Palameni Kuli Lesa
“Mulepashanya Lesa”
ICIKUUKU. Ukulangulukilako. Ukubelela uluse. Ukutemwa. Ica bulanda ca kuti bantu abanono sana abakwata iyi mibele iisuma muno nshiku. Nga imwe? Bushe mwalyumfwapo kwati nangu mweshe shani ukuba ne mibele iisuma tamwakakumanishe? Umutima kuti wamulengulula no kumweba ukuti ifintu fimo, pamo nga imisango yabipa iyo mwakwata pa myaka iingi nelyo ifibi ifyo mwapitamo, e filenga mwafilwa ukuba ne mibele iisuma. Lelo, Baibolo ilatusambilisha icishinka icisuma sana ica kuti Kalenga wesu alishiba ukutila kuti twaba ne mibele isuma.
Icebo ca kwa Lesa cikoselesha Abena Kristu ba cine ukutila: “E ico, mulepashanya Lesa, apo muli bana bakwe abo atemwa.” (Abena Efese 5:1) Ayo mashiwi yasuma sana pantu yatulanga ukutila Lesa alicetekela abantu abamupepa. Cinshi twasosela ifyo? Yehova Lesa apangile umuntu mu cipasho cakwe, ukulingana ne fyo umwine aba. (Ukutendeka 1:26, 27) E ico Lesa apangile abantunse ne mibele iyo na o akwatako.a Kanshi, ilyo Baibolo ikoselesha Abena Kristu ‘ukulapashanya Lesa,’ ninshi cili kwati Yehova umwine alebeba ati: ‘Nalimucetekela. Nalishiba ukutila nangu ca kuti mulalufyanya, kuti mwaeshako ukuba nga ine.’
Bushe mibele nshi iya kwa Lesa imo iyo twingapashanya? Ifikomo fyapalama ne ci tulelandapo filasuka ici cipusho. Moneni ukutila ilyo Paulo ashilatweba ukutila tulepashanya Lesa, abalile atila “e ico.” Aya mashiwi yalelanga ukutila alikonkenyepo ukufuma apo ashilile mu cikomo cafumineko, icilanda pa cikuuku, inkumbu, no kubelela uluse. (Abena Efese 4:32; 5:1) E lyo nomba mu cikomo cakonka pali cilya cikoselesha ukulapashanya Lesa, Paulo aeba Abena Kristu ukuti mu fyo balecita bafwile ukutemwa bambi ukufuma pa nshi ya mutima. (Abena Efese 5:2) Ca cine nga tulefwaya ukuba ne cikuuku, inkumbu, ukubelela bambi uluse, no kubatemwa, twalikwata uwa kupashanya uwakwata sana iyi mibele, no yu ni Yehova Lesa.
Mulandu nshi tulingile ukufwaila ukuba nga Lesa? Moneni icilingile ukutulenga ukupashanya Lesa icaba mu mashiwi ya kwa Paulo aya kuti: “Mulepashanya Lesa, apo muli bana bakwe abo atemwa.” Bushe batini aya te mashiwi ayasuma nga nshi? Yehova amona abamupepa ukuti bana abo atemwa nga nshi. Filya fine umwana munono afwaya ukuba nga bawishi, e fyo na Bena Kristu ba cine babombesha ukuba nga Shibo wa ku muulu.
Yehova tapatikisha abantunse ukulamupashanya. Lelo, alitucindika pa kutuleka ukulaisalila ifyo tulefwaya ukucita. Kanshi ni mwe mwe bene mukasala nampo nga mwa kulapashanya Lesa nelyo iyo. (Amalango 30:19, 20) Nomba mwilalaba ukutila kuti mwaba ne mibele ilya ine Lesa akwatako. Kwena pa kuti mupashanye Lesa mufwile intanshi ukwishiba ifyo aba. Baibolo kuti yamwafwa ukusambilila pa mibele ne nshila shonse isha kwa Lesa uwaba ne mibele iisuma nga nshi iyalenga abantu abengi ukulamupashanya.
[Futunoti]
a Ilembo lya Abena Kolose 3:9, 10, lilanga ukuti ukupangwa mu cipasho ca kwa Lesa kulosha ku mibele. Abafwaya ukusekesha Lesa bakoseleshiwa ukufwala “ubuntu bupya, ubulelengwa cipya cipya ukulingana ne cipasho ca kwa Kalenga wa buko [Lesa].”