili ku kubomba imilimo iisuma

[Icikope pe bula 21]

Muleba pamo na ba bwananyina

[Icikope pe bula 22]

Mulekutikisha ilyo umuntu uulekabila ukukoseleshiwa alelanda (Moneni paragrafu 14 na 15)