Ukukansha kwa Gileadi mu Citetekelo Cashilisha
“ABASAMBI besu nabakanshiwa bwino mu citetekelo cashilisha.” Aya yali e mashiwi ya kwiswila pali programu wa kupwishe sukulu uwe kalasi lyalenga 95 ilya Watchtower Bible School of Gilead, uwacitilwe pa Mulungu, September 12, 1993. Pali lulya lucelo abeni balaalikwe ne filundwa fya lupwa lwa Bethel 4,614 abalongene pa Ciyanda ca Kulonganinamo ica mu Jersey City batungulwilwe mwi pepo lya kwiswila kuli George Gangas. Munyina Gangas aba cilundwa ca lupwa lwa Bethel pa myaka 65 kabili pa mushinku wa myaka 97 ali e cilundwa ce Bumba Litungulula umukoloci pali bonse.
Albert Schroeder, na o wine uwa mwi Bumba Litungulula kabili ceyamani wa programu, alondolwele ati: “Pa myeshi isano kosi wa Gileadi ashimpwa pa citetekelo cashilisha.” Lelo bushe ‘icitetekelo cashilisha’ cinshi? Alondolwele ukuti ici ‘citetekelo cashilisha,’ icalondololwa pali Yuda 20, cine ca Baibolo conse. E co kosi wa Gileadi ashimpwa pa Cebo ca kwa Yehova, Baibolo, iyaba e citabo cikalamba ica kusambililamo ice sukulu.
Abasambi Bapokelela Ukufunda Kwalundwapo
Kalanda wa kubalilapo aali ni John Stuefloten uwa muli Komiti wa Watchtower Farms, uwalandile pa mutwe wa kuti “Ukunonkelamo Ukufuma ku Kusonga kwa Bantu ba Mano.” Baibolo itila abo ‘abenda na ba mano bakaba aba mano.’ (Amapinda 13:20) Mu kati ka kosi wa Gileadi, abasambi bapoosele amaawala ukucila pali 900 ukusambilila Baibolo. Munyina Stuefloten aipwishe abasambi ati: “Ni shani fintu ukusonga kwa kwa Yehova kukamwambukila ku nshita ya ku ntanshi? Muleya ku fyalo 18 ifyakwata ubwingi bwa bantu ukupuminkanya mupepi na mamilioni 170. E co ni shani mukasonga abo bantu?” Ukupitila mu kubelebesha amano ya kwa Yehova, bamishonari bapya bakaba na maka ya kwaafwa bambi ukusanguka bakapepa ba kwa Yehova, Intulo ya mano yashapelela.
“Ukuba Fyonse ku Bantu Bonse” wali e mutwe wa lyashi lyakonkelepo, ilyalundulwilwe na Lloyd Barry uwa mwi Bumba Litungulula. (1 Abena Korinti 9:22, King James Version) Imyaka mupepi na 45 iyapitapo, Munyina Barry umwine aali musambi we kalasi lyalenga 11 ilya Gileadi. Nomba ikalasi lyalenga 95 lyalitashishe ukupokelela ukufunda kubomba ukufuma ku wali kale mishonari mu kuba ne myaka ya kubelesha mu calo ca cilendo. Akoseleshe abasambi ukubeleshanya mu kwangufyanya na bantu mu cifulo ca kubombelamo cabo icipya ica cilendo pa kwishiba intambi sha cikaya no kusambilila ululimi lwa cikaya. Atile ici kuti cacitwa bwino nga nshi pa kubishanya no kubombela pamo na bamunyina ba cikaya pamo pene no kusambilila imyata yabo no kuipokelela ilyo lyonse caba icalinga.
Mu kukonkapo, Dean Songer uwa muli Komiti wa Fakitare alandile pa mutwe wa kucebusha uwa kuti “Abalekwa ku Milimo.” Pa numa ya myaka ukucila pali 35 mu mulimo wa nshita yonse, Munyina Songer alyumfwikisha ifyo cipilibula ukwikala ubumi bwatonta pa buyo, ubwayanguka, ubwatontomesha pa mulimo uulipo, ubwalubuka ukufuma ku masakamika ya fya ku mubili. Kabili ico cali e cishinka cikalamba ica kufunda kwakwe ku basambi. Bakemba pe tempele lya kwa Yehova baali abalekwa ku milimo yali iyaseeka ku bena Lebi bambi pa kuti bengaipeelesha abene mu kukumanina ku mulimo wabo uwaibela. (1 Imilandu 9:33) Mu musango umo wine, bamishonari ba ku Gileadi balilekwa ku milandu ya munsaunte iya musango yo pamo nge ncito ya ku mubili pa kuti bengatontomesha pa mulimo wabo uwaibela. Munyina Songer asondwelele mu kuba no ku kukonkomesha: “Kwateni imimwene iyatonta pa buyo kabili ubumi bwenu ubwayanguka. Icishingamo cenu pamo nga abo abalekwa ku milimo cili kubomba umulimo akasuba no bushiku, ukulumbanya Yehova.”
