Fwaleni Ukuicefya
1 Kacema wacaice acetekela Yehova no kucimfya icita ca maka. (1 Sam. 17:45-47) Umuntu wa fyuma ashipikisha akayofi mu kutekanya. (Yobo 1:20-22; 2:9, 10) Umwana wa kwa Lesa alungatika amalumbo pa fisambilisho fyakwe kuli Wishi. (Yoh. 7:15-18; 8:28) Muli fi fya kumwenako fyonse, ukuicefya kwalibombele sana. Na lelo line, ukuicefya kulafwaikwa sana mu mafya tupitamo.—Kol. 3:12.
2 Pa Kushimikila: Apo tuli batumikishi ba Bwina Kristu, tulashimikilako abantu ba misango yonse imbila nsuma mu kuicefya. Tatuba na kapaatulula ku ba mushobo umbi, intambi, nelyo icikulilo. (1 Kor. 9:22, 23) Nga ca kuti bamo mu bunkalwe bakaana ubukombe bwa Bufumu, ifwe tatuba abankalwe lelo mu kutekanya tufwaya abayana. (Mat. 10:11, 14) Ukucila ukuilangisha kuli bambi pa kwishiba kwesu na masomo, tubatwala ku Cebo ca kwa Lesa, apo twaishiba ukuti calikwata amaka ya kunashanasha ukucila icili conse twingasosa. (1 Kor. 2:1-5; Heb. 4:12) Tupashanya Yesu, no kupeela Yehova amalumbo yonse.—Marko 10:17, 18.
3 Mu Cilonganino: Abena Kristu bafwile no ‘kuikaka ubupete mu misana no kupyungilana.’ (1 Pet. 5:5) Nga tulemona bambi ukuti balitucila, tukafwaya inshila sha kupyungilamo bamunyinefwe ukucila ukwenekela ukuti e bo batupyungile. (Yoh. 13:12-17; Fil. 2:3, 4) Tatwalemona kwati twalicindama ica kuti tatufwile ukubombako imilimo pamo ngo kuwamya Ing’anda ya Bufumu.
4 Ukuicefya kulatwafwa “ukushipikishanya mu kutemwa” ne co citwala pa ntanshi umutende no kwikatana mu cilonganino. (Efes. 4:1-3) Kulatwafwa ukunakila abasontwa ukulatungulula. (Heb. 13:17) Kulatwafwa ukupokelela ukufunda nelyo ukusalapulwa ukuli konse. (Amalu. 141:5) Ukuicefya kulatukunta ukushintilila pali Yehova ilyo tulebomba imilimo iili yonse twingapeelwa mu cilonganino. (1 Pet. 4:11) Nga filya Davidi aishibe, na ifwe twaishiba ukuti ukubomba bwino takushintilila pa maka ya buntunse lelo pa mapaalo ya kwa Lesa.—1 Sam. 17:37.
5 Pa Ntanshi ya kwa Lesa Wesu: Icacindamisha ca kuti tulingile ‘ukuicefya mwi samba lya kuboko kwa maka ukwa kwa Lesa.’ (1 Pet. 5:6) Nga tulashomboka na mafya, napamo tulafuluka sana ukwiluluka uko Ubufumu bukaleta. Lelo mu kuicefya tulatekanya, ukupembela Yehova ukuti akafishepo ifilayo fyakwe pa nshita yakwe iyasontwa. (Yako. 5:7-11) Nga fintu cali kuli Yobo wa mpomfu, ico twayangwako sana ca kuti “libe ilyapaalwa ishina lya kwa Yehova.”—Yobo 1:21.
6 Kasesema Daniele ‘aipetamike ku cinso ca kwa Lesa wakwe’ kabili alisenaminwe kuli Yehova no kupeelwa imilimo iingi. (Dan. 10:11, 12) E ico, shi na ifwe natufwale ukuicefya, pa kwishiba ukuti “icilambu ca [kuicefya, NW] na katiina ka kuli Yehova, bucindami no bukata no mweo.”—Amapi. 22:4.