Icibombelo Cipya ku Kwaafwa Abantu Ukwishiba Ififwaikwa fya kwa Lesa
“IMILEMBELWE ya uko iyayanguka, iya kulungatika, kabili iyabamo icikuuku ikaletako ifisabo ifingi ukucila ifyo tuletontonkanya. Imitwe ya malyashi yalondololwa mu nshila iishapikana kabili iishaiwamina ica kuti umuntu uuli onse uwafumaluka, uulesapika kuti aseshiwa ukusoso kuti, ‘Lesa aba muli imwe cine cine.’” (1 Abena Korinti 14:25) E fyasosele umo uwa Nte sha kwa Yehova uwa ku Thailand lintu alelondolola broshuwa mupya, Cinshi Cintu Lesa Afwaya Kuli Ifwe? Abamufumishe ni ba Watch Tower Society pa Mabungano ya Citungu aya “Inkombe sha Mutende wa Bukapepa” aya 1996/97.
Uyu broshuwa wa mabula 32, uwa fikope fyabalabata apekanishiwa ukuba kosi wa kusambilila Baibolo. Alanda pa fisambilisho fya Baibolo ifya kutendekelako. Imilembele yaba iyayanguka kabili iya kwipifya, ukulondolola mu kumfwika cintu Lesa afwaya kuli ifwe. Bakabelenga te kuti basange ubwafya bwa kumumfwikisha. Ni shani fintu mwingatungulula isambililo lya Baibolo muli uyu broshuwa umupya?
Bomfyeni ifipusho. Kwalibako ifipusho pa kutendeka kwe sambililo limo na limo. Muli no kusanga amanambala ya maparagrafu umulesangwa ifyasuko mu fya kwisalila ( ) pa numa ya cipusho cimo na cimo. Ifi fipusho kuti pambi fyabomfiwa mu kusambilisha ilyo mushilaingila mwi sambililo e lyo na pa kupitulukamo. Ku ca kumwenako, pa kutendeka isambililo lya Baibolo ilya mu ŋanda, kuti pambi mwaipusha umusambi ifyo aletontonkanyapo. Mu cifulo ca kulungika ifyasuko fyalubana ifili fyonse apo pene, kuti mwakonkanyapo fye ukusambilila. Lintu mwafika pa mpela ye sambililo, kuti mwabwelela ku fipusho ukumona nga ca kuti umusambi nomba kuti ayasuka mu kumfwana na Baibolo.
Belengeni amalembo. Mwi sambililo limo na limo, amashiwi ayepi aya cine ca mu Baibolo yalekonkwapo na malembo ku kutungilila yene. Apantu ubwingi bwa malembo yaloshiweko fye, tayambwilwe iyo, cili icacindama ukukoselesha umusambi ukubelenga aya malembo umwine muli Baibolo wakwe. Alekabila ukubelenga no kwetetula pa Cebo ca kwa Lesa ilyo ashilabomfya cene mu bumi bwakwe.—Yoshua 1:8.
Landenipo pa fikope. Uyu broshuwa aisulamo ifikope ifingi ifya kukopa ne fya kulenga fye—ifikope fyonse pamo ukucila pali 50. Ifi tafyabelako fye ku kusekesha amenso lelo nge fya kwaafwa ukusambilisha ifyalundwapo. Ku ca kumwenako, amasambililo ya kulekelesha yabili (limo na limo ilyalepa fye ibula limo, pa mabula yalolenkene) yakwata imitwe ya kuti “Ukwaafwa Bambi Ukucita Ukufwaya kwa kwa Lesa” na “Ukupingulapo Kobe Ukwa Kubombela Lesa.” Ifikope ifyafimba aya mabula yabili filonsha ukulunduluka kwa ku mupashi ukwa muntu umo wine, ukulangisha aleshimikila ubunte bwa mu lyashi, alebombako umulimo wa ku ŋanda ne ŋanda, aleipeela umwine, na mu kupelako alebatishiwa. Pa kulungatika ukusakamana kwa musambi kuli ifi fikope, kuti pambi mwamwaafwa ukumona ifintu fifwaikwa ukucitwa pa kubombela Lesa.
Ni shani nga ca kuti uulesekelela tabelenga bwino nelyo taishiba fye no kubelenga? Sosaite ilepayanya uyu broshuwa mupya pali kaseti mu ndimi shafulilako. Kaseti akwetemo ifyebo fya muli broshuwa pamo pene na malembo yaloshiwako ayengi. Akopwa muli iyi nshila: Icipusho ca kubalilapo cilabelengwa, ukukonkwapo na paragrafu (nelyo baparagrafu) abaleasuka ico cipusho, pamo pene na malembo yamo yamo ayaloshiweko. Lyene icipusho cakonkapo cilabelengwa, ukukonkwapo ne fyebo na malembo ayaleasuka cene, e pa kukonkanyapo ifyo fine. Umusambi kuti akutika kuli kaseti ilyo alepekanishisha isambililo. Kaseti kuti na kabili abomfiwa lintu muletungulula isambililo.
Abasangilweko kwi bungano baalefwaisha ukubomfya uyu broshuwa umupya mu butumikishi bwabo ubwa mwi bala. Ku ca kumwenako, inshiku fye ishinono pa numa ya kupokelela broshuwa, bapainiya babili (bakabila ba mbila nsuma aba nshita yonse) aba mu United States bashalike yene ku mwaume no mwanakashi abaleikala pamo abo batandalile. Lintu aba bantu babili baloleshe pa mutande wa fyabamo, isambililo lya kuti “Ifibelesho Ifyo Lesa Aapata” lyalibacebwishe. “Lyonse fye nasambilishiwe ukuti Lesa tapata—ena atemwa fye,” e fyasosele umukashana. “Ili e sambililo nalabalilapo ukubelenga.” Lintu bapainiya babili babweleleko umulungu wakonkelepo, umukashana atile: “Nalebelenga broshuwa mupya. Cintu cakosa ukucita ifintu fyonse ifyo tulingile ukucita. Yehova tasekelamo muli ifwe—tatwaupana. Kwena natupingulapo. Natupekanya ukuti tukoopane pali Cisano uyu mulungu uleisa.” Pa numa ya kukumbatila aba bapainiya babili, balundileko kuti: “Tulelombo bwelelo pa kukanalasambilila lyonse, lelo natwilulukwa nga nshi.”
Shi namubomfye broshuwa mupya uwa Cintu Lesa Afwaya ukufika pantu mwingapesha. Ali cibombelo cishaiwamina ku kwaafwa bambi ukwishiba ififwaikwa fya kwa Lesa.
[Ifikope pe bula 17]
Ni shani fintu muli no kubomfya broshuwa mupya?