Lekeni Imikalile Yesu Icindike Yehova—Ulubali 2

¹ Abana cilambu cafuma kuli Yehova. (Amalu. 127:3) Lelo mimwene nshi yalinga pa lwa bana? Bushe cisuma ukupatikisha balupwa ukukwata abana? Abana te cintu cacindamisha pali fyonse. Ukubombela Yehova no kuba aba busumino e fyacindama ukucilapo. Pali Mateo 24:19 Yesu alangilila ukuti ukukwata abana kuti kwalenga ukufulumuka kwesu ukwa ku mupashi ukwafya.—Moneni Ulupungu lwa kwa Kalinda ulwa August 1, 2000, amabula 20-3.

² Ukukwata Abana. Abafyashi abengi bakwata abana ukwabula ukupekanya. Bamo balalomba ubwafwilisho kuli bambi pa kuti bengasakamana abana babo bonse. (1 Tim. 5:8) Bambi baseekesha abana babo kuli balupwa, ne co cilapusana ne funde lya kwa Yehova ilya pa Abena Efese 6:4. E lyo bambi na bo basha abana ku mwana munabo nelyo ku muleshi ukuti alemukansha. Abafyashi bamo pa kufilwa ukuba ne citemwishi calingana ku bana babo bonse, basakamana sana abana banono no kuleka abakalamba “baleimwena.” (Tito 2:4; Amapi. 3:12) E lyo kwaliba no musango wa kweba bapainiya nelyo bakasabankanya bambi ukusambilisha abana ba umo ilyo abafyashi abene e bafwile ukubomba uyu mulimo bapeelwa na Lesa. Ulupungu lwa kwa Kalinda ulwa June 1, 1998, mu cipande caleti “Ifya Kusakamana Ulupwa,” lwasosele pe bula 22 aluti, “Baeluda ba kutemwa mu cilonganino bakesha apapela maka yabo ukukoselesha abafyashi lintu balesakamana abana babo. Napamo kuti batubululo kuti kukabe ukulanshanya kwa lupwa no kuti nabo bakasangweko ku kupeela imitubululo ingabomba pa lwa fintu bengasambilila capamo. Lelo tabakapoke umulimo wa bafyashi, abapeelwa uyo mulimo ukulingana na Malembo.”

³ Mabuyo Nshi aya Kubikila Abana? Bikeni ubuyo bwa kulenga abana benu ukuba abasambi ba busumino aba kwa Yesu. Amasambililo ya ku calo kwena na yo yalicindama, lelo tayalingile ukuba ya ntanshi. Sengaukeni ukutwala abana benu kwi sukulu lya kukuuka uko bashakakwate sambililo lya lupwa nelyo inshita ya kuya mu mulimo atemwa ukusangwa ku kulongana lyonse.—Moneni icipande cileti “Bushe Umwana Wenu Alingile Ukuya kwi Sukulu lya Kukuuka?” mu Ulupungu lwa kwa Kalinda ulwa March 15, 1997.

⁴ Mwe bashibo, bushe ilingi tamusangwa pa ng’anda? Nga ca kuti ilingi line tamusangwapo, abana benu bakalamufuluka kabili tabalenonkelamo mu kusalapula kwenu ne ca kumwenako cenu. Calicindama ukuteuluka pa kuti mulepepela Yehova capamo ngo lupwa. Bikileni abana benu ubuyo bwa mulimo wa mwi bala na bupainiya. Bengi abacili balekabila ukwishibe cine. Bushe ulupwa lwenu kuti lwakwatako painiya umo? Mwitontonkanya ukuti abana e bakulete ndalama ukupitila mu mpango mukapokelela nelyo ukuti abana e penshoni yenu! Abrahamu aitemenwe ukupeela umwana wakwe Isaki kuli Yehova. Hana na o alipaalilwe pa kupeela Samwele kuli Yehova.—1 Sam. 1:28.

⁵ Ifintu fya Kusambilisha Abana Benu. Sambilisheni abana benu ukwiluka. Bushe balishiba ico ubufi bwabipila? Mulandu nshi bashilingile ukucitilo lubuli? Mulandu nshi imyata imo ishabela ya Bwina Kristu? Abana bakabila ukusambilila ifya kupingula bwino. Bomfyeni Baibolo. Uku e “kufunda no kukonkomesha kwa kwa Shikulu.”—Efes. 6:4.