Icilundwa ce Bumba Litungulula Daniel Sydlik e wakonkelepo no mutwe wa kuti “Ukusambilisha Bambi Ifya Kukwatilamo Ifyawamisha mu Bumi.” Akoseleshe abasambi “ukukanasambilisha fye icifundisho lelo ukuba abashipa ku kulangisha abantu ifyo bafwile ukucita pa kuleta ubumi bwabo mu kumfwana no kufwaya kwa kwa Lesa.” Bakasambilisha basuma bafwile ukupuutamo no kukunta. “Beni abaibukila ukukuula ifyakatamikwa fya Bwina Kristu ukucila ukusambilisha fye amafunde ne fipope,” e fintu asosele na mu kusondwelela alundilepo ukuti: “Pali fyonse, bamunyina batemwikwa, isambilisheni mwe bene no kusambilisha bambi ifya kulangisha ukutemwa, pantu e kukakila fyonse pamo mu kwitabana.”—1 Abena Korinti 13:1-3; Abena Kolose 3:14.
Pa numa ya myeshi ya kukansha, abasambi baishiletemwa ukucilisha bakafundisha babo aba Gileadi babili. Jack Redford, uwali kale mishonari umwine, e wabalilepo ukulanda, pa mutwe wa kuti “Namucita Ukusalapo Kwalungama.” Mu calo ca buYuda ica pa kale, pa ntanshi talaba umutumwa wa Bwina Kristu, Paulo alikwete icifulo, ukulumbuka, ukusonga, no mutelelwe wa mu fya ndalama. Lelo pa Abena Filipi 3:8, Paulo alondolola fyonse ifi ngo “busali,” nelyo “ifisooso,” ukulingana no bupilibulo bwa Phillips. Umutima wakwe wayangilwe ubutumikishi, kabili acitile ukusalapo kwalungama. Mu kupusanako, icinabwingi ca mutundu wa muntu ilelo balangisha ukupitila mu kusalapo kwabo mu bumi ukuti balanguluka ifikwatwa fyabo ifya ku mubili ukuba ifya mutengo wacilapo ukucila ubumi bwa muyayaya. Bamishonari ba ku Gileadi balicita ukusalapo kwalungama. Jack Redford asondwelele pa kusoso kuti: “Tapali icili conse ico icalo ca kwa Ciwa cingamutambika icingalingana no mulimo wa bumishonari. Sakamaneni ilyo ishuko lishingapimwa, kabili lekeni icalo cisakamane ifisooso fya ciko!”
Pa myaka yapitapo 32, Ulysses Glass aliba kafundisha wa Gileadi. Apeele abasambi ukufunda kwa kushalikanapo ukwakwete umutwe wa kuti “Ni Lesa Eka E Wingapanga Icimuti,” ukushimpa ilyashi lyakwe pa Ilumbo 1:3. Ifya kupangapanga fya muno nshiku tafyatala afipashanya imipangilwe ya cimuti, icaelenganishiwe na Lesa. Mu mano yamo, Abena Kristu ba cine bapala ifimuti, ifyalimbwa no kutapililwa na Yehova. Munyina Glass alandilepo ukuti pa myeshi isano, abasambi “balitapililwa lyonse ukufuma ku kamfukumfuku ka menshi yapeela ubumi aya Cebo ca kwa Lesa,” ukupala ifimuti mu cilime ca ku mupashi nelyo paradise. Nalyo line, pamo nga bamishonari, bafwile ukubaka “imishila yabo iya ku mupashi ku konaika ukuli konse.” Bakonkomeshiwe ‘ukutwalilila ukunwa amenshi ya bumi ukufuma kuli Yehova pantu ni Lesa eka e wingapanga icimuti.’
