Ulubali 3—Nonkelamo mu Isukulu lya Butumikishi bwa Teokrasi Ilya 1996
1 Umutumwa Paulo afwaile bamunyina ukumupepelako pa kuti engaba na maka ya kulanda imbila nsuma mu kushipa. (Efes. 6:18-20) Tufwaisha ukulundulula ayo yene maka. Pa kufikapo, tulatasha ukwaafwa uko Isukulu lya Butumikishi bwa Teokrasi lipayanya, umo abasangwa kuli uku kulongana abafikapo bakoseleshiwa ukulembesha.
2 Pamo nga basambi, tupokelela ukufunda kwa pa lwesu ku kutwaafwa ukuwamyako amaka yesu aya kulanda no kusambilisha. (Amapi. 9:9) Na kabili kuti twanonkelamo pa kukutika ku kufunda uko abasambi bambi bapokelela, ukubomfya ifyo tulesambilila. Lintu tulepekanya ilyashi, tulingile ukubelenga ulupapulo lufuminemo ifyebo mu kusakamanishisha pa kushininkisha ukuti ifyo tulelondolola fili ifyalungama. Ifishinka fikalamba na malembo ifyo tulebomfya filingile ukumfwana ne nshila tulelundulwilamo umutwe wa lyashi onse. Nga ca kuti ilyashi libimbilemo umuntu na umbi, lilingile ukupitulukwamo mu kubangilila nga nshi ilyo talilapeelwa mu sukulu. Ilyo tulelunduluka, tulingile ukubombesha ukulanda ukwabula ukubelenga autulaini, ukubomfya ifyebo ifipi mu cifulo ca kulabelenga fyonse.
3 Bonse abakwete amalyashi mu sukulu balingile ukufika mu kubangilila, ukupeela kangalila we sukulu slipi wa Ukufunda kwa Milandile, no kwikala ku fipuna fya ku ntanshi ya Ŋanda ya Bufumu. Bankashi balingile ukwishibisha kangalila we sukulu mu kubangilila fintu imitantikile yabo ili kabili nampo nga balaiminina nelyo ukwikalako pa lyashi lyabo. Ukubombela capamo bonse muli ishi nshila kulasangwilako kuli programu musuma kabili cilaafwa abo balebombela ku cisebele ukupekanishisha ifintu fyonse libela.
4 Ukupekanya Ilyashi Na. 2: Imifwaile imo iya kubelenga Baibolo yaba kwaafwa umusambi ukuwamyako amaka yakwe aya kubelenga. Ni shani fintu ici cingapwishishiwa mu kutunguluka? Ukubelenga ifyebo mu kupongomoka mu kubwekeshabwekeshapo yaba ni nshila yawamisha iya kufibeleseshamo kabili umusambi kuti akwata imfundo shikalamba mu kulengama mu muntontonkanya. Lemba pa cikomo ifyo amashiwi yashimbulwa. Lyene belesha ukupeela ilyashi mu kupongomoka pa kubeleshanya no musango kalemba wa ilyo ibuuku alilembelemo. Bakabelenga bamo basango kuti ukupitulukamo mu kupongomoka pa ntanshi ya cilola kulabafwilisha ukuwamyo kumone bumba.
5 Ukubelenga Baibolo kwaba ukwakatama ku bakalamba na banono pamo. Ilingi kulabako imibele iifwayo kubelenga Baibolo mu kupongomoka. Ili lyaba ni limo ilya malyashi ya mwi Isukulu lya Butumikishi bwa Teokrasi. Kabili ifwe bonse tulabelenga Amalembo lintu tulanda ku bantu mu butumikishi bwesu. Lelo bushe tulayabelenga bwino bwino? Bushe tulayabelesha ica kuti tatuleipununa, pa kuti twingashimpa imbali isho shikumine ifyebo fyesu ifya kushinina na pa kuti ukubelenga kwesu kwingomfwika ukwa cifyalilwa, ukwa kulanshanya? Ukupekanya kulakabilwa mu kushininkisha lintu tulebelenga Baibolo. Ibukisha ukuti ici caba Cebo ca kwa Lesa, ukuti caisulamo ifyalembwa fisuma kabili ifya kukunta mu kuibela, pamo pene no kupelulula kwalungikwa kabili ukwabamo amano. Tulingile ukufwaya ukufibelenga mu kubamo umucinshi ku kumwenamo kwa bakakutika. Nga twaishibila kabela ukuti tuli no kubelenga Baibolo, tulingile ukupekanya mu kusakamanisha, nga tuli no kusengauko kuipununa pa mashiwi yashabeleshiwa, ilongo lya mashiwi nelyo umusango wa numbwilo.
6 Abafyashi kuti bayafwa abana babo ukupekanya amalyashi yabo aya kubelenga. Ici kuti napamo casanshamo ukukutika lintu umwana alepitulukamo kabili lyene ukumupeela imitubululo ya kwaafwa pa kuti engawamyako. Inshita yapeelwa ilasuminisha ukukwata intendekelo iipi no kusondwelela kwalinga uko kulenga ifishinka fikalamba ukubomfiwa. Muli ifyo umusambi alundulula amaka yakwe aya kulanda ukwabula ukubelenga autulaini.
7 Kemba wa malumbo mu kubamo ipepo alombele ukuti: “Mwe Shikulu, munjasamune imilomo, na ’kanwa kandi kakabile fya kumutasha.” (Ilu. 51:15) Shi ukwakanamo kwesu mwi Isukulu lya Butumikishi bwa Teokrasi kutwaafwe ukwikusha uku kufwaisha kumo kwine.