Icipandwa 10

Ukupate ‘Fintu Fyashika Ifya kwa Satana’

TUATIRA

1. Ni shani Tuatira abele mu kwampana ne filonganino fimbi, kabili ni mu musango nshi wa fyashingulukako fya butotelo?

MUPEPI na makilomita 68 lwa ku kabanga ka kapinda ka kulyo kwa Bergama (Pergamo) kwaba umusumba watitima uwa ku Turkey uwa Akhisar. Imyaka imo 1,900 yapitapo, uyu musumba wali icifulo ca Tuatira. Kangalila wenda kuti afika ku Tuatira mu kwanguka ku musebo wa mu kati ka mulundu wafumine ku Pergamo kabili lyene ukuselela mu kushinguluka ku filonganino fyasheleko ifya mu Ukusokolola icipandwa 3—Sarde, Filadelfia, na Laodikea. Ukukanapala Pergamo, Tuatira tawamoneke kube cifulo cacindama ica kupepa kateka, lelo walikwete imfuba na matempele yapeelwe milungu ya cisenshi. Tuatira aishibikwe nge cifulo ca busulwishi bwa bukwebo.

2, 3. (a) Cinshi calembelwe mu kubangilila ku lwa mwina Tuatira asangwike Umwina Kristu? (b) Ni ku bucindami nshi cabela ku Bena Kristu ba mu Tuatira ukuti Yesu e “Mwana wa kwa Lesa” no kuti akwata “amenso yakwe ngo lubingu lwa mulilo”?

² Lintu Paulo aleshimikila mu Makedonia, akumenye umwanakashi umwina Tuatira uwe shina lya Ludia, kashitisha wa shakashika. Ludia na ba mu ŋanda yakwe yonse mu kusekelela bapokelele ubukombe Paulo aleshimikila no kulange cileela capulamo. (Imilimo 16:14, 15) Abele umwina Tuatira wa kubalilapo pa calembwa ukupokelela ubuKristu. Mu kupita kwa nshita, umusumba wine waishilekwata icilonganino ca Bena Kristu. Yesu alungika ubukombe bwakwe bwalepesha kulya: “Na kuli malaika wa [cilonganino ca, “NW”] mu Tuatira lemba, auti: E fyo asosa Umwana wa kwa Lesa, uuli na menso yakwe ngo lubingu lwa mulilo na makasa yakwe ayapalana no butale ubwabengeshima.”—Ukusokolola 2:18.

³ Iyi e nshita yeka fye inumbwilo ya “Umwana wa kwa Lesa” yamoneka mu Ukusokolola, nangula mu fifulo fimbi Yesu alosha kuli Yehova pamo nga “Tata.” (Ukusokolola 2:27; 3:5, 21) Ukubomfiwa kwe lumbo pano mu kupalako kwibukisha Abena Kristu ba mu Tuatira ulwa kupalamana kwa kwa Yesu na Yehova. Uyu Mwana akwata “menso yakwe ngo lubingu lwa mulilo”—ukusoka ku Bena Kristu ba mu Tuatira ukuti ubupingushi bwakwe bukabilima ukulwisha icili conse cintu amona ukube ca kukowesha mu cilonganino. Mu kulosha umuku wa bubili ku makasa yakwe yabengeshima, yapala ubutale, ebekesha ica kumwenako cakwe cabembela ica kuba ne citetekelo lintu aleenda pali lino isonde. Abena Kristu mu Tuatira ukwabulo kutwishika balyumfwilile ukufunda kwakwe, e fyo na ifwe tufwile ukucita ilelo!—1 Petro 2:21.

4, 5. (a) Mulandu nshi Yesu engatashisha Abena Kristu ba mu Tuatira? (b) Ni shani icilonganino ca mu Tuatira cabe cipasho ku filonganino fyacila pali 54,000 ifya Nte sha kwa Yehova ilelo?

