Mulandu Nshi Balefumina mu Macalici?

PA KATI ka mwanda wa myaka uwalenga 19, tacaseekele nangu fye panono umwikashi wa mu Prussia (iyo nomba ili ku kapinda ka ku kuso aka Germany) ukusoso kuti taya kwi calici ilili lyonse. Na kuba, ukufuma fye mwi calici ilyabako kale no kulapepa mwi calici ilyakaana imipepele iyaseeka kuti kwalenga umo ukulalungwa kuli bakapokola. Fintu imibele ya fintu yalwike!

Ilelo, abena German abengi balefuma mu macalici. Cashimikwa ukuti, umuntu umo mu bantu bane asoso kuti tapepa nangu kumo. E fyo cili na mu Austria na mu Switzerland. Nga ca kuti abantu e bumi bwe calici, ninshi ukulingana no kulanda kwa kwa kalemba wa ciGerman Reimer Gronemeyer, “Amacalici ya ku Bulaya tayakwete bumi.”

Umulandu Bakaanina Imipepele

Mulandu nshi abengi bakaanina imipepele yateyanishiwa? Ilingi line, ni pa mulandu wa fya ndalama, maka maka mu fyalo umo abaya ku calici bafwaikwa ukutuula umutuulo wa ku calici. Abengi bepusha abati, ‘Mulandu nshi ningalapeelela indalama ku calici isho napibilepo’? Bamo balafuupulwa ilyo bamona ifyuma fishaifulila na maka ifyo icalici lyakwata. Bafwile balapeela insambu shikofu mukalamba Joachim Meisner uwa ku Cologne, mu Germany, uwasosele ukuti pambi ifyuma icalici lyakwata e fyalenga ukuti lilepoosa sana amano ku fikwatwa fya ku mubili no “kukanacindamika icitetekelo muli Kristu.”

Bamo balefuma mwi calici lyabo pantu lilabatendusha, tabasangamo busuma, talingekusha insala yabo iya ku mupashi. Baliba ne cipowe icasobelwe na kasesema Amose, “te nsala ya cilyo kabili te cilaka ca menshi, lelo ica kuumfwe cebo ca kwa Yehova.” (Amose 8:11) Pa mulandu wa kuti icalici lyabo talibekusha nangu panono, balaleka ukupepako.

Ilintu amafya bakumanya ya cine, bushe ukusuulilila fye imipepele yonse e calungama ukucita? Elenganyeni umwaume umo uuli ne nsala uwamona icilemoneka ngo mukate. Nangu ni fyo, lintu aesha ukucilya, asango kuti capangilwa no bungululu bwa ku mbao. Bushe kuti alekelelela fye ukulalya no kwikusha insala yakwe? Iyo, akafwaya ifya kulya fya cine cine. Mu kupalako, nga ca kuti imipepele imo taiikusha insala ya ku mupashi iya bapepamo, bushe balingile ukusuulilila fye ifya mipepele? Nelyo bushe kuti bacilapo kuba aba mano ukufwayako inshila ya kwikushishamo insala yabo iya ku mupashi? Ico e co abengi baacita, nga fintu icipande cikonkelepo cilelanga.