Abalemana—Lelo Abatwale Fisabo
1 Nga ca kuti na imwe muli bamo pa Nte sha kwa Yehova bamo abalemana, ubutumikishi bwenu na imwe kuti bwatwale fisabo. Na kuba, iyo mibele yenu kuti yalenga mwaba na mashuko yaibela aya kushimikila no kukoselesha bambi.
2 Ukushimikila Ubunte: Abengi abalemana balabombako sana ubutumikishi. Ku ca kumwenako, nkashi umo uwalemene no kuleka ukulanda bwino pa numa ya opareshoni, asangile ukuti kuti abombako umulimo wa magazini nga ca kuti umulume wakwe aimika motoka lwa mupepi na papita sana abantu. Inshita imo, ashalike bamagazini 80 mu maawala fye yabili! Pa mulandu wa mibele yenu iyaibela kuti mwakumana na bantu abo cishayanguka ukukumanya. Nga ni fyo, mulebamona nge bala lyenu ilyaibela.
3 Ukushimikila kwenu kuti kwatunguluka nga nshi! Ilyo bambi balemona umupampamina wenu ne fyo icine ca mu Baibolo calenga imikalile yenu ukuba bwino, kuti bafwaya ukuumfwako ubukombe bwa Bufumu. Kabinge, ilyo mwakumanya abantu abacululuka, ifyo mupitamo mu bumi kuti fyamwafwa ukubapeela icisansamushi ca mu Cebo ca kwa Lesa.—2 Kor. 1:4.
4 Kosheniko Bambi: Bushe tamwakoseleshiwe ku lyashi lyalandile pa bumi bwa baLaurel Nisbet, abakulikwe kuli mashini wa kubaafwako ukupeema pa myaka 37, lelo abayafwile abantu 17 ukwishiba bwino icine ca mu Baibolo? Ica kumwenako cenu na imwe kuti cakoselesha abasumina banenu ukuti balepilikita mu mulimo wa kwa Yehova.—g93 1/22 amabu. 18-21.
5 Nangu ca kuti imibele mwabamo ilelenga mulefilwa ukuya mu butumikishi imiku mwingafwaya ukuya, na lyo line kuti mwakoselesha bambi. Munyina umo atile: “Nimona ukuti nangu fye muntu uwalemana icabipisha kuti ayafwa sana bambi. Ine no mukashi wandi tuli nkosho ku bengi mu cilonganino. Pa mulandu wa mibele twabamo, lyonse tulasangwako.” Lelo, natwishiba ukuti napamo teti mubombe ukulingana no kupimpa kwenu pa mulandu wa bulema. Na lyo line, ilyo kwaba ukwafwilisha nalimo kuti mwacincila mu kubombako ubutumikishi. E ico, nga mulefwayako ubwafwilisho, mwishingashinga ukweba baeluda nelyo bambi mu cilonganino abengamwafwa.
6 Yehova alamona fyonse ifyo mucita pa kuti mumubombele, kabili alasekela mu mulimo mu mubombela no mweo onse. (Amalu. 139:1-4) Nga mwashintilila pali wene, akamupeela amaka pa kuti ubutumikishi bwenu buletwale fisabo no kuba ubusandulula.—2 Kor. 12:7-10.