⁶ Basambilisheni ubufumacumi. Balondolweleni bwino bwino ukuti takwaba “ubufi bunono.” Abana balekabila ukwishiba ukuti nga nabeshiba icintu e lyo basosa abati “Nshishibe,” ninshi balebepa. Balondolweleni uwabalilepo ukubepa no mulandu Yehova apatila ukubepa.—Yoh. 8:44; Amapi. 6:16-19; Amala. 32:4.

⁷ Ukusambilisha abana Baibolo kukabalenga ukuba ne mibele isuma pamo ngo kulangulukilako. Abana abengi balaseka abalemana nelyo abakote, kabili balaseka umo nga apona nelyo nga aponenwa no busanso. Lelo bushe te cisuma ku Mwina Kristu ukwafwa nelyo ukusansamusha uwa musango yo? Sambilisheni abana benu ukukanasuula abapiina. Ni shani nga ca kuti umo mu lupwa nelyo mu bwina mupalamano nalwala? Bushe te cisuma ukumwafwa no kuba ne cikuuku?

⁸ Ni shani pa lwa nama? Balondolweleni ifyo Yehova ashimona. (Moneni Ukutendeka 9:9-11; Yona 4:11.) Pa kwipaya, ukucila ukushipaya bukatu bukatu, mulandu nshi mushingashipaila fye mu nshila isuma? Abantu balacita ifintu ifingi ifya kucusha no kulungulusha inama cila bushiku, lelo abana benu nga basambilila ukulangulukilako, tabakapoole imbwa amabwe, ukutinta inama ku matwi nelyo ukushikaka na mawaya mu mukoshi.

⁹ Sambilisheni abana benu ubusaka. Mu cipandwa 4 ica citabo ca Insansa sha Lupwa mwaba ifyebo fisuma ifya kulanshanyapo. Balondolweleni ukuti Yehova aebele abena Israele ukuti balesamba. Tabasuminishe ukusha ifisooso mpanga yonse. Alefwaya balekonka ubusaka na pa kufuma ku cimbusu. (Amala. 23:12-14) Mwileka abana baleangasha ifya mfwalo fyabo. Lekeni bomfwikishe ukuti ifibelesho fya busali ifya bena mupalamano na bantu bambi abashipepa tafifwile ukutulenga ukuseebanya Yehova. Abana tabafwile ukupoosa amenshi icipoosepoose nelyo ukwikala icikaleikale no kusha ubusali. Abana banono kuti balebomfya cembalapoto. Basambilisheni ukuisunga mu nshila ya “mushilo.”—1 Pet. 1:16; 1 Kor. 7:14.

¹⁰ Ifi fyonse fikabila inshita no kubombesha, lelo mulafuma ifisuma. Ilyo mulebombela pamo na bana, balacishapo ukumutemwa. Kabili abana bakabeleshanya na bafyashi babo.—Luk. Mil. 2:24; 3:12, 13.

Bushe Muli Basha ba Fishilano Fishili fya Bwina Kristu?

¹¹ “E ico, mwe batemwikwa, apo mulolele fintu ifi, cincileni ukuti mukasangwe ababula akabi kabili ababula akalema mu mutende.” (2 Pet. 3:14) Ili lembo litupeela ukufunda kwa pa nshita yalinga sana. Tufwile ukucincila pa kuti tukasangwe ababula akabi kuli Yehova.

¹² Twalyalwike sana ilyo Yehova ‘atwitile ukuti tufume mu mfifi twingile mu lubuuto lwakwe ulwapesha amano.’ (1 Pet. 2:9) Imyata imo iifulwisha Yehova yaba ya Krisimasi, ukupepo tulubi, no kusefya inshiku sha kufyalwa. Tacayanguka ukwaluka ukufuma ku mfifi ukuya ku lubuuto. Kuti batupumya pa mulandu wa kuti tatucitako ifi fishilano fishili fya Bwina Kristu. Lelo ifwe bonse tufwile ukubebeta ifishilano fya ku ncende yesu ukumona nampo nga filomfwana no lubuuto, atemwa fyaba milimo ya mfifi.