⁴ Mu kubamo insansa, Yesu kuti atasha abo mu Tuatira. Atila: “Naishibe milimo yobe, no kutemwa kobe ne citetekelo cobe no kupyunga kobe no kushipikisha kobe; naishibe milimo yobe ya kupelelekesha yafulo kucile ya kutendeka.” (Ukusokolola 2:19) Ukukanapala abena Efese, Abena Kristu basubwa mulya tabalufishe kutemwa kwabo ukwa kuli Yehova ukwa ntanshi. Icitetekelo cabo cintu cakosa. Ukulundapo, imilimo yabo yafulo kucile ya kutendekelako, kabili ukupala ifilonganino fitatu ifibangilileko, Abena Kristu mu Tuatira baleshipikisha. Ifyo capale filonganino 54,000 no kucilapo ifya Nte sha kwa Yehova ukupulinkana isonde ilelo! Ukutemwa Yehova kubengeshima ukupulinkana, ilyo mupashi wakupimpa mu butumikishi waandatila ukuteyanya, ukubimbula abanono na bakalamba. Impendwa ilefulilako baibomfya abene beka nga bapainiya, muli fyo ukubomfya mano mano inshita isheleko iya kubilisha isubilo lya bukata lya Bufumu bwa kwa Lesa ubuleisa!—Mateo 24:14; Marko 13:10.

⁵ Pa makumi ya myaka, aba busumino abengi, bonse abashalapo basubwa na be bumba likalamba, balalangisha ukushipikisha kwabamo ica kumwenako mu mulimo wa kwa Lesa, lintu icalo ca bashinguluka cingila mu kushikilako no kushikilako mu kubombomana kwabulwamo isubilo. Lelo lekeni tube aba kushipa kusuma! Ukusokolola kwebekesha ubunte bwa masesemo ya mu kubangilila aya kwa Lesa. “Nabupalamo bushiku bukulu bwa kwa Yehova, nabupalama no kwangufyanisha.”—Sefania 1:14; Yoele 2:1; Habakuki 2:3; Ukusokolola 7:9; 22:12, 13.

“Uyo Mwanakashi Yesebele”

6. (a) Ukwabulo kusakamana imbali sha kutashiwa, ni mpika nshi iyo Yesu amona mu cilonganino mu Tuatira iyo yalekabila ukusakamana kwa mu kwangufyanya? (b) Yesebele ali ni ani, kabili bushe alikwete ukutunga kwabamo insambu ku kuba kasesema mwanakashi?

⁶ Amenso ya kwa Yesu yaba ngo lubingu lwa mulilo yamwenesho kulundako. Amona icintu cimo icalefwayo kwangwako kwa mu kwangufyanya. “Lelo,” aeba Abena Kristu ba mu Tuatira, “ndi ne ci ca kukushinina, ica kuti waleka fye uyo mwanakashi Yesebele uuleilumbula kasesema, uusambilisha no kubeleleka abasha bandi ukucito bulalelale, no kulye fyaipailwa amalambo ku tulubi.” (Ukusokolola 2:20) Mu mwanda wa myaka walenga ikumi B.C.E., Namfumu Yesebele, kapepa wa kwa Baali umukashi wa Mfumu Ahabu wa Israele, aishibikilwe ku nshila shakwe shabamo ubukomi, isha bucende, isha kululunkanya. Yehu, pamo ngo wasubilwe kuli Yehova, amulengele ukuputunkanishiwa. (1 Ishamfumu 16:31; 18:4; 21:1-16; 2 Ishamfumu 9:1-7, 22, 30, 33) Yesebele walepepa ifilubi takwete kutunga kwa kuba kasesema mwanakashi. Tapalile Miriamu na Debora, ababombele nga bakasesema banakashi ba citetekelo mu Israele. (Ukufuma 15:20, 21; Abapingushi 4:4; 5:1-31) Kabili umupashi wa kwa Yehova tawamuseseshe ku kusesema nge fyo waseseshe umukoloci Ana na bana banakashi bane aba kwa Filipi kabila wa mbila nsuma.—Luka 2:36-38; Imilimo 21:9.

