Nga Twaishiba Kabumba Wesu Tulafwaya Ukuba Ifibusa Fyakwe

Kabumba wesu e ko aba. Alikwata imibele iisuma. Kabili alafwaya twamwishiba pa kuti twaba ifibusa fyakwe. (Yohane 17:3; Yakobo 4:8) Ici e calenga muli Baibolo mube ifyebo ifitwafwa ukumwishiba.

Kabumba Wesu Alikwata Ishina

“Pa kuti abantu beshibe ukuti imwe mweka, mwe bakwata ishina lya kuti Yehova, ni mwe Mwapulamo pano isonde ponse.”—AMALUMBO 83:18.

Baibolo ilanda ukuti Yehova e Lesa wa cine eka. E wabumbile ifintu fyonse ifyaba mu muulu na pano isonde ukubikako fye ne fya mweo. Eka fye e o tulingile ukulapepa.—Ukusokolola 4:11.

Yehova ni Lesa Uwaba no Kutemwa

Ifyo balemba ishina lya kwa Kabumba ilya kuti Yehova, mu ciHindi, iciPunjabi, iciGujarati, iciTelugu, iciTamil, na mu Cibemba.

“Lesa kutemwa.”—1 YOHANE 4:8.

Yehova alatusambilisha imibele yakwe ukubomfya Baibolo e lyo ne fyo abumba. Imibele yapulamo pa mibele yonse iyo akwata kutemwa. Na kuba ukutemwa e kulenga alecita fyonse ifyo acita. Ilyo tuleishibilako Yehova tulaya tulemutemenwako.

Yehova ni Lesa Uwelela

“Muli Lesa uwelela.”—NEHEMIA 9:17.

Yehova alishiba ukuti tatwapwililika. E ico ‘alatwelela’ nga twalufyanya. Nga twalomba ubwelelo no kuibikilishako ukukanabwekeshapo ifyo twacitile, alatwelela no kulabako ku membu shesu. —Amalumbo 103:12, 13.

Yehova Afwaya Ukuti Tulepepa Kuli Ena

“Yehova aba mupepi na bonse abalilila kuli ena . . . Akomfwa ne nkuuta yabo.”—AMALUMBO 145:18, 19.

Yehova tafwaya ukuti tulecitako ifintu fimo ifyaibela nelyo ukulabomfya ifilubi ilyo tulepepa kuli ena. Alakutika ku mapepo yesu nga filya abafyashi abatemwa abana babo bakutika nga ca kuti abana balelanda.