‘Icilongwe ne Cishimiko’

“ELYO [Yehoyada shimapepo] afumishe umwana wa mfumu, amufwikile icilongwe pa mutwe, amupeele ne cishimiko; kabili bamucitile imfumu, no kumusuba.” (2 Ishamfumu 11:12) Ifi e fyo ibuku lya Ishamfumu lilondolola ukufwikwe cilongwe kwa Mfumu Yehoashi. Bushe wacimona ukuti pa mbali ya “cilongwe,” nelyo ica kufwala ku mutwe ca cifumu, Yehoyada na kabili abikile “cishimiko” pa mfumu yacaice. Cinshi cali cishimiko? Kabili mulandu nshi cabelele ulubali lwa uku kusefya kwa kufwikwe cilongwe?

Ishiwi lya ciHebere pano ilyapilibulwa “cishimiko” ilingi line lilosha ku Mafunde Ikumi nelyo Amalango ya kwa Lesa mu cinkumbawile. (Ukufuma 31:18; Ilumbo 78:5, Revised Standard Version) Mu kumfwana ne ci, ubulondoloshi bwalembwa ubwalinganako pali 2 Imilandu 23:11 bubelengwa muli The Jerusalem Bible (1966) ukuti: “Lyene Yehoyada afumishe umwana wa mfumu, amufwikile cilongwe, no kubika Amalango pali wene.” Nangu cibe fyo, pali 2 Ishamfumu 11:12, ubu bupilibulo bupyanikapo ishiwi “icinkwingili” pa “cishimiko,” nangu cingati ishiwi limo line ilya ciHebere limoneka mu fikomo fyonse fibili. Mulandu nshi?

Ukulandapo kwa pali Baibolo ukwaishibikwa ukwa ciGermany, mu citabo Herders Bibelkommentar, kulondolola ukuti bakapilibula bamo te kuti belenganye ukuti imfumu yali no kufwala Amalango pa mutwe wa iko nelyo pa kuboko kwa iko. Apantu, pa kulanda pa Mfumu Shauli, 2 Samwele 1:10 ilumbula icinkwingili (nelyo, ikosa) capamo ne cilongwe fintu afwele, basumina ukuti ilembo pali 2 Ishamfumu 11:12 lifwile pa kubalilapo lyabelengelwe ukuti “icilongwe ne cinkwingili.” Lelo uku kwelenganya kwa fye. Ukupyanika pa “icishimiko” “icinkwingili” kwimininako ukwaluka kwe lembo kukalamba.

The New Jerusalem Bible (1985) kanshi ibwesha intontonkanyo lya Malango, nelyo icipingo ce funde, ukupilibula ilongo lya mashiwi ukuti “no kumupeele kope wa cipingo.” Lelo bushe Yehoyada alipeele Yehoashi “cishimiko”? Ca cine, ishiwi lya ciHebere ilyapilibulwa “amufwikile” kuti na kabili lyapilibulwa “apeele.” Lelo monse mubili mu Ishamfumu na Imilandu, limoneka fye umuku umo, ukulosha kuli fyonse fibili icilongwe ne Cishimiko. Mu kulundapo, likonkwapo mu kwangufyanya ne shiwi lya ciHebere “pa.” E ico, ‘amufwikile pa’ ifwile ukuba e bupilibulo bwalungikwa. Fyonse fibili icilongwe ne Cishimiko ‘fyafwikilwe pa’ Mfumu Yehoashi wacaice, nga fintu New World Translation ilanga.

E co mulandu nshi—kabili ni shani—shimapepo mukalamba ‘afwikile’ cishimiko pa mfumu yacaice? Langulukeni imimwene ya wasambilila umwina Germany Otto Thenius: “Amalango, ibuku umo ifipope fya kwa Mose fyalembelwe. Ili mu cimpashanya lyabikilwe pa mutwe wa mfumu, pa numa asaamikwe ne cilongwe.” (Die Bücher der Könige) Mu kupalako, Profesa Ernst Bertheau alandapo kuti: “Ukubika kwa Malango [pa mfumu] mu cine cine kwakwete amano ya cimpashanya, ukuti imfumu yali iyakakililwako ukuteka mu kumfwana na yene.”—Die Bücher der Chronik.

Lesa akambishe ukuti lintu imfumu yabuulile cipuna ca iko pa bufumu, ilingile ukuilembela kope wa Malango, ukuibelenga no kuibomfya mu bumi bwa iko bonse. (Amalango 17:18-20) Ukufwika “icishimiko” pa mfumu ipya pambi cali cilangililo ca cimpashanya icipi ukulangilila nelyo fye cingati aali ni mfumu nomba, taali uwasumbuka ukucila pa Malango ya kwa Yehova. Mu kubulwe nsansa, pa numa ya mfwa ya kwa Yehoyada shimapepo, Yehoashi mukalamba alabile ili sambililo lyakatama kabili panono panono ashile ukupepa kwa kwa Yehova, mu kupelako ukufwa pa maboko ya ba kepaya.—2 Imilandu 24:17-25.