Icipandwa 1

Ukusokolola—Akalume ka Kuko aka Nsansa!

1. Ni shani twaishiba ukuti Lesa afwaya ifwe ukuba aba nsansa?

UKUSOKOLOLA KULI YOHANE—ili buku lya kucincimusha ilya Baibolo lileta icalembwa ca bulesa ku kalume ka ciko aka nsansa. Mulandu nshi twasoselo kuti aka “nsansa”? Cisuma, Katendeka wa Baibolo alondololwa nga “Lesa wa nsansa,” uuseekesha “imbila nsuma ya bukata” kuli abo abamutemwa. Afwaya na ifwe ukuba aba nsansa. Muli ifyo, ku kutendekelako Ukusokolola kutweba ukuti: “Wa nsansa uubelenga . . . ifyebo fya busesemo ubu.” Mu cipandwa ca liko ica kulekeleshako twalyebwo kuti: “[Wa nsansa, NW] uubake fyebo fya kusesema kwa [mu cimfungwa ici, NW].”—1 Timote 1:11, NW; Ukusokolola 1:3, NW; 22:7.

2. Cinshi tulingile ukucita pa kusanga insansa ukupitila mwi buku lya Ukusokolola?

² Ni shani tusanga insansa ukupitila mwi buku lya Ukusokolola? Tucite fyo mu kusapika ubupilibulo bwa fishibilo fya liko fyamonekesha, nelyo ifilangililo, no kubomba mu kumfwana na fyo. Ilyashi lya mutundu wa muntu lyabamo ulukaakala mu kwangufyanya likafika pa kalume ka liko akabamo akayofi, lintu Lesa na Yesu Kristu bakaputunkanya ubupingushi pa micitile ibifi ya lelo, ukupyanikapo “umulu upya ne calo cipya,” umo nangu ni “mfwa tayakabeko kabili iyo.” (Ukusokolola 21:1, 4) Bushe ifwe bonse tatufwayo kwikala mu calo cipya ica musango yo, mu mutende wa cine cine no mutelelwe? Kuti twaba nga twakuule citetekelo cesu ukupitila mu kusambilila Icebo ca kwa Lesa, ukusanshako no busesemo bwa kucincimusha ubwa Ukusokolola.

Ukufisulula—Cinshi Kwaba?

3. Cinshi cintu abantu abengi batontonkanya Ukufisulula na Armagedone fipilibula?

³ Bushe Ukusokolola takwitwa na kabili Ukufisulula? E fyo, “ukusokolola” kwaba bupilibulo bwa Cibemba ubwa a·po·kaʹly·psis mu malembo ya ciGreek. Abantu abengi balinganya Ukufisulula ku bonaushi bwa calo ubwa nkondo ya manyukiliya. Mu musumba wa Texas, U.S.A., umo impendwa sha fyanso fya manyukiliya fipangwa, abantu bakongamina ku butotelo basosa ukuti, “Tukaba ni fwe ba ntanshi ukuya.” Bashibutotelo ba ilya ncende bashimikwa ukuba “abashininwa ukuti Armagedone tali fye uushingasengaukwa lelo na kabili napalama, no kuti ukulwa kwa kupelako pa kati ka maka ya busuma no bubi, aya kwa Lesa na Satana, kukacitikako ngo kwipayaula kwa manyukiliya.”a

4. Cinshi ico ishiwi “ukufisulula” mu cishinka lipilibula, kabili mulandu nshi ibuku lya kupelekeshako ilya Baibolo mu kulingisha lyakwatila umutwe wa “Ukusokolola”?

⁴ Lelo mu cine cine cinshi caba ukufisulula? Nangula amadikishonari yalondolola mu kubomfya amashiwi pamo nga “ukwaluka kwa muyano mu lukaakala ukupalamine,” a·po·kaʹly·psis wa ciGreek ku citendekelo apilibula “ukukupukulapo” nelyo “ukufimbulapo.” Muli ifyo, ibuku lya kulekeleshako ilya Baibolo mu kulinga lyakwata umutwe wa “Ukusokolola.” Muno tusanga, te bukombe fye bwabamo imfwa bweka ubwe shamo lya calo, lelo no kufimbulapo kwa cine ca bulesa icifwile ukukuula mu mitima yesu isubilo lyabembela ne citetekelo cishingaseshiwa.

