Cikaba Shani kwi Sonde Lyesu ku Ntanshi?

Icitabo ca World Military and Social Expenditures 1996 casosele ukuti: “Takwatala akuba umwanda wa myaka uwingalingana no mwanda wa myaka uwalenga 20 ukukuma ku lukaakala lwa bana calo ulwa bunkalwe, ukukansana, amabumba ya bantu basanguka imbutushi, na mamilioni ya bantu abaipaiwa mu nkondo, ne ndalama shapooswa mu kushite ‘fyanso fya nkondo.’” Bushe ifintu fikatala afyaluka?

Umutumwa Petro acinkwileko Abena Kristu ulwa bulayo Lesa alaile imyanda ya myaka mu kubangilila ubutila: “Imyulu ipya ne calo cipya e fyo tulolela, umwaikalo bulungami, umwabele cilayo cakwe [Lesa].” (2 Petro 3:13) Aya mashiwi yali mu kutendekelako ulubali lwa busesemo bwa kwa Esaya. (Esaya 65:17; 66:22) Israele wa pa kale aliipakishe ukufikilishiwa kwa kubalilapo lintu uluko lwabweshiwe ku calo calaiwe pa numa ya kuba bunkole mu Babele pa myaka 70. Ukupitila mu kubwekeshapo kulanda pa lwa bulayo bwa “calo cipya,” Petro alangilile ukuti nalyo line bwali no kufikilishiwa na kabili pa cipimo icikalamba—pa calo conse!

Kufwaya kwa kwa Lesa ukuleta imibele ya bulungami mwi sonde lyonse, kabili ukufwaya kwakwe kukacitwa ukupitila mu Bufumu bwakwe ubwa ku muulu mu kuba na Kristu nge Mfumu. “Lukasuke uluko alubulo kusumbwilo lupanga ku luko, nangu kusambilila kabili ubulwi.” (Esaya 2:4) Umutende no mutelelwe wa musango yu e untu Yesu asambilishe abakonshi bakwe ukwenekela no kupepela mwi pepo ilitwa mu munsaunte ati We Shifwe, nelyo Ipepo lya kwa Shikulu. Abasambilishe ukupepa ukuti: “Ubufumu bwenu bwise. Ukufwaya kwenu kucitwe pano nse nga mu muulu.”—Mateo 6:9, 10.

Bushe kuti mwaipakisha ukwikala mu calo umwaba ubulungami kwati ni mu muulu? Ilyo e subilo lintu Baibolo ipeela kuli onse uufwaya ukwishiba Lesa no mutima onse no kwikala ukulingana ne nshila shakwe ishalungama.