Ilyashi lya kupelako lyapeelwe na Carey Barber, icilundwa ce Bumba Litungulula. Pa numa ya myaka 70 mu mulimo wa nshita yonse, Munyina Barber mu kucetekela kuti alanda pa mutwe wa kuti “Peeleni Yehova Ukuipeelesha Kwapaatulwa.” Icinabwingi cikalamba ica mutundu wa muntu tabapeela Yehova ukuipeelesha kwapaatulwa. (Amalango 5:9) Nangu cibe fyo, nga fintu Munyina Barber alangilile, te mulandu no kukanapwililika kwesu, “kuti cacitikako nga nshi ukuipeelesha umupwilapo kuli Lesa.” Alundilepo ukuti: “Tapali uwingasosa mu cituntulu ati: ‘Ciwa e walengele ukuti ncite ci.’” Lelo Ciwa kuti atucimfya nga ca kuti twafilwa ukumukaana. (Yakobo 4:7) Ukuisunga abapamfiwa mu mulimo wa kwa Yehova e nshila ya kubalilapo iya kukaaninamo Satana ne calo cakwe no kupeela Yehova ukuipeelesha kwapaatulwa.
Basontwa nga Bamishonari
Programu wa lucelo asondwelele no kusontwa kwa mu bulashi ukwa basambi bonse 46 nga bamishonari. Abaupana 23 bapokelele badiploma babo abalelondolola lubali ukuti abapwishishe sukulu bali “abafikapo mu kuibela ku kuibimba mu mulimo wa masomo, ukusumbula ukufwaya kusuma no kubombela umutende ubelelela ne funde lya muyano wapwililika no bulungami pa kati ka bantu na bantu.” Ikalasi lya Gileadi ilyalenga 95 mu kushininkisha likatukuta ukupwishishisha uyu mulimo wakulisha mu fyalo 18 uko batuminwe. Ukupeelwa kwabo ukwa mulimo kutanunwike icalo conse kabili kulesanshamo ifyalo mu Asia, Africa, Europe, Latin America, na Caribbean.
Mu cungulo kasuba, pa numa ye Sambililo lyaipifiwa ilya Ulupungu lwa kwa Kalinda ilyatungulwilwe na Charles Woody uwa mu Komiti wa Dipartimenti wa Mulimo, abapwishishe sukulu lya Gileadi abapya bapeele programu wabo uwa busambi, uwakwete umutwe wa kuti “Gileadi Natupekanya Ukusambilisha nga Bamishonari.” Iciputulwa casondwelele ne cilangililo ca kuti “Ukusalapo Tulolenkene Nako.”
Pa numa ya uyu programu wa kucincimusha, bamishonari bapya nomba baali abaipekanya ukutumwa ku fifutu fine ifye sonde ku kuyaakana na bambi ‘icitetekelo cashilisha.’
[Akabokoshi pe bula 26]
Ifipendo fye Kalasi
Impendwa ya fyalo fyaimininweko: 7
Impendwa ya fyalo batuminweko: 18
Impendwa ya basambi: 46
Impendwa ya baupana: 23
Avareji wa myaka ya bukulu: 30.06
Avareji wa myaka mu cine: 12.92
Avareji wa myaka mu butumikishi bwa nshita yonse: 9.4
[Icikope pe bula 26]
Ikalasi Lyalenga 95 Ilya Bapwishishe Sukulu lya Watchtower Bible School of Gilead
Mu mutande pe samba, imitande ipeelwe amanambala ukufuma pa ntanshi ukuya ku numa, kabili amashina yatantikwe ukufuma ku kuso ukuya ku kulyo mu mutande umo umo.
(1) Buelow, D.; Donzé, V.; Innes, S.; Fulk, N.; Billingsby, M.; Hoddinott, L.; Nygren, B.; Eriksson, L. (2) Boker, J.; Thomas, M.; Stedman, S.; Billingsby, D.; Waugh, I.; Purves, M.; Luttrell, M. (3) Jacobsen, T.; Boker, J.; Martínez, L.; Nilsson, E.; Purves, P.; Holt, L.; Larsen, M.; Jones, L. (4) Numminen, P.; Numminen, H.; Buelow, M.; Olson, W.; Holt, S.; Donzé, G.; DesJardins, C.; DesJardins, D. (5) Larsen, K.; Martínez, D.; Nygren, P.; Waugh, P.; Jones, D.; Hoddinott, J.; Thomas, G. (6) Innes, B.; Fulk, R.; Eriksson, A.; Nilsson, S.; Stedman, J.; Olson, K.; Jacobsen, F.; Luttrell, J.