Bushe Tatwaumfwapo Ifyo Kale?
1 Cine cine twalifyumfwapo! Yehova alabwekeshapo ifintu ifingi mu Cebo cakwe pa kuti abantu bakwe bengamwenamo. Yesu alebwekeshapo ifisambilisho pa lwa mbali shapusanapusana isha Bufumu. Abatumwa bakwe balitwalilile ukupitulukamo mu fya ku mupashi na bantu abali kale kale abaikashiwa mu cine.—Rom. 15:15; 2 Pet. 1:12, 13; 3:1, 2.
2 Mu nshita yesu ukuteyanya kwa kwa Yehova kwalitantika ukuti amasambililo yacindama yalesambililwa imiku iingi ku kulongana. Ifitabo fimo fyalisambililwamo imiku ne miku. Cine cine, calicindama ukumfwa ifintu ifyo twaumfwapo kale!
3 Ukubwekeshapo Kwalicindama: Ifya kutucinkulako fya kwa Yehova filalenga tuleumfwikisha ifintu, filatanununa amano yesu, no kukosha umupampamina wesu uwa kutwalilila abakosa lwa ku mupashi. (Amalu. 119:129) Ukupituluka mu fipimo fya kwa Lesa ne fishinte fyakwe kwaba kwati kulolesha mu cilola. Kulatwafwa ukuiceeceeta no kukanaba ‘bakoomfwa ba cilafi.’—Yako. 1:22-25.
4 Nga tatutwalilile ukupitulukamo mu cine, ifintu fimbi kuti fyasonga imitima yesu. Ifishimiko fya kwa Lesa filatukosha ku kucincintila ukusonga kwabipa ukwa calo ca kwa Satana. (Amalu. 119:2, 3, 99, 133; Fil. 3:1) Ifya kutucinkulako tupokelela pa lwa kufishiwapo kwa mifwaile ya kwa Lesa filatusakamuna ku kuba ‘abalola.’ (Marko 13:32-37) Ukusambilila icine ca mu Malembo imiku iingi kulatwafwa ukutwalilila ukwenda mu nshila ya ku mweo wa muyayaya.—Amalu. 119:144.
5 Ifyo Mwingamwenamo pa Lwenu: Tufwile ‘ukwalwila imitima yesu ku fishimiko fya kwa Lesa.’ (Amalu. 119:36) Nga twamona ukuti ku kulongana tukalasambilila ifyo twaishiba, tufwile ukupekanishisha kabela, ukubelenga amalembo ayalimo, no kutontonkanya pa fyo twingafibomfya. Shi twilasuula ukupekanishisha kabela ukupitulukamo kwa kulemba mu Isukulu lya Butumikishi bwa Teokrasi, ukumona kwati nangu tatupekenye cili fye bwino. (Luka 8:18) Te kuti ciwame nga tatulepoosako amano pa mulandu fye wa kuti icine cacindama cilalandwapo lyonse ku kulongana.—Heb. 5:11.
6 Shi natupashanye imibele ya kwa kemba wa malumbo uwatile: “Umwalole fishimiko fyenu nsekelelamo nga pa fyuma fyonse.” (Amalu. 119:14) Ca cine, twalyumfwapo kale ifi fyuma, kabili tukafyumfwa na kabili. Mulandu nshi? Pantu Yehova alishiba ukuti tulakabila ukufyumfwa!