5. (a) Ni bani bakonaulwa pa Armagedone, kabili ni bani bakapusunsuka? (b) Ni nshita nshi iya ku ntanshi iyakatama ipembelela bakapusunsuka ba Armagedone?

⁵ Ca cine, Armagedone alondololwa mwi buku lya kulekeleshako ilya Baibolo pamo ngo “kulwa kwa bushiku bukalamba bwa kwa Lesa [Wa] maka yonse.” (Ukusokolola 16:14, 16) Lelo kukaba ukwapusana apakalamba ukufuma ku kwipayaula kwa manyukiliya! Ukwipayaula kwa musango yo mu kupalako kuti kwapilibula ukulofiwa kwa bumi bonse pe sonde. Mu kucilana, Icebo ca kwa Lesa cipeela ukwebekesha kwabamo insansa ukwa kuti ni bakakaanya ba kwa Lesa babipisha beka fye bakonaulwa—ku maka yaba pe samba lya kulama kwa kwa Lesa. (Ilumbo 37:9, 10; 145:20) Ibumba likalamba ilya bantunse, ukufuma mu nko shonse, likapusunsuka akalume ka bupingushi bwa bulesa pa Armagedone. Kristu Yesu lyene akacema no kutungulula aba ku bumi bwa ciyayaya mwi sonde lya paradise. Bushe taufwaya ukuba umo uwa bene? Mu nsansa, Ukusokolola kulangisha ifyo kuti waba!—Ukusokolola 7:9, 14, 17.

Ukusapika Inkama sha Bulesa

6. Mu kupita kwa myaka, fitabo nshi fyasabankanishiwa kuli Watch Tower Society ku kusanikila ulubuuto pa Ukusokolola?

⁶ Pamo nga mu kubangilila kwa 1917, Watch Tower Society yasabankenye icitabo The Finished Mystery (Inkama Yapwishishiwa). Uku kwali kulandapo kwa cikomo ne cikomo pa mabuku ya Baibolo aya kwa Esekiele no Ukusokolola. Lyene, lintu ificitika fya mu calo fyatwalilile ukufunguluka mu kufikilishiwa kwa busesemo bwa Baibolo, icitabo calingana ne nshita ica mavolyumu yabili icakwete umutwe uwa Light (Ulubuuto) calipekanishiwe, ukukakulwa mu 1930. Ici capeele ukusambilila kwalingana ne nshita ukwa Ukusokolola. Ulubuuto lwatwalilile ‘ukusaamina abalungama,’ ica kuti mu 1963 Sosaite yasabankenye icitabo ca mabula 704 “Babylon the Great Has Fallen!” God’s Kingdom Rules! (“Babiloni Mukalamba Nawa!” Ubufumu bwa kwa Lesa Buleteka!) Ici capeele ubulondoloshi bukalamba ubwa ilyashi lya kale ilya kwima no kuwa kwa Babiloni Mukalamba, ubuteko bwa calo ubwa butotelo bwa bufi, kabili casondwelele no kulanda pa fipandwa fya kupelako pabula ifya Ukusokolola. Lintu ‘inshila ya balungami yakulileko ukubengeshima,’ no kucilisha mu kulosha ku mibombele ya cilonganino, kwakonkelepo mu 1969 volyumu wa mabula 384, “Then Is Finished the Mystery of God” (“Nomba Naipwishishiwa Inkama ya kwa Lesa”), iyalandile pa fipandwa fya kubalilapo 13 ifya Ukusokolola.—Ilumbo 97:11; Amapinda 4:18.