7. (a) Ku kulumbula ukuti “uyo mwanakashi Yesebele,” mu kwebekesha Yesu alelosha ku kusonga nshi? (b) Ni shani ifyo abanakashi bamo babishenye balungamike inshila yabo yabamo ukuifwaila?

⁷ Mu kumfwika konse, lyene, “uyo mwanakashi Yesebele” uuitunga ukuba kasesema mwanakashi mu Tuatira wa cimbepa. Takwata ukutungilila kwa mupashi wa kwa Lesa. Ni ani? Mu kupalako, mwanakashi nelyo ibumba lya banakashi ababomba ngo kusonga kubosha kwabulwe nsoni mu cilonganino. Abanakashi bamo abalongana kuti limbi bakwata ukusonga ifilundwa fya mu cilonganino muli bucisenene, lintu mu kupama balungamika inshila yabo ya kuifwaila mu kubomfya bubi bubi amalembo. Kusesema kwa bufi mu cine cine! Kuti basonga bambi ukuponena mu nshila shabo sha “bulalelale, ukukowela, umufimbila, ulwinso, bucilende, ulunkumbwa (e kupepo tulubi).” (Abena Kolose 3:5) Kuti bakwata aba mu cilonganino ukuibimba mu musango wa bumi bwa bucisenene, ubwa kuifwaila ubwa musango uyo nomba uusuminishiwa, nelyo uusuulwako fye, mu mabutotelo yaseeka aya Kristendomu.

8. (a) Kulumbulula nshi ukwa kwa Yesu ku lwa kwa “Yesebele” mu Tuatira? (b) Ni shani ukusonga kushalinga ukwa canakashi kwaumfwika mu nshita sha muno nshiku?

⁸ Yesu atwalililo kweba baeluda mu Tuatira ati: “Kabili namupeele inshita iya kuti alapile; lelo tafwayo kulapila ku bulalelale bwakwe. Mona, ndemupoosa pa busanshi, no kupoosa mu bucushi bukalamba abacita nankwe ubucende, nga tabalapile ku milimo yakwe.” (Ukusokolola 2:21, 22) Pamo nge fyo Yesebele wa kutendekelako mu kumonekesha alulunkenye Ahabu kabili lyene ukusuusha kaputunkanya wa kwa Lesa, Yehu, e fyo no ku kusonga kwa canakashi limbi kwingesha ukulama abalume na baeluda. Cilemoneko kuti baeluda mu Tuatira balelekelako uku kusonga kwabulo kuilama ukwa buYesebele. Yesu pano apeele ukusoka kwakosa kuli bene, pamo nga mu cilonganino capela mu cibulungwa ica bantu ba kwa Yehova ilelo. Mu nshita sha muno nshiku, abanakashi bamo abakwato kuifwaila kwa musango yo balisonga abalume babo ukuba abasangu kabili balikoselesha fye ne mibombele ya cilye ukulwisha ababomfi ba citetekelo aba kwa Yehova.—Linganyako Yuda 5-8.

9. (a) Mulandu nshi amashiwi ya kwa Yesu ku lwa kwa Yesebele yashibelebesha mu kukanasenaminwa pa banakashi bonse mu cilonganino? (b) Ni lilali lyeka fye lintu cibako ukuti ukusonga kwa kwa Yesebele kwaima?