¹³ Bushe ninshi imyata yonse ne fishilano fyalilubana? Iyo. Kwaba ifishilano ifisuma ifyo twingasungilila, lelo kwaba ne fibi ififulwisha Yehova. Ifishilano fimo ifyumfwana na Malembo fyaba kusekelela abeni, ukucindika abakalamba, no kwafwilisha ababulisha. Ifishilano fimbi, pamo nge miposeshe imo imo nelyo imifwalile te lingi fipinkana ne fishinte fya mu Baibolo. Lelo kwaba ifishilano fimbi ifyo Yehova afwaya tutalukeko. Pali fi paba ukufwala ifya miti miti. Ku calo, nga ca kuti umwana afyalwa kulaba fimo fimo ificitwa ku mulandu wa kutiina imipashi. Pa mfwa na pa fililo palaba ifishilano fishili fya Bwina Kristu ifingi.

¹⁴ Ukufwala impinga nelyo impimpi sha kuicingilila ku buloshi nelyo kuponenwa ne fibi kwaliseeka sana. Ifi fintu fyendela pamo no kupepe fiwa, kanshi kuti fyaonaula bucibusa bwesu na Lesa. Impinga nelyo impimpi fimoneka nge fingapeela umuntu amaka yacila pa cifyalilwa, lelo aya maka yafuma fye ku fibanda. Yehova alibinda ukufwala impinga nelyo impimpi mu Amalango 18:9-12; Abena Galatia 5:19-21, na mu Ukusokolola 21:8. Ukubomfya ifintu fya musango yu cimo no kupepo tulubi. Abena Kristu bakoseleshiwa ‘ukubutukako ku kutootelo tulubi.’—1 Kor. 10:14.

¹⁵ Bakapepa ba kwa Yehova aba ku kale balemona impinga ne mpimpi nge “fya muselu,” lelo abena Egupti, abena Roma na baGriki bena balefibomfya nge fya kubacingililako ku bubifi. Tatulefwaya ukupala balya bakapepa ba tulubi nangu panono! Nga tulebomfya impinga ne mpimpi ninshi tuleisansalika ku kusanswa ne fiwa nelyo ku kutunkwa ukuyobeka mu kupupe mipashi. Natushininkishe apabuuta na mu mikalile ya pa lwesu ukuti twalitalukako umupwilapo ku fishilano fyakuma ku kupepe fiwa.

¹⁶ Imitundu imo ifwaya ukuti kulebe ntambi sha kuwamya mukamfwilwa, kabili ishi ntambi ishingi te sha Bwina Kristu. Shimo isha ishi ntambi shaba kubeya umushishi, ukuleko kusamba, ukufwala ifya bu mukamfwilwa, ukupeela amalambo na fimbi ifyapalako. Bamo bafwaya ukulesha mukamfwilwa ukuupwa na kabili, lelo Baibolo isosa ifyebo fyapusanako pali 1 Abena Korinti 7:39. Bamo bafwaya ukumupyanika kuli bukwe bwakwe pa kuti abana ne fipe tafilubile, nelyo kuti bamweba ukulaala na bukwe bwakwe abati e kumuwamya. Ukukaana ifi fintu kuti kwaba bwesho bwakosesha kuli mukamfwilwa Umwina Kristu, lelo alingile ukwibukisha ukuti icisanshiwemo, kumfwila Yehova na mafunde yakwe.—1 Kor. 6:9, 10; Heb. 13:4.

¹⁷ Imyata ne fishilano ififulwisha Lesa fyasanshiwa mu “mibele . . . ya fye.” (1 Pet. 1:18) Yehova alisoka mu Abena Kolose 2:8 ati: “Cenjeleni ukuti umuntu emubeleleka mu kutemwa . . . ulongolo lwa fye, umwalole cishilano ca bantu, . . . no mwalola Kristu iyo.” Ca cine, kwaliba imyata iingatutwala muli ci citeyo.

¹⁸ Yesu aebele abaYuda bamo ati: “Imwe mwaleke funde lya kwa Lesa, no kubake ca cishilano ca bantu. . . . Mwasuule funde lya kwa Lesa, ukuti mubake ica cishilano cenu.” (Marko 7:8, 9) Ukutemwa twatemwa Lesa ne cine kulingile ukutulenga twaleka ifishilano fya bantu, no kubaka amafunde ya kwa Yehova. Yehova takapaale onse uuitunga ukuba umubomfi wakwe lelo ukonkelele fishilano fishili fya Bwina Kristu.