7. (a) Mulandu nshi Sosaite yapayanishisha ici citabo pa Ukusokolola? (b) Fya kwaafwilisha nshi ifya kusambilila fyapayanishiwa muli ici citabo ku kumwenamo kwa bakabelenga?

⁷ Mulandu nshi icitabo cimbi pa Ukusokolola cingasabankanishiwa pali ino nshita ya nomba? Ubwingi bwa fyebo ifyasabankanishiwa akale fyaba ifyalondoloka, kabili tacaba ica kucitikako ukupilibula no kusabankanya mu kusaalala kwa calo mu ndimi ishingi. E co, camoneke ukulinga ukupayanya icitabo pa Ukusokolola muli volyumu umo fye kabili mu mibele iyo ingaletwako mu kwanguka mu mpendwa ya ndimi. Ukulundapo, ishuko lya mu nshita lyalibuulwa muli iyi volyumu kupayanya ifya kwaafwilisha ukusambilisha, ukusanshako ifilangililo, amacarti, no kusupawila, uko kulingile ukwaafwa bakabelenga ukwikata mu kumfwika ukukatama kwa ubu busesemo bwa kusungusha.

8. Cinshi caba umulandu wacilapo ukukosa uwa kusabankanishisha ici citabo?

⁸ No mulandu wacilapo ukukosa uwa kusabankanishisha ici citabo kukabila kwa kulingana ne nshita ne cine ca nomba. Yehova aletwalilila ukusanikila ulubuuto lwakulilako pa bupilibulo bwa Cebo cakwe, kabili kuti twacetekela ukuti ukumfwikisha kwesu ukwa Ukusokolola, pamo pene na masesemo yambi, fikanonwa lintu tulepalamina ku bucushi bukalamba. (Mateo 24:21; Ukusokolola 7:14) Cili icakatama ukuti ifwe twebwe bwino. Nge fyo umutumwa Petro alembele ukukuma ku busesemo bwa bulesa ati: “Kuti cawama nga mwayangwako; cileaka nge nyali umwafiita, busuke buce Ubushiku, no lutanda lwa lucelo lutule mu mitima yenu.”—2 Petro 1:19.

9. (a) Pamo na masesemo yambi, cinshi ico Ukusokolola kulanga ukuti Lesa akabumba? (b) Icalo cipya cinshi, kabili ni shani wingapusunsukila muli cene?

⁹ Ukusokolola kulundapo ubushinino bwa kuko ku masesemo ya Baibolo yambi ayengi, ukulangisha ukuti Yehova Lesa afwaya ukubumba imyulu ipya ne sonde lipya. (Esaya 65:17; 66:22; 2 Petro 3:13; Ukusokolola 21:1-5) Ukucilisha, ubukombe bwa kuko bwalungikwa ku Bena Kristu basubwa, abo Yesu ashita ku mulopa wakwe ukuba bakateka banankwe pamo na wene mu myulu ipya. (Ukusokolola 5:9, 10) Nangula ni fyo, iyi mbila nsuma ikakosha icitetekelo ca ayo mamilioni abalolesha ku ntanshi ku bumi bwa muyayaya pe samba lya Bufumu bwa kwa Kristu. Bushe iwe uli umo uwa yaba? Lyene Ukusokolola kukakosha isubilo lyobe ilya kwikala mu Paradise, ngo lubali lwe sonde lipya, mu kuba no kuipakisha ukufula kwa mutende, ubumi bwacincimuka, no kusempauka kwa kupayanya kwa kwa Lesa ukushakabale akupwa. (Ilumbo 37:11, 29, 34; 72:1, 7, 8, 16) Nga ulefwaya ukupusunsukila muli ico calo cipya, cili icapamfya, ee, ce kambisho, ukuti upeeleko ukusakamana ku bulondoloshi bwa Ukusokolola ubwaumfwika ubwa kalume kabamo ukusonga akapalamine nomba.—Sefania 2:3; Yohane 13:17.

[Futunoti]

[Icikope pe bula 7]