⁹ Ici tacibelebesha mu nshita iili yonse mu kukanasasenaminwa pa banakashi ba citetekelo mu cilonganino ca Bwina Kristu. Muli shino nshiku, ulubali lukalamba ulwa mulimo wa bunte upwilikishiwa na banakashi ba citetekelo; ukupitila mu masambililo ya Baibolo ya mu mayanda batungulula, baleta abapya abengi mu cilonganino. Lesa umwine alapaala iyi mitantikile, nge fyo calangwa pe Lumbo 68:11: “[Yehova, NW] apeele icebo, abanakashi ababilishe bali umulalo ukalamba.” Abalume limbi kuti basongwa ku busuma ku myendele yaicefya, yabamo akatiina iya bakashi babo, iyaba iyafinisha “ku cinso ca kwa Lesa.” (1 Petro 3:1-4) Umukashi wakampuka, wapikintika, alilumbanishiwa ku Mfumu Lemuele. (Amapinda 31:10-31) Ni lyeka fye ilyo abanakashi bafuma mu mutande ku kusembeleka abaume nelyo ukusonsomba nelyo ukusuula bumutwe e lintu ukusongwa kwa buYesebele kwima.—Abena Efese 5:22, 23; 1 Abena Korinti 11:3.

10. (a) Mulandu nshi Yesebele na bana bakwe bapokelelo bupingushi? (b) Ni mu mibele nshi yabamo ubusanso baba abo basanguka abana ba kwa Yesebele, kabili cinshi aba musango yo bafwile ukucita?

¹⁰ Ukulosha kuli “uyo mwanakashi Yesebele,” Yesu atwalilila ati: ‘Na bana bakwe nkabalofya ku cikuko ca mfwa. Kabili [ifilonganino fyonse fikeshibo, “NW”] kuti ni ne kasapika wa mfyo ne mitima; kabili nkapeela imwe umo umo umwabele milimo yenu.’ (Ukusokolola 2:23) Yesu asuminishe Yesebele na bana bakwe inshita ya kulapila, lelo batwalilila mu nshila shabo sha bucisenene kabili e co balingile ukupokelelo bupingushi. Palipo ubukombe ubwa maka pano ku Bena Kristu ilelo. Abo bapashanya Yesebelele, nangu baume nelyo banakashi, na muli fyo ukusanguka abana bakwe mu kutoba ifishinte fya Baibolo pali bumutwe ne mibele isuma nelyo ukuba ba nkosamitwe muli fyo ukusuula umuyano wa teokratiki, bali mu mibele ya bulwele bwa ku mupashi ubwabamo ubusanso. Mu cine cine, nga umo uwa musango yo aita baeluda mu cilonganino ukumupepela, “ipepo lya citetekelo likapususho mulwele, na [Yehova, NW] akamubuusha”—cikulu fye mu kuicefya abomba mu kumfwana na yo mapepo. Lelo mwileka nangu umo atontonkanye ukuti wene umwaume (nelyo umwanakashi) kuti abepa Lesa nelyo Kristu mu kwesho kufisa incitilo shakwe sha bucisenene nelyo ukubikako kwa kulangisha kwa ku nse ukwa kupimpa mu mulimo.—Yakobo 5:14, 15.

11. Ni shani ifilonganino ilelo fyaafwiwa ukuba ifyashibuka ku kwingilila kwa kusonga kwabulwe funde ukwa canakashi?

¹¹ Mu kubamo insansa, ubwingi bwa filonganino fya Nte sha kwa Yehova ilelo fyalishibuka kuli ubu busanso. Baeluda baba abapempwila ku kukongama kwalola ku mibele ishili ya teokratiki na ku kucito bubi. Balesho kwaafwilisha bonse abaume na banakashi ababa mu nshila ya busanso ica kuti aba bengakuula bumupashi no kuteuluka intanshi tacilaba kucelwa. (Abena Galatia 5:16; 6:1) Mu kuba no kutemwa no kushangila, aba bakangalila ba Bwina Kristu bacilima ukubombesha kwa canakashi ukuli konse kwa kupanga amabumba ya kusumbula ukusala kwapala ukwa kulubuka kwa banakashi. Ukulundapo, ukufunda kwalingana ne nshita mu tushita mu tushita kulapeelwa mu mpapulo sha Watch Tower Society.a

