Bilisha Ubukombe bwa Kucincimusha Ubwa mu Ukusokolola

¹ Icitabo ca Akalume ka Ukusokolola calitwafwa ukumfwikisha ubukombe bwa kucincimusha ubwalembwa mwi buuku lya Ukusokolola. Afwa bambi ukutesekesha ifyo bulya bukombe bubambukila pa kulangisha ici citabo mu butumikishi mu March. Kuti pambi wasanga imitubululo yakonkapo ukuba iya kwaafwa mu kupekanishisha imipeelele yobe.

² Pa numa ya kuposha kwalinga, kuti pambi wasosa icapale ci:

◼ “Bushe mwalitala amumfwapo aba pali bakabalwe bane aba mu Kufisulula? [Leka ankuleko.] Ubulondoloshi bwapusanapusana ukukuma ku fintu aba aba pali bakabalwe bemininako bwalipeelwa. Lelo bushe mwalishibe ukuti ukunina kwabo ukwa mampalanya mu cishinka kwaba lubali lwa busesemo bwa Baibolo ukusobela ifya kuponako ifyo fyacitika mu nshita yesu no kuti ifwe bonse twalibimbwamo mu nshila imo nelyo iibiye? [Leka ankuleko.] Bushe kuti mwatemwa ukumfwikisha ubu busesemo na cintu ukufikilishiwa kwa buko kupilibula kuli ifwe?” Alwila ukusakamana ku fikope mu cipandwa 16 ica citabo ca Akalume ka Ukusokolola no kukakanyamo ifikomo fimo ifili mu filembo fikalamba. Nelyo kuti walanda pa lubali lumo ulwa cimonwa pa kubomfya trakiti wa Bushe Ici Calo Cikapusunsuka? Tambika icitabo kabili tantika ukubwelelako ku kulanshanya ifyafulilako pa lwa cimonwa no bupilibulo bwa ciko.

³ Atemwa napamo kuti watemwa ukwesha imitununukile iyapale yi:

◼ “Bushe mwalyumfwapo inumbwilo ‘Armagedone’? [Leka ankuleko.] Abengi batontonkanya ukuti ilosha ku nkondo ya kupomona iya manyukiliya mu nshita yesu. Mu cishinka, Armagedone cintu capusanininako. Ukulingana na Baibolo, ikapilibula ukwaluka kukalamba ku kuwaminako, ukufumamo icalo ica mutende ubelelela.” Ukushintilila pa kwankulako kwa muntu, kuti pambi wayalwila ukusakamana kwi lembo pamo nga Ukusokolola 16:16 nelyo Ilumbo 37:10, 11 kabili lyene ukutonta ukusakamana ku cipandwa 39 ica citabo ca Akalume ka Ukusokolola. Pali ino nshita tambika icitabo. Nga te ifyo, kuti pambi wasalapo ukulanguluka ifishinka fyalinga muli trakiti ya Bushe Ici Calo Cikapusunsuka?

⁴ Kuti pambi waba na maka ya kubalamuna ubuseko pa kubomfya iyi mitubululo:

◼ “Pali ino nshita ya mwaka, abengi ukushinguluke calo baletontonkanya pa mfwa no kubuushiwa kwa kwa Yesu Kristu. Bushe mwalitalile amutwishikapo pa lwa cintu acita ukutula pa kubuushiwa kwakwe? Ifintu fya kucincimusha ifingi mu kasuba kesu fyasuntinkana no lubali lwa kwa Yesu ulwa ndakai mu mifwaile ya kwa Lesa. Fimo ifya fyene fyalilondololwa mwi buuku lya Baibolo ilya Ukusokolola. Kuti mwasambilila ifingi pa lwa mifwaile ya kwa Lesa iya kutuma Umwana wakwe kwi sonde na cintu ico cipilibula kuli imwe na batemwikwa benu.” Kuti pambi waba na maka ya kwalwila ukusakamana ku maparagrafu 1 na 2 aya cipandwa 41 aya citabo ca Akalume ka Ukusokolola nelyo ukwebekesha ifishinka fyalinga ukufuma muli bamagazini bafuma aba nomba aba Ulupungu lwa kwa Kalinda nelyo Loleni! Nelyo kuti pambi wafwaya ukubomfya trakiti wa Ubumi mu Calo Cipya Ica Mutende ku kubalamuna ubuseko bwalundwapo.

⁵ Shininkisha ukulaalika uuli onse uwalangisha ubuseko ku kusangwa ku Cibukisho. Mu kuba ne paalo lya kwa Yehova, pambi ukaba na maka ya kwaafwa umo ‘ukumfwe fyebo fya kusesema uku, no kubake fyalembwamo.’—Ukus. 1:3.