Beni na Mano Ayatuntulu Ilyo Impela Ilepalama
1 Icebo ca kwa Lesa libili libili cilondolola ubushiku bwa kwa Yehova ukuti bukesa “ngo mupuupu”—e kutila, mu kupumikisha, buce buce. (1 Tes. 5:2; Mat. 24:43; 2 Pet. 3:10; Ukus. 3:3; 16:15) Yesu atile, “e ico . . . mube abaiteyanya, pantu pa nshita mushenekele, e po Umwana wa muntu akesa.” (Mat. 24:44) Kuti twacita shani pa kutwalilila ukuba abalola lwa ku mupashi ilyo impela ilepalama? Umuti usangwa muli uku kukonkomesha kwapuutwamo ukwa kuti: “Beni na mano ayatuntulu.”—1 Pet. 4:7.
2 Ukuba na mano ayatuntulu kusanshamo ukumona ifintu nga fintu Yehova afimona. (Efes. 5:17) Kutwafwa ukuimona nga “beni kabili abalebeshi” muli buno bwikashi. (1 Pet. 2:11) Kulatwafwa ukwiluka ifyacilapo ukucindama icine cine, ukwishiba ifya kutangishako, no kupingula bwino.—Fil. 1:10.
3 Imikeni Amabuyo ya ku Mupashi: Ukwimika amabuyo ya ku mupashi no kuyafikilisha kulatwafwa ukuba na mano ayatuntulu. Bushe mwalikwata amabuyo ya ku mupashi ayo mulesupila pali ino nshita? Bushe mule-esha ukubelenga Baibolo cila bushiku, ukusangwa ku kulongana kwa Bwina Kristu konse, ukubelenga bamagazini ba Ulupungu lwa kwa Kalinda na Loleni! bonse abafuma, nelyo ukwingilishako imibombele ya mu butumikishi? Nga mwaimikila amabuyo ayalinga, ukuibikilishako ukuyasupila, no kulomba Yehova ukuti amupaale mu kubomba kwenu, kuti mwapapa ifingafumamo.
4 Eluda umo aipwishe abacaice abaupana pa lwa mabuyo yabo aya ku mupashi. Icipusho cakwe calengele beluke ukuti nga bayangusha imikalile yabo no kubwesha inkongole shalebafininina, kuti babomba bupainiya. Bapangene ukucite co ukuba e buyo bwabo. Bali-ipamfishe ukubwesha inkongole bakwete no kusanga inshila sha kucefyanishishamo imibombele imo iishalekabilwa iyalebaliila inshita na maka. Pa numa fye ya mwaka umo, balifikile pa buyo bwabo. Cinshi catumbwikemo? Umulume atila: “Ukwabula amabuyo te kuti tufike pano twafika. Twaliba ne nsansa ishingi. Imikalile yesu yaba iyalinga kabili iyawaminako. Yaba iituntulu kabili iyabamo ubuyo.”
5 Ilyo tulepembelela ubushiku bwa kwa Yehova, shi natutwalilile ukuba abalola lwa ku mupashi ukupitila mu kwikala aba mano ayatuntulu, ukutonta pa kucita ukufwaya kwa kwa Lesa.—Tito 2:11-13.