12. Ni mu nshila nshi umo ibumba lya buYohane lilangilila ukupimpa ukwapala ukwa kwa Yehu?

¹² Nangu cibe fyo, uko kwabeleko bucisenene bwabipisha, no kucilisha uko ici ciba icibelesho, ababembu bashilapila balingo kutamfiwa. Twibukisha ukupimpa kwa kwa Yehu mu kufumyapo umulondo onse wa kusonga kwa kwa Yesebele mu Israele. Ukupalako, ibumba lya buYohane ilelo libuula imibombele yashangila, ukwimika ica kumwenako ku banabo ba ‘buYehonadabu’ no kuilangisha abene beka ukuba abapusanisha na baminisita ba mulekelesha aba Kristendomu.—2 Ishamfumu 9:22, 30-37; 10:12-17.

13. Cinshi cikacitika kuli abo banakila ku kusonga kwalubana ukwa canakashi?

¹³ Pamo nge Nkombe ya kwa Yehova na Kapingula, Umwana wa kwa Lesa abomba mu kulungika mu kwishibisha Yesebele wa muno nshiku no kumupoosa mu busanshi bwa kulwala, pantu ubulwele bwakwe ubwa ku mupashi mu cine cine bwa ntandabwanga. (Malaki 3:1, 5) Abo banakila kuli uku kusonga kwa lubana ukwa canakashi na bo bakacula ubucushi bukalamba—ubulanda bwa kutamfiwa, ukuputulwako ukufuma ku cilonganino ca Bwina Kristu pamo nga abafwa. Kano nga aba balapila, bapilibuka, kabili bapokelelo kubwelela mu cilonganino, na kabili balolenkana ne mfwa ya ku mubili ku ‘cikuko cabamo imfwa’—mu kupelako, mu bucushi bukalamba. Pali nomba, ukupuputulwa kuti kwacitika nga balapila mu kukumanina ku ncitilo shabo shalubana.—Mateo 24:21, 22; 2 Abena Korinti 7:10.

14. (a) Ni shani Yesu abomfya baeluda mu kubomba ne mpika shimo, pamo nga ukusonga kwa buYesebele? (b) Ni shani icilonganino cingaafwilisha baeluda babomba ne mpika sha musango yo?

¹⁴ “Ifilonganino fyonse” (NW) filingile ukwisa ku kwishibo kuti Yesu alafwayafwaya “imfyo,” inkuntu shashikisha, no ‘mutima,’ umuntu wa mu kati, ukusanshako ukusonga kwabako. Kuli iyi mpela, abomfya intanda shacetekelwa, nelyo baeluda, ukubomba ne mpika shimo, pamo ngo kusonga kwa buYesebele ukumoneka. (Ukusokolola 1:20) Pa numa aba baeluda bafwailisha mu kukumanina umulandu wa uyu musango no bupingushi bwapeelwa, taciba ca bantu umo umo ukusokota mulandu nshi nangu cinshi imibombele yabuulilwe. Bonse mu kuicefya bafwile ukupokelela ukupingulapo kwa milandu kwa baeluda no kutwalilila ukuba abakwaafwilisha ishi ntanda sha mu cilonganino. Bucishinka kuli Yehova na ku mitantikile ya kuteyanya kwakwe fikalambulwa. (Ilumbo 37:27-29; AbaHebere 13:7, 17) Ku lubali lobe, shi icakaniko cobe na cibe ipaalo lintu Yesu apeela kuli umo na umo pa lwakwe ukulingana ne milimo yakwe.—Mona kabili Abena Galatia 5:19-24; 6:7-9.

“Ikatisheni Ico Mukwete”

15. (a) Cinshi Yesu ali no kusosa kuli abo abashaboshiwe kuli Yesebele? (b) Cinshi cilangisho kuti te bonse abaitungile ukuba Abena Kristu ku numa mu 1918 ababoshiwe kuli Kristendomu wasanguka?

¹⁵ Amashiwi ya kwa Yesu yakonkapo yaleta icisansamushi: ‘Lelo ndetila kuli imwe, mwe bashalapo aba mu Tuatira, abashaba ne sambilisho ili, abashaishibe fintu fyashika ifya kwa Satana (filya bamo basosa). Nshilemutwika ne cafina cimbi; ici fye, ikatisheni ico mukwete, nkasuke nkese.’ (Ukusokolola 2:24, 25) Mulimo imyeo ya citetekelo mu Tuatira abashasongwa kuli Yesebele. Mu kupalako, pa myaka 40 pa ntanshi ya 1918 no kutula ilyo, te bonse abaitunga Ubwina Kristu batekeleshe nshila sha bucisenene, ishabola ishaba ishaseeka mu Kristendomu. Impuka yacepa iya Basambi ba Baibolo, nomba baishibikwa nge Nte sha kwa Yehova, abaeseshe ukwaafwilisha ifulundwa fye calici ukumona intulo ishili ya Bwina Kristu iya fisambilisho ifingi ifya Kristendomu, yaselela ku kuitalushako ku fisumino fyonse ifya cina Babiloni ne fibelesho fyapokelelwa ukupulinkana mu Kristendomu wasanguka. Ici cisanshako ukusambilisha kwa mulekelesha kwa “uyo mwanakashi Yesebele.”

16. Nangula Yesu nelyo libumba litungulula ilya Bena Kristu ba mu mwanda wa myaka wa kubalilapo bashalundileko icafina na cimbi, fintu nshi fyalingile ukusengaukwa?

¹⁶ Ibumba lya buYohane ilelo na kabili lyalikoselesha abanabo, ibumba likalamba, ukuba abaibukila ku kusonga kwa bucisenene, pamo nga abo baba mu calo cabotelela ica fya kusekesha. Takwabako kukabila kwa kumona nelyo ukubelesha ukubola ku mulandu wa kufwailisha ukwishiba nelyo mu kuti tusambilile ica kusengauka. Yaba ni nshila ya mano ukutalukisha ku ‘fintu fyashika ifya kwa Satana.’ Nge fyo Yesu aletila: “Nshilemutwika ne cafina cimbi.” Ici citwibukisha ulwa cipope ce bumba litungulula lya Bwina Kristu lya mu mwanda wa myaka wa kubalilapo: “Pantu ciyene ku [mupashi] wa mushilo, na kuli ifwe, te kumutwika icafina icacilamo iyo, kano ifi ififwile ukucitwa: ukutalukako ku fyaipailwo tulubi, na ku kulyo mulopa, na ku fyatitilwa, na ku bulalelale; ifyo nga muleibakako, ninshi mwawamya.” (Imilimo 15:28, 29) Ku lubanda lwa ku mupashi, sengauka ubutotelo bwa bufi, ukubomfya bubi bubi ukwa mulopa (pamo ngo kukuushishamo umulopa), na bucisenene! Kabili ubutuntulu bobe bwa ku mubili mu kupalako bukacingililwa na bo bwine.

17. (a) Ni shani Satana atunka abantu ilelo ne ‘fintu fyashika’? (b) Imibele yesu ifwile ukuba shani ukulosha ku ‘fintu fyashika’ fya calo ca kwa Satana icabamo umucenjelo?

¹⁷ Satana alikwata fimbi ‘ifintu fyashika’ ilelo, pamo ngo kwelenganya kwa kupikana na mano ya buntunse ifisembeleka imitontonkanishishe. Ukulunda ku kupelulula kwa mulekelesha, ukwa bucisenene, ifi filundamo ukupupe mipashi ne cifundisho ca kusanguka. Ni shani fintu Kabumba wa mano yonse amona ifi ‘ifintu fyashika’? Umutumwa Paulo amwambula ngo uletila: “Nkonaula amano ya ba mano.” Ukupalanya kuli ico, ‘ifintu fyashika ifya kwa Lesa’ fyalyanguka, fyalilengama, kabili fikafyo mutima. Abena Kristu ba mano balasengauka ‘ifintu fyashika’ ifya calo ca kwa Satana icabamo umucenjelo. Ibukisha, “pano isonde paleya, no lunkumbwa lwa pako; lelo uucito kufwaya kwa kwa Lesa ekalilila umuyayaya.”—1 Abena Korinti 1:19, Kingdom Interlinear; 2:10; 1 Yohane 2:17.

18. Mapaalo nshi Yesu alaile Abena Kristu basubwa abatwalilila ukuba aba citetekelo ukufika na ku mpela, kabili lishuko nshi ilyo aba bakabuushiwa bakakwata pa Armagedone?

¹⁸ Kuli abo Bena Kristu ba mu Tuatira, Yesu nomba alesosa amashiwi ya kukafyo mutima. Na kabili yakoselesha Abena Kristu basubwa ilelo: “Kabili uwacimfya, uwabake milimo yandi ukufika ku mpela, nkamupeelo lupaka pa nko: kabili akabacemena ku nkonto ya cela, akabatobaula kwati fipe fya kwa kabumba; ifyo na ine napokelela kuli Tata.” (Ukusokolola 2:26, 27) Icine cine lishuko lya kupapusha! Ubu bulashi ubo bakacimfya basubwa bapokelela pa kubuushiwa kwabo buli kwakana na Yesu mu kubomfya “inkonto ya cela” no bonaushi ukulwisha inko shasanguka pa Armagedone. Ica kucitikako cawamisha, ifipuulika fya manyukiliya fya isho nko fikafwetela ukupale cakupuusha cabomba lintu Kristu akatobaula abalwani tupandwa tupandwa nge fyo engacita ku fipe fye bumba.—Ilumbo 2:8, 9; Ukusokolola 16:14, 16; 19:11-13, 15.

19. (a) Nani aba “Ulutanda lwa lucelo,” kabili ni shani akapeelwa kuli abo bakacimfya? (b) Kukoselesha nshi kupeelwa kwi bumba likalamba?

¹⁹ Yesu alundako ati: “Kabili nkamupeelo Lutanda lwa lucelo.” (Ukusokolola 2:28) Yesu umwine wine pa numa alondolola ico ulu “lutanda” luli, ati: “Ine ndi Mushila kabili Ubufyashi bwa kwa Davidi, Ulutanda ulubalika ulwa lucelo.” (Ukusokolola 22:16) Ee, ali ni Yesu uufikilisho busesemo ubo Yehova apatikishe ukufuma ku milomo ishaitemenwe iya kwa Balaamu: “Muli Yakobo mwafumo lutanda lwa mfumu, kwaima no mulumbu muli Israele.” (Impendwa 24:17) Ni shani fintu Yesu akapeela “Ulutanda lwa lucelo” kuli abo bakacimfya? Mu kushininkisha, mu kuipeelo mwine eka kuli bene, mu kubabula mu kwampana kwapalamisha, kwacilapo ukubeleshanya na wene. (Yohane 14:2, 3) Mu cine cine kusonga kwabamo amaka ku kushipikisha! Caba ica kucincimusha, na kabili, kwi bumba likalamba ukwishibo kuti “Ulutanda lubalika” mu kwangufyanya lukabomfya ubulashi bwa luko bwa Bufumu mu kubwesha Paradise pano isonde!

Bake Citetekelo

20. Fya kwimako nshi mu Kristendomu fitwibukisha ulwa mabunake yamo mu cilonganino ca mu Tuatira?

²⁰ Ubu bukombe bwalingile ukukoselesha Abena Kristu mu Tuatira apakalamba. Languluka—Umwana wa kwa Lesa wakatamikwa mu mulu ukulanda pa lwakwe ku Bena Kristu mu Tuatira ulwa mpika shabo shimo! Mu cine cine, mu kucefyako bamo mu cilonganino balyankwile ku kucema kwa musango yo ukwabamo ukutemwa. Ubu bwalepesho kucilapo pa bukombe cinelubali na kabili butwaafwa ukwishiba icilonganino ca Bwina Kristu ica cine ilelo. Mu 1918 lintu Yesu aishile kwi tempele lya kwa Yehova ku bupingushi, icinabwingi ca mateyanyo yaitungile ukuba Abena Kristu yakantaikwe no kupepe filubi na bucisenene bwa ku mupashi. (Yakobo 4:4) Bamo bashimpile ifisumino fyabo pa fisambilisho fya banakashi bakoso muntontonkanya aba mwanda wa myaka walenga 19, pamo nga Ellen White uwa Seventh-Day Adventists, na Mary Baker Eddy uwa ba Christian Scientists, kabili ukucilapo muli nomba line abanakashi balashimikila pa pulupiti. (Cilanyako 1 Timote 2:11, 12.) Mu kati ka mibele yalekanalekana iya buKatolika, Maria ilingi line acindikwa ukucila pali Lesa na Kristu. Yesu tamucindike ifyo. (Yohane 2:4; 19:26) Bushe amateyanyo ayapokelela ukusonga kwa musango yo kushabamo ifunde ukwa canakashi mu cine cine kuti yapokelelwa nga ya Bwina Kristu?

21. Masambililo nshi yabako ku bantu umo umo mu bukombe bwa kwa Yesu ku Tuatira?

²¹ Abena Kristu umo umo, nampo nga be bumba lya buYohane nelyo impaanga shimbi, bacita bwino ukulanguluka ubu bukombe. (Yohane 10:16) Bamo pambi kuti bacisanga icabamo itunko ukukonka inshila yayanguka, nge fyo aba basambi ba kwa Yesebele ba ku Tuatira bacitile. Kwalibako na kabili itunko lya kusuusuka. Ilelo, ifikansa pamo ngo kulya ifyapangwa ku mulopa nelyo ukupokelela ukukuushishamo umulopa fili no kukumanishiwa. Bamo limbi kuti bayumfwa ifyo ukupimpa kwa mulimo wa mwi bala nelyo ukupeela amalyashi kubapeela insambu ya kuba abatontololako mu ntunga shimbi, pamo nga ukutamba ifikope fisela fyabamo bucisenene nelyo amatepu ya video, nelyo ukucishamo ukunwa ifikola. Ukusoka kwa kwa Yesu ku Bena Kristu ba mu Tuatira kutwebe fyo tatulingile kubuula uko kushukila. Yehova atufwayo kuba abasanguluka, aba mweo onse, abashayakanikana, nge fyo Abena Kristu abengi bali mu Tuatira.

22. Ni shani Yesu ebekesha ukucindama kwa kukwata ukutwi kumfwa?

²² Mu kupelako, Yesu abilisha ati: “Uukwete ukutwi, omfwe ico [umupashi] ulesosa ku [filonganino, “NW”].” (Ukusokolola 2:29) Ku muku walenga ine, Yesu pano abwekeshapo uku kupitulukamo kwa kushibusha, kabili kulesondwelela bonse ubukombe butatu ubuli no kwisako. Bushe walikwata uko kutwi kwankulako? Lyene twalilila ukukutika no mupampamina lintu Lesa, ku mupashi wakwe, aletwalilila ukupeela ukufunda ukupitila mu cibombelo cakwe.

[Futunoti]

[Ifikope pe bula 51]

Ilelo, ulubali lukalamba ulwa mulimo wa bunte ulepwilikishiwa kuli bankashi ba citetekelo ilyo mu kuyana baafwilisha ubulashi bwa teokratiki